التاي ايماعىنىڭ «پارتيا 19 - قۇرىلتايىن قارسى الۋ جانە مەملەكەت مەرەكەسىنىڭ 68 جىلدىعىن جىرلاۋ مۋزيكا كونسەرتى» جەمەنەي اۋدانىندا وتكىزىلدى

 

    اسەن قايسا ۇلى حابارلايدى. التاي جەرگىلىكتى پارتكوم ۇگىت ءبولىمىنىڭ ورنالاستىرۋىمەن «پارتيا 19- قۇرىلتايىن قارسى الۋ جانە مەملەكەت مەرەكەسىنىڭ 68 جىلدىعىن جىرلاۋ مۋزيكا كونسەرتى» 25- قىركۇيەكتە جەمەنەي پارتكوم جيىن زالىندا وتكىزىلدى. جەمەنەي اۋداندىق پارتكومىنىڭ تۇراقتى جوراسى، ۇگىت ءبولىمىنىڭ باستىعى تولعان ءتۇسىپقان ۇلى جەمەنەي اۋدانى اتىنان قارسى الۋ لەبىزىن ءبىلدىردى.

    مۋزيكا كونسەرتى التاي ايماقتىق ۇلتتىق اسپاپتار وركەستىرىندەگى ونەرپازداردىڭ ءتۇرلى مۋزيكالىق اسپاپتارمەن ورىنداۋىندا «بەيجيڭنەن تاراعان قۋانىشتى حابار اۋىلعا جەتتى» اتتى مۋزيكامەن باستالدى. ونەرپازدار جەكە ءان، توپتىق ءان، ۇلتتىق مۋزيكالىق وركەستىر قاتارلى الۋان فورمادا ءار ۇلت حالقىنىڭ اۋەندەرىن، مۋزيكاسىن ايشىقتاپ، انمەن ىرعالىپ، بيمەن بۇرالىپ، كورەرمەندەردى ءتانتى ەتتى.

    كونسەرتتىڭ جالپى بارىسىندا، جاڭا جۇڭگو قۇرىلعاننان بەرگى 68 جىلداعى شۇعىلالى تابىستاردى جىرعا قوستى، پارتيا 18-قۇرىلتايىنان بەرگى التاي ايماعىندا بولعان ەلەۋلى وزگەرىستەر مەن سۇبەلى ناتيجەلەردى، التاي حالقىنىڭ پارتيا 19-قۇرىلتايىن قىزعىن قارسى الىپ، جۇڭحۋا ۇلتىنىڭ ۇلى كوركەيىپ - گۇلدەنۋى سىندى جۇڭگو ارمانىن جۇزەگە اسىرۋعا بولعان بەرىك سەنىمى مەن كوتەرىڭكى رۋحاني جىگەرىن بەينەلەدى.

    مۋزيكا كونسەرتى جەمەنەي اۋدانىنداعى ءار ۇلت حالقىنا تاماشا مۋزيكالىق ءلاززات باعىشتادى، كورەرمەندەر باستان -اياق دۋ قول شاپالاق سوعىپ پارتياعا بولعان العىسى مەن ونەرپازداردىڭ ونەرىنە دەگەن شىنايى قۇرمەتىن سەزىندىردى. پارتيا مەن ۇكىمەتتىڭ ىستىق ىقىلاسى مەن قامقورلىعى اسەم ءان مەن ءتاتتى كۇي ارقىلى ءار ۇلت كادرلارى مەن بۇقارالارىنىڭ بويىنا قان تامىرداي تاراپ، جۇرەك تۇپكىرىنەن ورىن الدى.

    جەمەنەي اۋداندىق پارتكوم ۇگىت ءبولىمىنىڭ ورىنباسار باستىعى جاڭالان قاليبەك ۇلى بىلاي دەدى: «ايماقتىڭ جەمەنەي اۋدانىندا قويعان بۇگىنگى مۋزيكالىق كونسەرتىن 300 دەن استام ءار ۇلت بۇقاراسى تاماشالادى. كونسەرت پارتيا مەن ۇكىمەتتىڭ ءار ۇلت حالقىن بىرلىككە باستاپ، ۇزدىكسىز العا باسقان جاڭا ءومىردى، باياشات زامان مەن باقىتتى تۇرمىستى جىرلاپ، كورەرمەندەردىڭ ورەلى باعاسىنا يە بولدى. جەمەنەيدەگى ءار ۇلت حالقى مەملەكەت مەرەكەسىن قۇتتىقتاپ، 19-قۇرىلتايدىڭ تابىسپەن اشىلۋىن شىنايى ءۇمىت ەتەدى» .

ءتىلشىنىڭ قىزمەت ورنى: جەمەنەي اۋداندىق حالىق قۇرىلتايى تۇراقتى كوميتەتى

جاۋاپتى رەداكتور:نۇرجان مينۋار قىزى