ءدوربىلجىن اۋدانىنىڭ 2-كەزەكتى دالا سپورت دۋمانى جانە تيانشاندى اينالۋ جازعى بىرلەسكەن جارىسى سالتاناتپەن باستالدى

تىلشىلەرىمىز الىمبەك نۇرالين مەن جانبولات ماناربەك ۇلى حابارلايدى.

    ەڭبەك سۇيگىش ەڭسەلى جانداردىڭ ەلەۋلى مەرەكەسى مەن جالىندى جاستاردىڭ جارقىن كۇنىنە وراي، ەمىل حالقى تاعى ٴٴءبىر دۋماندى كۇندى شات مەرەيمەن قارسى الدى.

    ءدوربىلجىن اۋداندىق لۇييە كاڭچىڭ مادەنيەت - ساياحات اشۋ سەرىكتەستىگى مەن «تيانشاندى ۆەلوسيپەدپەن اينالۋ» دۋمانىن ۇيىمداستىرۋ كوميسسياسى بىرلەسىپ ۇيىمداستىرعان ءدوربىلجىن اۋدانىنىڭ 2-كەزەكتى دالا سپورت دۋمانى جانە تيانشاندى اينالۋ جازعى بىرلەسكەن جارىسى 6 - مامىر كۇنى المالى كورىنىس رايونىندا سالتاناتپەن باستالدى. 2 كۇندىك ۋاقىتپەن وتكىزىلگەن قيمىل قىر جولىندا ۆەلوسيپەد ايداۋ، ادىرلى، تاۋلى ءوڭىردى اينالىپ جۇگىرۋ سىندى 2 ۇلكەن تۇرگە ءبولىندى. ۆەلوسيپەد ايداۋ جارىسىنىڭ ەرەكشەلىگى ٴءتورت ادام ٴءبىر گرۋپپا بولىپ، كۇدىرلى، سوقپاقتى تاۋ جولىندا باتىلدىق پەن توزىمدىلىك تانىتىپ، سەرىكتەرىمەن بىرگە مارە سىزىعىنا جەتۋدى نەگىزگى ماقسات ەتەدى ەكەن.

    تاۋ جولىندا جۇگىرگەن سپورتشىلاردىڭ جارىسى ءتىپتى دە قىزعىندى، دۋماندى بولدى. تاۋ جولىنىڭ ويلى - شۇڭقىرىن جاقسى بىلەتىن تاجىريبەلى سپورتشىلار كەڭ تىنىسپەن جارىس مارەسىنە جارقىن بەينەمەن جەتتى. جاڭبىر سۋى جينالىپ قالعان سازدى بالشىقتى بايقاماي باسىپ العان ساناۋلى شاباندوزدار ۋاقىتتان ۇتتىرسا دا، قاتاردان قالماۋعا تىرىسىپ، ون كيلومەترلىك جارىس جولىن ٴءساتتى تامامدادى.

    بۇل جولعى جارىستىڭ جانە ٴءبىر جارقىن ٴءتۇيىنى ەمىلگە ارناۋلى ات باسىن بۇرعان ونەرپازدار جەر - جەردەن كەلگەن ساياحاتشىلار مەن دۋماندى ورتاعا جينالعان كورەرمەن قاۋىمعا اسەم ٴءان ارناپ، جارىستىڭ سالتاناتىنا ٴءسان قوستى.

    توڭىرەكتىڭ ٴءتورت بۇرىشىنان جينالعان ساياحاتشىلار بۇل ارانىڭ كورىنىسىن تاماشالاپ ايرىقشا اسەرلەندى. ولار: تاۋلى وڭىردە جوتالى جوندا وتكىزىلەتىن مۇنداي جارىس ادام اعزاسىنا پايدالى بولىپ قالماستان، ادام ەركىن شىڭداپ، رۋحتى سەرپىلتەدى ەكەن، بۇدان بىلاي وسىنداي جارىستار كوپتەپ وتكىزىلىپ تۇرسا قابات ۇيدە ومالىپ وتىرعان جۇمىس باستى جانداردىڭ جانىن جادىراتارى داۋسىز،-دەستى.

جاۋاپتى رەداكتور:سايراش تۇرارجان قىزى