قازاق شيپاگەرلىك سالاسىندا دارىندى شيپاگەرلەر جەتىسپەيدى

    ءٴتىلشىمىز ٴبيسارا قۋانبەك قىزى حابارلايدى:

    شينجياڭدا قازىر ۇيعۇر، قازاق، موڭعۇل شيپاگەرلىگى سياقتى ۇلتتىق مەديتسينا سالاسى دامىپ، ۇلتتىق شيپاحانالاردىڭ سانى كوبەيۋدە. دەسە دە، وسى ۇلتتىق مەديتسينا سالاسىندا قانداي ماسەلەلەر ٴءالى كۇنگە دەيىن شەشىم تاپپاي وتىر؟

    حالىقتىڭ تىلەگىن ٴءبىر ارناعا توعىستىرىپ، حالىق تۇرمىسىنا تىكەلەي قاتىستى تالايلاعان ماسەلەلەردى ەكشەپ، سارالاپ، شەشىم تاپتىراتىن مارەلى ءٴماجىلىستىڭ ارەدىگىندە باركول قازاق اۆتونوميالى اۋدانىنان كەلگەن ساياسي كەڭەس مۇشەسى جارقىنبەك قۇدايگەن ۇلىنىڭ ويىمەن ورتاقتاستىق: «باركول قازاق شيپاحاناسى قۇرىلعاننان بەرى، مىنەكي ءٴبىر جىلدان استام ۋاقىت بولدى. شيپاحانامىزدا قازاق شيپاگەرلىگى ىشكى اۋرۋلار ءبولىمى، قازاق شيپاگەرلىگى دارىلىك بۇلاۋمەن ەمدەۋ ءبولىمى، سۇيەك - سىرتقى اۋرۋلار ءبولىمى، ايەلدەر ءبولىمى، تەرى اۋرۋلار ءبولىمى، ءدارى – دارمەك ءبولىمى قاتارلى ەرەكشە بولىمدەر بار بولىپ، نەگىزىنەن بۇلاۋعا سالۋ (دارىلىك بۇلاۋ، تەرى اۋرۋلار بۇلاۋى، سۇيەك اۋرۋلار بۇلاۋى) ءادىسى، تۇزدى ىسىتىپ ىستىق وتكىزىپ ەمدەۋ قاتارلى ەرەكشە ەمدەۋ تەحنيكاسىمەن حالىق بۇقاراسىن ەمدەۋ جاقتارىندا كورنەكتى قىزمەتتەر ىستەپ كەلەمىز. سونىمەن بىرگە، شيپاحانامىزدا مەملەكەتتىڭ نەگىزدىك ءدارى تىزىمدىگى بەلگىلەمەسىنىڭ ءدارى تۇرىنە جاتاتىن ۇلتتىق دايىن دارىدەن 20 ءتۇرلى، جۇڭگوشا دايىن دارىدەن 200دەن استام، تابيعي جاسالعان دارىدەن 20 ءتۇرلىسى بار بولىپ، اۋداندىق قازاق شيپاحاناسى باركول اۋدانىنداعى قازاقى ەمدەۋدەگى بوستىقتى تولتىرىپ، جۇڭگوشا - باتىسشا ەمدەۋگە قازاقتىڭ ءداستۇرلى ەمدەۋ قاينارىن ۇشتاستىرىپ، ەمدەۋ- دەنساۋلىق ساقتاۋ سالاسىندا وزىندىك ۇلەسىن قوسىپ وتىر. دەسە دە، دارىندى مامانداردىڭ جەتىسپەۋى، قارجىنىڭ جەتىسپەۋى، ارناۋلى، جۇيەلى تاربيەلەۋ ورتالىعىنىڭ شينجياڭدا جوقتىعى، شارت-جاعدايدىڭ جاقسى بولماۋى، كاسىپتىك اتاق العان ارناۋلى شيپاگەرلەردىڭ كەمشىلدىگى شيپاحانامىزعا اۋىر سالماق سالىپ وتىرعان ءبىر وزەكتى ماسەلە بولىپ وتىر. سوندىقتان، وسى رەتكى جينالىسقا شينجياڭ مەديتسينا ۋنيۆەرسيتەتى جانە التاي مەديتسينا ينستيتۋتى سياقتى مەديتسينالىق وقىتۋ ورىندارىندا ارناۋلى قازاق مەديتسينا كلاسىن اشىپ، باعىتتامالى مامانداردى جەتىلدىرىپ بەرسە دەگەن ۇسىنىسىمدى ورتاعا قويدىم. بۇكىل حالىققا بەلگىلى، وتكەن جىلى پارتيامىزدىڭ ابزال ساياساتىنىڭ ارقاسىندا رايونىمىزدا حالىقتىڭ دەنساۋلىعىن جالپى بەتتىك اقىسىز تەكسەرۋ جۇمىسى قانات جايدىرىلدى. وسى بارىستا ءبىزدىڭ شيپاحانامىزدا كوپتەگەن ناۋقاستاردى ەمدەپ، كورنەكتى جۇمىستار ىستەدى. دەسە دە، سول ەمدەۋ قۇرىلعىلارىنىڭ كەمشىلىگى، ەمدەۋ شارت-جاعدايىمىزدىڭ ناشارلىعى، ارناۋلى تەحنيكانى يگەرگەن مامانداردىڭ تاپشىلىعى قولىمىزدى تاعى دا بايلاپ وتىر. سول سەبەپتى، ءٴبىز ۇلتتىق مەديتسينا تەحنيكاسىنىڭ تەتىگىن يگەرگەن داىندىلاردى كوپتەپ جەتىستىرسەك، شيپاحانامىزدىڭ شارت-جاعدايىن جاقسارتساق، ۇكىمەت قارجى جاعىنان قولداسا دەگەن ويىمىز بار».

جاۋاپتى رەداكتور:سايراش تۇرارجان قىزى