حالىق تۇرمىسىن جاقسارتۋ — ءبىزدىڭ كوكەيتەستى ماقساتىمىز

    ءتىلشىمىز ءبيسارا قۋانبەك قىزى حابارلايدى:

    ءبىر ەلدىڭ ەلدىگى ەل اقىلىن تارازىلاپ، جۇرت كەڭەسىن سالماقتاۋىندا. ءبىر ەلدىڭ ەلدىگى وتكەنى جونىندە ورامدى وي ءوربىتىپ، كەلەشەك جايلى كەسىمدى پىكىر جيناقتاۋىندا. «كەڭەس قىلعان ەل ازباس، كەڭىنەن پىشكەن تون توزباس» دەگەندەي، ارينە ەكى ءماجىلىس — ەل قامى. ىرگەمىزدى بەكەمدەپ، تاعانىمىزدى نىعايتىپ، وتكەنىمىزدى ساراپتاپ، ەرتەڭىمىزدى نۇرلاندىرار باعىت-باعدار.

    2017-جىلى قاڭتاردىڭ 12-كۇنى تۇستەن بۇرىن، ساياسي كەڭەس اۆتونوميالى رايوندىق 11 – كەزەكتى كوميتەتىنىڭ 5-ءماجىلىسى شينجياڭ حالىق سارايىندا سالتاناتتى تۇردە جابىلدى. ال ەلىمىز ءۇشىن تاعى ءبىر كەلەلى كەڭەستىڭ باستاماسى بولعان ماڭىزدى دا مايەكتى باس قوسۋ اۆتونوميالى رايوندىق 12-كەزەكتى حالىق قۇرىلتايىنىڭ 5- ءماجىلىسى 13-قاڭتار تۇستەن بۇرىن تاعى دا ٴوز مارەسىنە جەتتى. ارينە، ەكى ءٴماجىلىس بارىسىندا اقپارات-مەديا سالاسىنداعى تىلشىلەر ءۇشىن القالى ەلدىڭ ارمان-تىلەگىن بەينەلەپ، ەرتەڭىمىز جايلى قىمباتتى ۇسىنىستار مەن قۇندى پىكىرلەردى ەكشەلەي جەتكىزۋ، قالىڭ حالىق بۇقاراسىنا قاتىستى قولامتالى تاقىرىپتار، كەلەلى ماسەلەلەر جايىندا ماڭىزدى اقپاراتتىق حابار بەرۋ ، ۇلكەن قۋانىش دەپ بىلەم .

    وسى ورايدا، ساياسي كەڭەس مۇشەلەرىمەن سۇحباتتا بولدىق، ٴار ٴبىر مۇشەنىڭ ورتاعا قويعان پىكىرى سول قاراپايىم حالىقتىڭ ٴۇنى، جۇرتتىڭ تىلەگى دەپ بىلەمىز.

    الدىمەن التاي ايماعى شىڭگىل اۋدانى تايكەشكەن قالاشىعىنان كەلگەن ساياسي كەڭەس مۇشەسى ماقسات قابيدان ۇلىنىڭ ويىمەن قىسقاشا تانىس بولىڭىزدار: « مەن ٴدىني قايراتكەرلەردىڭ ۋاكىلى رەتىندە قاتىناسىپ وتىرمىن، شىڭگىل اۋدانى مەملەكەت دارەجەلى كەدەي اۋدان بولعاندىقتان ەڭ باستى ماقساتىمىز كەدەيلىكتەن قۇتىلۋ ارينە. سوندىقتان 800 دەن استام مالشى وتباسى اق دالاعا وتىرىقتاستى. بۇگىنگى كۇندە جەر اشۋ، قۇرىلىس سالۋ سياقتى جۇمىستار ءجۇرىلىپ جاتىر. ەندى وسى اق دالانى رەسمي قالاشىق ەتىپ قۇرىپ شىقساق دەگەن وي پىكىرىمدى الا كەلدىم، قالاشىق بولىپ قۇرىلسا جانە ٴبىر شڭگىل بارلىققا كەلەدى، مالشى-ديقانداردىڭ الاڭسىز تۇرمىس كەشىپ، كەدەيلىكەن قۇتىلۋىندا ماڭىزى زور دەپ بىلەم. ەندى ٴبىر ۇسىنىسىم شىڭگىل اۋدانى شەكارا وڭىرىنە ورنالاسقان وسى جەردەگى ٴار ۇلت حالقى ۇزاق جىلدان بەرى شەكارانى قورعاۋ، شەكارانى كوركەيتىپ گۇلدەندىرۋ، وتاننىڭ تۇتاستىعى، ۇلتتاردىڭ ىنتىماعى تۋراسىندا ٴوز ۇلەستەرىن قوسىپ كەلەدى. ٴبىراق، وسى تاۋلى رايونداعى حالىقتىڭ تۇرمىس شارت-جاعدايى ناشار، كاسىپپەن شۇعىلدانۋعا مۇمكىندىك از، سوندىقتان وسىلاردىڭ تۇرمىسىن جاقسارتساق. 3-جاقتان، تايكەشكەن وتكەلى شەتەلدەرمەن جاقسى قارىم –قاتىناس ورناتىپ، ەل اراسىندا تاماشا رول ويناپ وتىر، وسى جەردەن زاۆود، بازار ورىندارىن كوبىرەك قۇرسا، تەمىر جول قاتىناسىن جاقسارتسا، مالشى-ديقاندار شەكارا قورعاۋ قاراجاتىنان يگىلىكتەندىرسە، تايكەشكەن قالاشىعىن ەكونوميكالىق بەلدەۋ ەتىپ بەكىتسە دەگەن ويىم بار، وسىلاي ىستەگەندە، ٴبىزدىڭ كوپتەگەن جاستارىمىزدىڭ كاسىپتەنۋىنە جاراسىمدى، دامىعان شيىنجياڭ قۇرۋىمىز ٴۇشىن ماڭىزدى رول اتقارادى دەپ ويلايمىن».

    حالىقتىڭ تۇرمىسىن جاقسارتۋ ارينە كەدەيلىكتەن قۇتىلۋداعى بىردەن-ٴبىر تۇبەگەيلى شعار جول ەكەندىگى شىندىق. ٴماجىلىس باستالعان كۇننەن باستاپ، ٴار كۇنى تۇستەن كەيىن، ٴار جەردەن كەلگەن حالىق قۇرىلتاي ۋاكىلدەرى مەن ساياسي كەڭەس مۇشەلەرى گرۋپپالارعا ٴبولىنىپ تالقى ورىستەتىپ جاتتى. وسى بارىستا ٴبىز جانە توعىزتاراۋ اۋدانىنداعى حالىقتىڭ جۇگىن ارقالاپ كەلگەن ساياسي كەڭەس مۇشەسى بەكبولات اكىمبەك ۇلى اعامىزدىڭ وي- پىكىرىمەن بولىستىك: «مەن ەندى توعىز تاراۋ اۋدانىنان كەلىپ وتىرمىن، ٴبىزدىڭ اۋدانىمىز، دۇنيە ءجۇزى بويىنشا قورعالاتىن جاراتىلىستىق تابيعي قورىق رايونى سانالاتىن كولدەنەڭ كورىنىس رايونى جانە ٴتالىم، ٴشاشى، جاڭعاقتى سياقتى ساياحات ورىندارىمەن جالپاق جۇرتقا ايگىلى، سوندىقتان اۋدانىمىز جونىنەن العاندا، ساياحات كاسىبى حالىقتى اۋقاتتاندىرۋدا تىرەكتى ەكونوميكالىق قاينار سانالادى. اۋدانىمىزداعى حالىق بۇقاراسى ‹مالشلار شاتتىعى، ديقاندار شاتتىعى› ساياجايىن اشۋ سياقتى ساياحات كاسىپتەرىمەن شۇعىلدانىپ، اۋقاتتانۋ جولىنا ءتۇسىپ جاتىر. دەسە دە، وسى ساياحات رايوندارىن ٴبىر-بىرىنە ىركىلىسسىز تۇتاستىراتىن جولدار سالىنباي وتىر، سوندىقتان دا، وسى رەتكى ماجىلىسكە، اۋدانىمىزداعى ٴىرى ساياحات رايوندارىنىڭ اراسىن تۇتاستىراتىن جولداردى جاقسارتساق، ۇكىمەت قارجى جاعىنان كومەك جاساسا، ساياحات كاسىبىن ودان سايىن جانداندىرىپ، حالىقتىڭ تۇرمىسىن جاقسارتساق دەگەن تىلەگىمدى، ۇسىنىسىمدى ورتاعا قويامىن ٴارى باسشىلىقتىڭ ەسكەرىپ تياناقتاندىرىپ بەرەتىنىنە كامىل سەنەمىن».

    وسىنداي حالىقتىڭ قامىن ويلايتىن ازاماتتار كوبەيسىن، ويعا العان يگى جوسپارلار جۇزەگە اسا بەرسىن ٴيلايىم.

جاۋاپتى رەداكتور:سايراش تۇرارجان قىزى