ەكولوگيالىق ساياحات تۇرپان ەكونوميكاسىنىڭ ساپاسىن كوتەرىپ، تيىمدىلىگىن ارتتىردى

    شينحۋا اگەنتتىگىنىڭ 7 - مامىردا ۇرىمجىدەن بەرگەن حابارى. جاقىننان بەرى تۇرپاندا كۇن كەرەمەت ىسىدى، كولىكپەن ساپار شەكسەڭىز، جولدىڭ ەكى جاعالاۋى تۇت اعاشتارىمەن كومكەرىلىپ، قان بازاردان قايناعان جۇرتتى كورەر ەدىڭىز.

    «تۇت ماۋسىمىن» نەگىزگى تاقىرىپ ەتكەن ساياحات - مادەنيەت قيمىلى 6 - مامىردا تۇرپان قالاسىنىڭ گاۋچاڭ رايونى مەن توقسۇن اۋدانىندا قاتار باستالدى. تۇت جەمىسى ماۋسىمىنىڭ كەلۋىنە وراي، تۇرپان ساياحاتشىلاردىڭ جاڭا لەگىن قابىلداي باستادى.

    2013 - جىلدان بەرى، تۇرپان قالاسىنىڭ گاۋچاڭ رايونىندا تۇت باعىنىڭ جالپى اۋدانى 13 مىڭ مۋدان، تۇت اعاشىنىڭ سانى 540 تۇپتەن استى، توقسۇن اۋدانىندا قازىر 4100 مۋ تۇت باعى، 230 مىڭ ءتۇپ تۇت اعاشى بار، ونان جىلىنا 377 توننا ءونىم الىنىپ، ساتىلىم سوماسى 5 ميلليون 650 مىڭ يۋانعا جەتەدى.

    اۋىل شارۋاشىلىق ونىمدەرىنىڭ تابىسىنان سىرت، تۇت اعاشى جەر - جەردەگى تۇرعىنداردى تۇرپاندا ەكولوگيالىق ساياحاتتىڭ قىزىعىن كورۋگە تارتىپ، جەرگىلىكتى قىستاق تۇرعىندارىنىڭ اۋلا شارۋاشىلىعىن دامىتۋىنا، ءوز جەرىندە، جاقىن ماڭنان كاسىپتەنىپ، كەدەيلىكتەن قۇتىلۋىنا قولايلى شارت - جاعداي تۋدىردى.

    ال «تۇت ماۋسىمى» تۇرپاننىڭ ەكولوگيالىق ساياحاتىنىڭ ىقشام كورىنىسى عانا.

    بيىل تۇرپان «ساياحات + اۋىل شارۋاشىلىعى» دەگەن جاڭا ۇلگىنى جولعا قويىپ، ساياحات - مادەنيەت قيمىلدارىن توعىسپالى دانەكەر ەتىپ، «كوكونىس ءۇزۋ - تەرۋ مەرەكەسى»، «ورىك گۇلى مەرەكەسى»، «تۇت ماۋسىمى»، «ءجۇزىم ءۇزۋ مەرەكەسى» سياقتى اۋىل شارۋاشىلىعىمەن ۇشتاستىرىلعان ساياحات ونىمدەرىن ورتاعا سالىپ، ەكولوگيالىق ساياحات نىساندارىن وڭىرلىك ەكونوميكانى دامىتۋدىڭ ماڭىزدى تىرەگىنە اينالدىردى. بيىلعى ورىك گۇلى مەرەكەسى كەزىندە، تەك توقسۇن اۋدانى 750 مىڭ ادام - رەت ساياحاتشى قابىلدادى.

    تۇرپان سولتۇستىك، وڭتۇستىك، شىعىس شينجياڭنىڭ تۇيىلىسىندە، ول ەجەلگى جىبەك جولى بويىنداعى ماڭىزدى قالا، توڭىرەكتىڭ ءتورت بۇرىشىنان اعىلعان ادامدار وسىندا تىنىستاپ، تىنىعاتىن. قازىرگى كەزدە، تۇرپان «ءبىر بەلدەۋ، ءبىر جول» بويىنداعى ەلەۋلى ساياحات نىسانى رەتىندە، مول ساياحات بايلىعى مەن ءدامى ءتىلدى ۇيىرەتىن قاۋىن - قاربىز، جەمىس - جيدەگىنە سۇيەنىپ، الۋان ءتۇرلى ەكولوگيالىق ساياحات تۇرلەرىن قالىپتاستىرىپ، شار تاراپتىڭ ساياحاتشىلارىن قۇشاق جايا قارسى الىپ، جەرگىلىكتى ەكونوميكانىڭ دامۋىنا جاڭا ومىرشەڭدىك كۇش ۇستەپ وتىر

جاۋاپتى رەداكتور:سايراش تۇرارجان قىزى