حالىققا ءتيىمدى كەلەلى ىستەر جۇرت جۇرەگىن جىلىتتى

    ءتىلشىمىز الىمبەك نۇرالين حابارلايدى:

    شينجياڭ ۇيعۇر اۆتونوميالى رايوندىق 12 – كەزەكتى حالىق قۇرىلتايىنىڭ 5 – ماجىلىسىنە قاتىناسىپ جاتقان ۋاكىلدەر ۇكىمەت قىزمەتىنەن بايانداماداعى جارقىن تۇيىندەر مەن ۇستەگى جىلعى قىزمەتتىڭ باستى كوزەۋلى نىساناسىنا باسا نازار اۋداردى. قۇمىل قالاسى ۇلاتاي قازاق ۇلتتىق اۋىلىنان كەلگەن قۇرىلتاي ۋاكىلى نۇرجاي دالەل قىزىنىڭ ايتۋىنشا، اۆتونوميالى رايونىمىزدىڭ «بەيقۇت ءۇي سالىپ، حالىقتى اۋقاتتاندىرۋ»، «ۇلتتار ىنتىماعىنىڭ بەرەكەلى شاڭىراعى» قيمىلى، «دەنساۋلىقتى اقىسىز تەكسەرۋ»، «كاسىپتەندىرۋدى جەبەۋ» سياقتى حالىقتىڭ تۇرمىس – تىرشىلىگىنە تىعىز قاتىستى بولعان ماڭىزدى باعدارلامالار جۇرت جۇرەگىن جىلىتىپ، وتىرىقتانعان حالىقتىڭ ورنىقتى قاداممەن دامۋىنا شارت – جاعداي جاراتقان.

    ـــ ۇكىمەت قىزمەتىنەن جاسالعان باياندامادا حالىققا ءتيىمدى كەلەلى ينجەنەريالاردى كۇش سالا جاقسى يگەرۋ باسا دارىپتەلىپ، كاسىپتەندىرۋ ارقىلى حالىققا تيىمدىلىك جاساۋ ورتاعا قويىلدى. ءبىزدىڭ ۇلاتاي اۋىلىنداعى تۇرعىندار بۇرىن جالاڭ مالشىلىق، قوسىمشا ەگىنشىلىك كاسىبىمەن شۇعىلدانىپ كەلگەن. اۆتونوميالى رايونىمىزدىڭ وتىرىقتاندىرۋ ساياساتىنىڭ ارقاسىندا، مالشىلار ءبىر جاعىنان قولدا مال باعۋ تەحنيكاسىن يگەرىپ، مال شارۋاشىلىق كووپەراتيۆتەرىن قۇرىپ، اۋقاتتانۋ جولىنا تۇسسە، ەندى ءبىر ءبولىم ارتىق ەڭبەككۇش كاسىپتەندىرۋدى جەبەۋدىڭ ارقاسىندا، باسقا سالاعا ويىسىپ كاسىپتەنىپ، ءومىر بويى تەك ءبىر عانا كاسىپ ىستەۋ سىندى قاساڭ قاعيدانىڭ قاماۋىنان قۇتىلىپ، تىڭ تىرشىلىك باستاپ، جاڭا ناتيجە جاراتۋعا قۇلشىندى. قيىر قونىپ، شەت جايلاعان مالشى قاۋىمنىڭ دەنساۋلىعىن اقىسىز تەكسەرۋ وتكەن جىلى تۇڭعىش رەت مالشى – ديقان بۇقاراسىنا شاتتىق سيلادى. بۇرىن دەنساۋلىق تەكسەرتۋ ءۇشىن تەك قانا، اۋداندىق نەمەسە قالالىق شيپاحانالارعا بارۋ شارت ەدى، بۇل كۇندەرى اۋىلدان الىستاماي – اق، ءۇيىنىڭ جانىندا دەنساۋلىعىن تەكسەرتىپ، ءوز جاعدايىنان ءبىرشاما تولىق حاباردار بولا الدى. بۇدان تىس تاعى دا، «كەدەيلەردى دالمە – ءدال سۇيەمەلدەۋ»، «جۇپ قۇراپ، تۋىس بولۋ» سياقتى كەلەلى ىستەر حالىقتىڭ سەنىمىن بەكەمدەپ، ءار ۇلت بۇقاراسىنىڭ باقىتتى، جاراسىمدى جارقىن ءومىر كەشىرۋىنە تاماشا شارت – جاعداي جاراتتى، - دەيدى ۋاكىل نۇرجاي دالەل قىزى.

    ءار جولعى ۇسىنىس – جوبالارىڭىز شىنايى شەشىمىن تاۋىپ، حالىق يگىلىگىنە جاراسا، بۇل دا حالىق ءۇشىن ىستەلگەن قارقىندى جۇمىستاردىڭ ءبىرى دەپ بىلەمىز، ەندى وسى جولى تاعى قانداي ۇتىمدى ۇسىنىس، جۇيەلى جوبالاردى ورتاعا سالدىڭىز دەگەن سۇراعىمىزعا نۇرجاي دالەل قىزى بىلايشا جاۋاپ بەردى: «قوعامدىق قامتاماسىزداندىرۋ ارقىلى حالىققا تيىمدىلىك جاساۋ دەگەن ينجەنەريا بار، مەنىڭشە بولعاندا، حالىق بۇقاراسىنىڭ زاتتىق جاقتاعى قاجەتىن قامداۋمەن بىرگە ولاردىڭ رۋحاني جاقتاعى قاجەتىنە دە قاراۋ كەرەك. ويتكەنى، رۋحاني بايلىق ـــ باياندى بايلىق. قازىر ورتالىق نەمەسە اۆتونوميالى رايون جاعىنان شىعارىلعان باعىت - ساياساتتار، اۋىل – قىستاق تۇرمىسىمەن تىعىز قاتىستى بولعان زاڭ – ەرەجەلەر جەتەرلىك. ءبىراق، وسىنداي ماڭىزدى نارسەلەردىڭ ءبىزدىڭ اۋىل – قىستاققا اياعى جەتپەيدى. سونداي – اق، حالىق بۇقاراسىنىڭ ءوز انا تىلىندە وقيتىن ۇيرەنۋ ماتەريالدارى جوقتىڭ قاسى. بۇقارانىڭ تانىمىن تەرەڭدەتەتىن، كۇندەلىكتى ءجۇرىس – تۇرىسىنا ولشەم بولاتىن شاعىن زاڭ – ەرەجە كىتاپتارىنىڭ، ۇيرەنۋ ماتەريالدارىنىڭ (مۇنىڭ ىشىندە اۆتوكولىك ايداۋ، جوندەۋ، كوكونىس ەگۋ، مال باعىمشىلىعى سياقتى كىتاپتار) قازاق تىلىنە كوپتەپ اۋدارىلىپ، نەگىزگى ساتىداعى حالىق بۇقاراسىنىڭ قولىنا جەتسە، ولاردىڭ وزدىگىنەن ۇيرەنىپ، يگىلىك جاراتۋىنا سەپتىگى تيەر ەدى. وسى جولى وسىنداي ءبىر ماڭىزدى ءتۇيىندى ورتاعا قويدىم».

جاۋاپتى رەداكتور:سايراش تۇرارجان قىزى