شينجياڭ 5000 ۇكىمەت قىزمەتكەرىن وقۋ - اعارتۋ ىستەرىنە كومەكتەسۋگە جىبەرەدى

    شينحۋا اگەنتتىگىنىڭ 9 - قىركۇيەكتە ۇرىمجىدەن بەرگەن حابارى. مەكتەپكە دەيىنگى «قوس ءتىل» وقۋ - اعارتۋىنداعى ولقىلىقتاردى تولىقتىرۋ ءۇشىن، شينجياڭ بيىل كۇزگى جاڭا وقۋ ماۋسىمىنان باستاپ، ءار جىلى جاڭادان قابىلدانعان ۇكىمەت قىزمەتكەرلەرى مەن وقىتۋشىلاردان 5000 ادامدى ءبىر جىلدىق ۋاقىتپەن وڭتۇستىك شينجياڭنىڭ 3 ايماق، ءبىر وبلىسىنداعى اۋىل - قىستاق بالا باقشالارىنىڭ وقىتۋ قىزمەتىنە كومەكتەسۋگە جىبەرۋدى ۇيعاردى.

    9 - قىركۇيەكتە شينجياڭ ۇيعۇر اۆتونوميالى رايوندىق وقۋ - اعارتۋ مەڭگەرمەسىنەن ۇعىسۋعا قاراعاندا، بيىل كۇزگى جاڭا وقۋ ماۋسىمىنان باستاپ، شينجياڭ جاڭادان قابىلدانعان 3000 ۇكىمەت قىزمەتكەرى مەن 2000 وقىتۋشىنى وڭتۇستىك شينجياڭنىڭ 3 ايماق، ءبىر وبلىسىنداعى اۋىل - قىستاق بالا باقشالارىنا «قوس ءتىل» وقۋ - اعارتۋى بويىنشا كومەككە جىبەرەدى ەكەن. مۇندا كومەككە جىبەرىلەتىن جاڭادان قابىلدانعان ۇكىمەت قىزمەتكەرلەرى اراسىندا ساياسي - زاڭ سالاسى بويىنشا ارناۋلى شتاتپەن جاڭادان قابىلدانعان حالىق ساقشىلارى، وڭتۇستىك شينجياڭداعى 3 ايماق، ءبىر وبلىستاعى اۋىل - قالاشىق ۇكىمەت قىزمەتكەرلەرى مەن تاڭداپ اۋىستىرعان ستۋدەنتتەر قامتىلمايدى، جاڭادان قابىلدانعان وقىتۋشىلار اراسىندا وڭتۇستىك شينجياڭداعى 3 ايماق، ءبىر وبلىس جاڭادان قابىلداعان وقىتۋشىلار قامتىلمايدى.

    بەلگىلەمەگە ساي، تاڭداپ جىبەرىلگەن جاڭادان قابىلدانعان 5000 ۇكىمەت قىزمەتكەرى مەن وقىتۋشى قىستىق، جازدىق كانيكولدان يگىلىكتەنەدى، وقۋ - اعارتۋعا كومەككە بارعان كەزدە، وڭتۇستىك شينجياڭنىڭ قىزمەت كومەك قاراجاتىنان يگىلىكتەنۋ نەگىزىندە، اي سايىن 2600 يۋان تۇرمىس كومەك قاراجاتىنان دا يگىلىكتەنەدى، سونىمەن قاتار، وقۋ - اعارتۋعا كومەككە بارعان قىزمەتكەرلەردىڭ كادرلىق بايلانىسى اۋەلگى قىزمەت ورنىندا ساقتالادى، يگىلىگى مەن مامىلەسى وزگەرمەيدى، ءبىر جىل قىزمەت مەرزىمى تولعاننان كەيىن، اۋەلگى ورنىنا كەلىپ قىزمەت ىستەيدى. جاڭادان قابىلدانعان وقىتۋشى ەگەر ارناۋلى قىزمەت ورنىنا قابىلدانعان وقىتۋشى بولسا، وندا ءبىر جىلدىق قىزمەت مەرزىمى تولعاننان كەيىن، بەلگىلەنگەن مەكتەپكە قايتىپ بارىپ قىزمەت ىستەي بەرەدى.

    وڭتۇستىك شينجياڭداعى قاشقار، حوتان، قىزىلسۋ، اقسۋدى قامتىعان 3 ايماق، ءبىر وبلىستا «قوس ءتىل» وقىتۋشىسى تاپشى بولۋ، ساپاسى «قۇرىلىمدىق جاقتان جەتكىلىكسىز» بولۋ سياقتى ماسەلەلەر توتەنشە كورنەكتى بولىپ وتىر. سول ءۇشىن، شينجياڭ بيىل وڭتۇستىك شينجياڭداعى 3 ايماق، ءبىر وبلىستاعى اۋىل - قىستاقتاردى ءتۇيىن ەتىپ، تۇتاس شينجياڭنىڭ جەر - جەرىنەن 4387 اۋىل - قىستاق «قوس ءتىل» بالا باقشاسىن تىڭنان، كەڭەيتىپ سالدى، اۋىل - قىستاق بالا باقشاسىنداعى بالدىرعانداردىڭ سانى ءبىر ميلليون 128 مىڭ 900گە جەتىپ، اۋىل - قىستاقتاردا 3 جىلدىق مەكتەپ الدى «قوس تىلدە» تەگىن وقىتۋ جاپپاي جالپىلاستى.

جاۋاپتى رەداكتور:سايراش تۇرارجان قىزى