اۆتونوميالى رايون تۇراقتى نەگىزگى ەگىستىك جەردى ايىرىپ بەلگىلەۋ جۇمىستارىن جاپپاي ورىندادى

    اۆتونوميالى رايوندىق مەملەكەت جەر بايلىعى مەڭگەرمەسىنەن ۇعىسۋىمىزشا، اۆتونوميالى رايونىمىزدىڭ تۇراقتى نەگىزگى ەگىستىك جەردى ايىرىپ بەلگىلەۋ جۇمىستارى تاياۋدا جاپپاي اياقتاعان، اۆتونوميالى رايون بويىنشا (بيڭتۋاندى قامتىمايدى) 39 ميلليون 620 مىڭ 400 مۋ جەر تۇراقتى نەگىزگى ەگىستىك جەر رەتىندە ايىرىپ بەلگىلەنگەن، 84 اۋدان، قالانىڭ تۇراقتى نەگىزگى ەگىستىك جەر تۋرالى دەرەكتەر قورى مەملەكەت جەر بايلىعى مينيسترلىگىنىڭ ساپالىق تەكسەرۋى مەن قايتالاي قاداعالاۋىنان وتكەن، ءسويتىپ، كوزدەلگەن جۇمىس جوسپارى ورىندالعان.

    اۆتونوميالى رايوندىق مەملەكەت جەر بايلىعى مەڭگەرمەسى پارتيا باسشىلىق گرۋپپاسىنىڭ مۇشەسى، جەردى اشۋ، رەتتەۋ قۇرىلىستارىن باسقارۋ مەكەمەسى پارتكومىنىڭ شۋجيى، مەكەمە باستىعى شۇي شياۋليدىڭ تانىستىرۋىنشا، وسى رەت اۆتونوميالى رايون بويىنشا ايىرىپ بەلگىلەنگەن تۇراقتى نەگىزگى ەگىستىك جەردىڭ ىشىندە، كۇرىش الابى مەن سۋارمالى جەردىڭ اۋدانى ايىرىپ بەلگىلەنگەن ەگىستىك جەردىڭ %90.86ىن ۇستاعان، قالا ماڭىنداعى جەرلەردىڭ ورتاشا قورعالۋ سالىستىرماسى %14.87تەن%49.57كە كوتەرىلگەن، ايىرىپ بەلگىلەنگەننەن كەيىنگى ەگىستىك جەر ساپالىق دارەجەسى بۇرىنعىمەن سالىستىرعاندا الدەقايدا ورنىعىپ، كوتەرىلە تۇسكەن.

    تۇراقتى نەگىزگى ەگىستىك جەردى ايىرىپ بەلگىلەۋ جۇمىسى اۆتونوميالى رايونىمىزدىڭ ەگىستىك جەردى قورعاۋ قىزمەتىندەگى وزەكتى مىندەتتەردىڭ ءبىرى. پارتيانىڭ 18 - قۇرىلتايىنان بەرى، تۇراقتى نەگىزگى ەگىستىك جەردى ايىرىپ بەلگىلەۋ مەن جوعارى ولشەمدى ەگىستىك جەر قۇرىلىسىن وزەك ەتكەن ەگىستىك جەردى قورعاۋ جۇمىستارى اۆتونوميالى رايون بويىنشا ىركەس - تىركەس جولعا قويىلدى، ەگىستىك جەردى قورعاۋ قىزمەتى اۆتونوميالى رايوننىڭ ەگىن شارۋاشىلىعىنىڭ دامۋى مەن تۇرلەنۋىنە، جاڭالانۋىنا پارمەندى تىرەك ازىرلەدى. تۇراقتى نەگىزگى ەگىستىك جەردى ايىرىپ بەلگىلەپ، استىق حاۋىپسىزدىگىنە كەپىلدىك ەتىپ، جەر - جەردى تاندەمدىك، توپتىق ۇلگىدەگى جاڭاشا قالا - قالاشىقتانۋدى دامىتۋ جولىمەن جۇرۋگە جەتەلەۋدەن سىرت، اۆتونوميالى رايون تاعى جالپى 11 ميلليارد 800 ميلليون يۋان قارجى سالىپ، جوعارى ولشەمدى نەگىزگى ەگىستىك جەر قۇرىلىسىن ىلگەرىلەتتى، سونىمەن قاتار، ەگىستىك جەرلەر اراسىنداعى جولدار مەن سۋارۋ جۇيەسى سياقتى قوسالقى قۇرىلىستاردىڭ ساپالىق ولشەمىن توقتاۋسىز جوعارىلاتتى. قۋاڭشىلىق پەن تاسقىندا دا ءونىم بەرەتىن، ءونىمى جوعارى جانە تۇراقتى 10 ميلليون مۋدان اسا جوعارى ولشەمدى نەگىزگى ەگىستىك جەر ىركەس - تىركەس باپتالىپ، اۆتونوميالى رايوننىڭ استىق حاۋىپسىزدىگىنە ءونىمدى تۇردە كەپىلدىك ەتىلىپ، وسى زامانعى اۋىل شارۋاشىلىعىنىڭ قاۋىرت دامۋى جەبەلدى.

جاۋاپتى رەداكتور:سايراش تۇرارجان قىزى