كەنىشتى مەكەن كەڭ ولكە، ءار تاڭى دۋمان مەرەكە

    ءتىلشىمىز الىمبەك نۇرالين حابارلايدى:

    سالتاناتى جاراسقان قالاسى بار، بايتاعى ۇشان – تەڭىز دالاسى بار، ەمىرەنىپ اققان ەرتىسى، جانعا جايلى قاناسى بار، تىرشىلىگى تىنىستى، شارۋاشىلىعى ىرىستى، «قالاڭ بار كۇمىس رەڭ، دالاڭ بار تىنىسى كەڭ» دەپ اقىندار سۇيىنە جىرلاعان قويناۋى قۇتقا تولعان كەنىشتى مەكەن، كەڭ ولكە ـــ بۋىرشىن اۋدانى قاڭتار ايىنىڭ تاعى ءبىر قاسيەتتى كۇمىس تاڭىن قىزۋ مەرەيمەن قارسى الدى. ياعني بۋىرشىن اۋدانىنىڭ تۇڭعىش كەزەكتى قىراۋ مەرەكەسى جانە ۇلتتىق سالت – سانا دەنەتاربيە جينالىسى قاڭتار ايىنىڭ 19 – كۇنى شۇڭقىر قالاشىعىندا ءوتتى. توڭىرەكتىڭ ءتورت بۇرىشىنان كەلگەن قوناقتار شۇڭقىر سىندى شۇرايلى مەكەندە باس قوسىپ، قىس قىزىعىن بىرگە تاماشالادى.

    «ۇيىمداسىپ ىستەگەن ءار ءىستىڭ ءبىر ءسانى بار» دەگەندەيىن، بۋىرشىن اۋدانى وسى كەزەكتى قيمىلعا جۇيەلى جوسپار، مىعىم دايىندىق قۇرىپ، قيمىلدىڭ تابىستى دا تاماشا وتۋىنە بەرىك نەگىز قالاۋ ءۇشىن، 18 – قاڭتار تۇستەن كەيىن، اقپار جاريالاۋ جينالىسىن اشىپ، تابيعاتتىڭ تاماشا تۇستارىن اپپارات كوزىنە ءتۇسىرىپ، سۋرەت ارقىلى ءومىردى بەينەلەگەن فوتوگرافتار مەن ساياحات سەرىكتەستىكتەرى، سونداي – اق، اقپارات ورىندارىنىڭ تىلشىلەرىن وسى كەزەكتى مەرەكەنىڭ جاعدايىنان تولىق حاباردار ەتتى. ءارى ءبىرقانشا ساياحات سەرىكتەستىگىمەن سەنىمدى سەلبەستىك ورناتىپ، بۋىرشىن ساياحاتىنىڭ جاندانۋىنا، حالىقاراعا بەت الۋىنا داڭعىل جول اشتى.

    سالتاناتتى جينالىستى سارىلا كۇتكەن بەرەكەلى قاۋىم 19 – قاڭتار تاڭ اتىسىمەن شۇڭقىر قالاشىعىنا قاراي اعىلدى. «شىعىستان التىن كۇن قىزارعان، تەرەزە سىرتىندا مۇز ورمان» ... اقىندار قالامىنا ارقاۋ بولعان وسى ءبىر بوز قىراۋلى اعاشتاردىڭ ءسانى تاڭ الدىندا ەرەكشە كوزگە تۇسەتىن سياقتى. ات شانامەن زۋىلداعان، قار شاڭعىمەن قارعىعان، جۇيرىك ءمىنىپ جۇيتكىگەن ادامدار لەزدە قىزىل قايىڭداعى كۇمىستەن القا تاعىنعان، بوز قىراۋلى ورمانعا قاراي بەتتەپ، تابيعاتتىڭ تارتىمدىلىعىنا تامسانا دا تاڭدانا قاراپ، قىسقى ساياحاتتىڭ قىزىعىنا باتتى.

    «بەرەكەنى كوكتەن تىلەمە، بىرلىگى مول كوپتەن تىلە» دەگەندەي، كوپ بولىپ كۇش قوسقان بۇل رەتكى قيمىلدىڭ تاعى ءبىر جارقىن ءتۇيىنى بولعان قازاق ۇلتىنىڭ قولونەر بۇيىمدار كورمەسى مەن قول كۇرەس، بۇقا تارتىس سياقتى بۇقارالىق سپورت قيمىلدارى مەرەكەنىڭ مەرەيىن اسىرىپ، سالتاناتىنا ءسان قوسىپ تۇرعانداي ...

    مەرەيلى مەرەكە، جارتى كۇندىك جارمەڭكە ءبارى دە ءوز ەرەكشەلىگى بويىنشا ءساتتى ءجۇرىلدى. شۇڭقىردىڭ شۋاقتى كۇنى شۇعىلاسىن شاشىپ، قارلى دالاعا وزگەشە كورىك بەرگەن شاقتا، اقايرىق قىستاعىنىڭ قارلى دالاسىندا كوكپار، بايگە سياقتى ءداستۇرلى ۇلت ويىنى باستالدى. «قان ساسكەدە شىقتى داۋىس، كوكپار، كوكپار، قايسى قازاق كوكپاردى كورگەن توقتار» دەمەكشى، بايگە، كوكپار دەسە دەلەبەسى قوزاتىن، ويىن – تاماشانىڭ تالعامپاز كورەرمەندەرى ات ۇستىندەگى ازاماتتاردىڭ ارپالىستى قيمىلدارىنا وزىنشە باعا بەرىپ، جان ايعايىمەن دەمەپ وتىردى. ءسويتىپ، قۇتتى مەكەندەگى سالتاناتتى جينالىس قۇزىرلى ورىنداردىڭ قولداپ – قۋاتتاۋىندا ءوز مارەسىنە جەتتى.

    «باق قونعان، ىرىس قونعان، ماقتانام مەكەنىمە، قۇس ەكەش قۇس تا قيماي، شۋلايدى كەتەرىندە» دەپ جىرلاعانداي، شۇڭقىردىڭ شۋاقتى كۇنى اقايرىقتىڭ اپپاق دالاسىنا مەيىرلەنە شۇعىلاسىن شاشىپ، ەڭكەيىپ بارا جاتتى. قىسقى ويىننىڭ قىزىعىنا باتقان ءدۇيىم جۇرت قيمىلدىڭ اياقتالعانى جاريالانعان سوڭ، قيماستىقپەن قوشتاسىپ، «ەرتەگى الەمىنىڭ» ەرتەڭى نۇرلى بولعاي دەپ جوتادان جولعا قاراي اعىلدى.

جاۋاپتى رەداكتور:سايراش تۇرارجان قىزى