زاڭسىز پەرزەنتتى بولۋ سەنىمدىلىك باعالاۋ جۇيەسىمەن ماتاستىرىلدى

    وزگەرىس ەنگىزىلگەننەن كەيىنگى «اۆتونوميالى رايوننىڭ حالىق سانى جانە جوسپارلى تۋىت ەرەجەسى» ماقۇلداندى

    اۆتونوميالى رايوندىق 12 - كەزەكتى حالىق قۇرىلتايى تۇراقتى كوميتەتىنىڭ 30 - رەتكى ءماجىلىسى 28 - شىلدە كۇنى وزگەرىس ەنگىزىلگەننەن كەيىنگى «اۆتونوميالى رايوننىڭ حالىق سانى جانە جوسپارلى تۋىت ەرەجەسىن» ماقۇلدادى، زاڭسىز پەرزەنتتى بولۋدى سەنىمدىلىك باعالاۋ جۇيەسىمەن ماتاستىرۋ، تۋۋ دەمالىسىن 60 كۇن ۇزارتۋ جارقىن تۇيىنگە اينالدى.

    اۆتونوميالى رايوندىق حالىق قۇرىلتايى زاڭ - ءتۇزىم كوميتەتىنىڭ ورىنباسار مەڭگەرۋشى مۇشەسى گو يۇڭحۇيدىڭ تانىستىرۋىنا قاراعاندا، «اۆتونوميالى رايوننىڭ حالىق سانى جانە جوسپارلى تۋىت ەرەجەسى» 2002 - جىلى 28 - قاراشا اۆتونوميالى رايوندىق 9 - كەزەكتى حالىق قۇرىلتايى تۇراقتى كوميتەتىنىڭ 31 - ماجىلىسىندە ماقۇلدانعان. سوڭعى جىلدارى ەلىمىز جان سانىنىڭ دامۋىندا ەلەۋلى وزگەرىستەر تۋىلدى، ج ك پ 18 - كەزەكتى ورتالىق كوميتەتىنىڭ بەسىنشى جالپى ءماجىلىسى «جان سانىنىڭ بىركەلكى دامۋىن جەبەپ، جوسپارلى تۋىت ساياساتى سىندى نەگىزگى مەملەكەت ساياساتىنا تاباندى بولىپ، ءبىر جۇپ ەرلى - زايىپتىنىڭ 2 بالالى بولۋ ساياساتىن جاپپاي اتقارۋدى» ورتاعا قويدى. «ەرەجەنىڭ» وزگەرىس ەنگىزىلگەننەن كەيىنگى «اۆتونوميالى رايوننىڭ حالىق سانى جانە جوسپارلى تۋىت ەرەجەسىمەن» ۇشتاسۋىنا كەپىلدىك ەتىپ، شينجياڭ قوعامىنىڭ جاراسىمدىلىعىن، ۇلتتاردىڭ تەرەزەسىنىڭ تەڭدىگىن، وڭىرلىك اماندىق پەن باياندى تىنىشتىعىن جۇزەگە اسىرۋ ءۇشىن «ەرەجەگە» دەر كەزىندە وزگەرىس ەنگىزۋ وتە قاجەتتى.

    ۇعىسۋعا قاراعاندا، وزگەرىس ەنگىزىلگەننەن كەيىنگى «ەرەجە» جاي نەكەلەنۋ، جاي بالالى بولۋ جونىندەگى بەلگىلەمەلەردى كۇشىنەن قالدىرىپ، «ازاماتتاردىڭ بالالى بولۋ ۇقىعى مەن زاڭ بويىنشا جوسپارلى تۋۋدى اتقارۋ بورىشى بولادى، زاڭ بويىنشا قوعامدىق باعىپ - قاعۋ قاراجاتىن تاپسىرۋى قاجەت، سونىمەن بىرگە زاڭسىز پەرزەنتتى بولۋ، سونداي - اق قوعامدىق باعىپ - قاعۋ قاراجاتىن تاپسىرماۋ جايتتەرى سەنىمدىلىك باعالاۋ جۇيەسىمەن ماتاستىرىلادى» دەگەن مازمۇن قوسىلعان.

    نەشە بالالى بولۋ جونىندە «ەرەجەدە» بىلاي دەپ بەلگىلەنگەن: «قالا - قالاشىق نوپوسىنداعى جۇبايلار 2 پەرزەنتتى بولۋىنا بولادى، اۋىل - قىستاق نوپوسىنداعى جۇبايلار 3 پەرزەنتتى بولۋىنا بولادى. ەرلى - زايىپتىلاردىڭ ءبىرى قالا - قالاشىق نوپوسىندا بولسا، قالا - قالاشىق جوسپارلى تۋىت بەلگىلەمەلەرى بويىنشا بالالى بولادى. قايتادان ۇيلەنگەن جۇبايلاردىڭ تاعى ءبىر بالالى بولۋىنا بولادى».

جاۋاپتى رەداكتور:سايراش تۇرارجان قىزى