ەل يگىلىگى ءۇشىن ايتىلعان ەكى ۇسىنىس

    ءتىلشىمىز الىمبەك نۇرالين حابارلايدى:

    — اۆتونوميالى رايونىمىزدىڭ ءتوراعاسى شوكىرات زاكىردىڭ ۇكىمەت قىزمەتىنەن جاساعان بايانداماسىن تىڭداعاننان كەيىن، وتكەن ءبىر جىلدا رايونىمىزدىڭ ەكونوميكالىق قۋاتىنىڭ ارتىپ، قوعامدىق قۇرىلىسىنىڭ كەمەلدەنىپ، مادەنيەت ىستەرىنىڭ العا باسىپ، تاماشا ناتيجە، نىق قاداممەن جاڭا ءبىر جىلعا ءساتتى قادام باسقانىن سەزگەندەي بولدىم. اسىرەسە، 2017 - جىلى كەدەيلەردى دالمە–ءدال سۇيەمەلدەۋ، كەدەيلىكتەن قۇتىلدىرۋدان قامال الۋ شايقاسىنىڭ جەڭىسىنە قول جەتكىزۋ ماڭداي الدى ورىنعا قويىلىپ، قونىس اۋدارىپ كەدەيلىكتەن قۇتىلدىرۋدى كەدەيلىكتەن قۇتىلدىرۋدان قامال الۋدىڭ ماڭىزدى شاراسى ەتىپ، جاڭاشا قالا–قالاشىقتاندىرۋمەن، جاڭاشا اۋىل – قىستاق قۇرىلىسىمەن، ساياحاتتى دامىتۋمەن، كاسىپ سالاسىن دامىتۋمەن، كاسىپتەندىرۋدى جەبەۋمەن ۇشتاستىرىپ، كەدەيلەردى ورتالىق قالالارعا، شاعىن قالا – قالاشىقتارعا جانە قاتىناسى قولايلى وڭىرلەرگە كوشىرىپ، قونىس اۋدارۋىنا، ورنىقتىلىعىنا، كەدەيلىكتەن قۇتىلۋىنا، اۋقاتتانۋىنا كەپىلدىك ەتۋ باسا دارىپتەلىپ، كەدەيلەردىڭ سۇيەمەلدەۋدىڭ، كاسىپتەندىرۋدىڭ تىڭ جولى اشىلاتىنىن ەستىپ قاتتى قۋاندىم،-دەپ ءسوز باستاعان تەكەس اۋدانىنان كەلگەن ۋاكىل ءنۇسىپ ايتجان ۇلى ءوزىنىڭ ءبىرقانشا ۇسىنىس-پىكىرلەرىنىڭ دە شەتىن شىعاردى: «تەكەس اۋدانى وتكەن جىلى كەدەيلەردى سۇيەمەلدەۋ قىزمەتىندە تىڭ تەبىن بايقاتىپ، مول تاجىريبە توپتادى. كەدەيلەردى كۇيكى تىرلىكتىڭ كۇيبەڭىنەن قۇتىلدىرۋ ءۇشىن، اۋدانىمىز كەدەيلەردىڭ كەدەيلەسۋ سەبەبىن انىقتاۋمەن بىرگە، تۇرمىس تىرشىلىگى، نەگىزگى شۇعىلدانعان كاسىبىنە قاراي تۇرگە ايىرىپ، ءتۇيىندى سۇيەمەلدەۋ ءتاسىلىن قولدانىپ، ەكونوميكالىق جاقتان قولداۋ كورسەتىپ قانا قالماستان، كاسىپتەندىرۋگە جەبەپ، تىڭ تىرلىك باستاۋىنا باعىت–باعدار كورسەتتى. وتكەن جىلعى كەدەيلەردى سۇيەمەلدەۋ قىزمەتى تەبىندى ءجۇرىلدى. دەسە دە، اتتەگەن–ايلار دا جوق ەمەس، سوندىقتان وسى جولى كەدەيلەردى سۇيەمەلدەۋدە شىنايىلىققا تاباندى بولىپ، فورماشىلدىقتان ساقتانىپ، كەدەيلەردى سۇيەمەلدەۋمەن قاتار، ولاردىڭ ەركىن شىڭداپ، وي-ساناسىن وياتىپ، تۇرمىس-تىرشىلىگىنە تىڭ تىنىس سيلايتىن ۇتىمدى ءادىس–شارالار قاراستىرۋ، كەدەي بۇقارانى كاسىپتىك ونەرگە باۋلۋ، شارۋاشىلىق جۇرگىزۋ تانىمىن ءوسىرۋ، ەڭبەك قۋاتىن جەتىلدىرۋ جونىندە ءوز كوزقاراسىمدى ءبىلدىردىم. ەندى ءبىرى، تەكەس اۋدانى قاراجون جايلاۋى سياقتى (5A) دارەجەلى ايگىلى ساياحات ورنى بار اۋدان. ساياحات كاسىبىن جانداندىرۋمەن قاتار، ورتانى قورعاۋعا دا ءمان بەرىلسە، ويتكەنى، ەكولوگيالىق ورتانى قورعاۋ دەگەنىمىز — وندىرگىش كۇشتى قورعاۋ، ەكولوگيالىق ورتانى جاقسارتۋ دەگەنىمىز — وندىرگىش كۇشتى دامىتۋ دەگەندىك. سوندىقتان ۇكىمەت پارمەندى شارالار قولدانىپ، ەكولوگيانى قورعاۋ، قالپىنا كەلتىرۋ، تابيعي ورمان بايلىعىن قورعاۋ، جابايى حايۋانات، وسىمدىكتەردى قورعاۋ تەبىنىن كۇشەيتىپ، ساياحات ورىندارىنىڭ باۋ–باقشالى، ءتىپتى دە تازا، كوركەم بولۋىنا، وسى ارقىلى ءتىپتى دە كوپ ادامنىڭ قاراجون جايلاۋىنا ات باسىن بۇرىپ، قاراجون ساياحاتىن الەمگە ايگىلەۋگە شارت–جاعداي جاراتسا، تەكەس اۋدانىنىڭ ءۇشىنشى كاسىپ سالاسىنىڭ دامۋىنا دا داڭعىل جول اشىلار ەدى».

جاۋاپتى رەداكتور:سايراش تۇرارجان قىزى