شي جينپيڭ حات جولداپ، جۇڭگو حالىق ۋنيۆەرسيتەتى قۇرىلعاندىعىنىڭ 80 جىلدىعىن قۇتتىقتادى

    شينحۋا اگەنتتىگىنىڭ 3 - قازاندا بەيجيڭنەن بەرگەن حابارى. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 3 - قازاندا حات جولداپ، جۇڭگو حالىق ۋنيۆەرسيتەتى قۇرىلعاندىعىنىڭ 80 جىلدىعىن قۇتتىقتاپ، بارلىق وقىتۋشى - وقۋشىلارعا، جۇمىسشى - قىزمەتشىلەرگە جانە جالپى مەكتەپتەستەرگە قۇتتى بولسىن ايتتى.

    شي جينپيڭ قۇتتىقتاۋ حاتىندا بىلاي دەپ اتاپ كورسەتتى: جۇڭگو حالىق ۋنيۆەرسيتەتى پارتيامىز قۇرعان تۇڭعىش جاڭاشا جۇيەلى ۋنيۆەرسيتەت. مەكتەپ قۇرىلعاننان بەرى جۇڭگو حالىق ۋنيۆەرسيتەتى پارتيانىڭ باسشىلىعىنا، ماركسيزمنىڭ جەتەكشىلىك ورنىنا، پارتيا مەن حالىق ىستەرى ءۇشىن قىزمەت ىستەۋگە باستان - اياق تاباندى بولىپ، مەكتەپ باسقارۋدىڭ ايقىن ەرەكشەلىگىن قالىپتاستىرىپ، ەلىمىزدىڭ فيلولوگيا، قوعامدىق عىلىمدار سالاسىندا ەلدەن ەرەك ەڭبەك ءسىڭىرىپ، ەلىمىزدىڭ توڭكەرىس، قۇرىلىس، رەفورما ىستەرىنە توپ - توبىمەن تاڭداۋلى دارىندىلار تاربيەلەپ بەردى.

    شي جينپيڭ مىنانى باسا دارىپتەدى: كەزەكتە پارتيا مەن مەملەكەت ىستەرى ماڭىزدى كەزەڭدە تۇر، ءبىز جوعارى وقۋ - اعارتۋدى وتكەندەگى ءارقانداي كەزدەگىدەن دە اناعۇرلىم شۇعىل قاجەتسىنۋدەمىز، عىلىمي بىلىمدەر مەن ۇزدىك دارىندىلارعا وتكەندەگى ءارقانداي كەزدەگىدەن دە اسا ءزارۋمىز. جۇڭگو حالىق ۋنيۆەرسيتەتىنىڭ مەكتەپ قۇرىلعاندىعىنىڭ 80 جىلدىعىن تىڭ باستاما ەتىپ، كىم ءۇشىن ادام تاربيەلەۋ، قانداي ادام تاربيەلەۋ، قالاي تاربيەلەۋ سىندى وسى ءتۇبىرلى ماسەلەنى شەشۋدى ارقاۋ ەتىپ، ءمورال ارقىلى ادام تاربيەلەۋدەن جازباي، وقۋ - اعارتۋ زاڭدىلىعىنا بويسۇنىپ، تاڭداۋلى ءداستۇردى ساۋلەلەندىرىپ، جۇڭگونىڭ بايتاق جەرىندە تامىر تارتىپ ۋنيۆەرسيتەت باسقارىپ، دۇنيە ءجۇزى بويىنشا ماڭداي الدى ۋنيۆەرسيتەت جانە وزىق ءپان قۇرۋعا قۇلشىنىپ، ەلىمىزدىڭ جوعارى وقۋ - اعارتۋ ىستەرىنىڭ گۇلدەنۋىنە، دامۋىنا، «قوس 100 جىلدىق» كۇرەس نىساناسىن ىسكە اسىرۋعا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ىسكە اسىرۋعا تىڭ دا ءتىپتى دە كەسەك ۇلەس قوسۋىن ءۇمىت ەتەمىن.

    جۇڭگو حالىق ۋنيۆەرسيتەتى قۇرىلعاندىعىنىڭ 80 جىلدىعىن قۇتتىقتاۋ جينالىسى 3 - قازان كۇنى تۇستەن بۇرىن بەيجيڭدە ءوتتى. ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى ليۋ ياندۇڭ جينالىستا شي جينپيڭنىڭ قۇتتىقتاۋ حاتىن جانە ارناۋ ءسوزىن وقىدى. ول بىلاي دەدى: باس شۋجي شي جينپيڭنىڭ ماڭىزدى نۇسقاۋىنىڭ رۋحىن ىشكەرىلەي تياناقتاندىرىپ، پارتيانىڭ وقۋ - اعارتۋ باعىتىن دايەكتىلەندىرىپ، ءمورالدى ادام تاربيەلەۋ ءتۇبىرلى مىندەتىن ارقاۋ ەتىپ، حالىق ءۇشىن مەكتەپ قۇرۋ، ۇڭىلە زەرتتەپ وتاننىڭ ءۇمىتىن اقتاۋ ءداستۇرىن ساۋلەلەندىرىپ، وقۋ - اعارتۋدىڭ جالپىلىق رەفورماسىن تەرەڭدەتىپ، وقىتۋ دەڭگەيىن ۇزبەي جوعارىلاتىپ، دۇنيە ءجۇزى بويىنشا ماڭداي الدى ۋنيۆەرسيتەت جانە وزىق ءپان قۇرۋ جورىعىنا نىق قادام تاستاپ، مەملەكەتتىڭ گۇلدەنۋى مەن ۇلتتىڭ كوركەيۋىنە ءتىپتى كوپ ۇزدىك دارىندىلار تاربيەلەۋ كەرەك.

    جۇڭگو حالىق ۋنيۆەرسيتەتىنىڭ ارعى تەگى 1937 - جىلى قۇرىلعان سولتۇستىك سانشي الەۋمەتتىك مەكتەبى، سونداي - اق كەيىنگى سولتۇستىك جۇڭگو بىرىككەن ۋنيۆەرسيتەتى مەن سولتۇستىك جۇڭگو ۋنيۆەرسيتەتى، 1950 - جىلى 3 - قازاندا سولتۇستىك جۇڭگو ۋنيۆەرسيتەتىن نەگىز ەتىپ، بىرىكتىرىلىپ قۇرىلعان، ۇزاق ۋاقىتتىق مەكتەپ باسقارۋ امالياتىندا فيلولوگيا، قوعامدىق عىلىمدار جوعارى وقۋ - اعارتۋىنا جانە ماركستىك وقىتۋعا، زەرتتەۋگە ءمان بەرىپ، «ەلىمىزدىڭ فيلولوگيا، قوعامدىق عىلىمدار جوعارى وقۋ - اعارتۋى سالاسىنىڭ تۋى» دەپ اتالدى.

جاۋاپتى رەداكتور:سايراش تۇرارجان قىزى