رايونىمىز جاراتىلىستىق قورىقتارداعى كەن ۇقىعىن اداقتاۋ قىزمەتىن ورنىقتى ىلگەرىلەتتى

    جونگە سالۋ ارقىلى قالپىنا كەلتىرىلگەن جەر اۋماعى 4500 مۋعا جەتتى

    12 - قىركۇيەكتە اشىلعان جاراتىلىستىق قورىقتارداعى كەن ۇقىعىن اداقتاۋ، قاتاردان شىعارۋ قىزمەتى جونىندەگى اۆتونوميالى رايوندىق اڭگىمە ماجىلىستەن ۇعىسۋىمىزشا، قازىر رايونىمىز جاراتىلىستىق قورىقتارداعى كەندى القاپتارىن جونگە سالۋ، قالپىنا كەلتىرۋ قىزمەتىندە بەلسەندى ناتيجەگە قول جەتكىزىپ، كەن گەولوگيالىق ورتاسىن جونگە سالۋعا، قالپىنا كەلتىرۋگە 50 ميلليون يۋانعا تاياۋ قارجى شىعارىپ، جونگە سالۋ ارقىلى قالپىنا كەلتىرىلگەن جەر اۋماعى شامامەن 4500 مۋعا جەتكەن.

    ۇعىسۋعا قاراعاندا، بۇرىن رايونىمىز جاراتىلىستىق قورىقتاردا، ايگىلى كورىنىستىك اۋماقتاردا، گەولوگيالىق باقشالاردا ءىشىنارا كەن ۇقىعىن ورناتقان ەكەن. پارتيانىڭ 18 - قۇرىلتايىنان بەرى، اۆتونوميالى رايون ەكولوگيالىق وركەنيەت قۇرىلىسىنىڭ تالاپتارىنا ساي، ءتۇرلى قورىقتارداعى كەن ۇقىعىن جاپپاي اداقتاپ، كەن گەولوگيالىق ورتاسىن جونگە سالۋ، قالپىنا كەلتىرۋ قىزمەتىن دەن قويا ورىستەتكەن.

    اۆتونوميالى رايوندىق مەملەكەت جەر بايلىعى مەڭگەرمەسى 11 - تامىزدا «اۆتونوميالى رايوننىڭ جاراتىلىستىق قورىقتارداعى، سونداي - اق ءتۇرلى ەكولوگيالىق قىزىل سىزىقتا قۇرىلىس سالۋعا تيىم سالىنعان اۋماقتارداعى كەن ۇقىعىن اداقتاۋ قىزمەتى جوباسىن» تاراتتى. سول كۇننەن باستاپ وسى جىلدىڭ سوڭىنا دەيىن، رايونىمىزدىڭ جاراتىلىستىق قورىقتارىنداعى، سونداي - اق ءتۇرلى ەكولوگيالىق سىزىقتا قۇرىلىس سالۋعا تيىم سالىنعان اۋماقتارداعى كەن ۇقىعىن ءۇش كەزەڭ بويىنشا تەكسەرىپ، تۇرلەر بويىنشا ءبىر جاقتى ەتىپ، سوڭىندا كەن ۇقىعىن تۇرلەر بويىنشا ءبىر جاقتى ەتۋ جوباسىن قالىپتاستىرادى.

    قازىر جونگە سالۋ، قالپىنا كەلتىرۋ قىزمەتى قاۋىرت جۇرىلۋدە. رايونىمىز جاراتىلىستىق قورىقتارداعى كۇشكە يە مەرزىمدەگى كەن بارلاۋ ۇقىعىن، كەن اشۋ ۇقىعىن مەرزىمى تولعاننان كەيىن، مەرزىمىن ۇزارتپاي وزدىگىنەن كۇشىنەن قالدىرادى ءارى ءىشىنارا جاراتىلىستىق قورىقتارداعى كۇشكە يە كەن بارلاۋ ۇقىعىن، كەن اشۋ ۇقىعىن كۇشىنەن قالدىرۋ ۇقتىرۋىن تاراتتى.

    اۆتونوميالى رايوندىق مەملەكەت جەر بايلىعى مەڭگەرمەسى «كەن گەولوگيالىق ورتاسىن قورعاۋ جانە جونگە سالۋ، قالپىنا كەلتىرۋ قىزمەتىن باقىلاۋ - تەكسەرۋ تۇزىمىنە»، «كەن بايلىعى سالاسىندا كۋالىكسىز كەن اشۋ سياقتى زاڭعا قايشى ارەكەتتەرگە قاتاڭ سوققى بەرۋ ارناۋلى وڭاۋ ارەكەتى جوباسىنا» ىشكەرىلەي وزگەرىس ەنگىزىپ، كەمەلدەندىرىپ جانە ونى اتقارىپ، ەكولوگيالىق فۋنكتسياسىن قامتاماسىز ەتۋدىڭ نەگىزگى سىزىعىنان، قورشاعان ورتا ساپا حاۋىپسىزدىگىنىڭ تومەنگى شەگىنەن، جاراتىلىستىق بايلىقتان پايدالانۋدىڭ جوعارعى شەگىنەن اتتاماۋعا كەپىلدىك ەتىپ، جوبا مەن قۇرىلىس نىسانىنىڭ قورشاعان ورتاعا جاسايتىن ىقپالىن باعالاۋ ءتۇزىمىن قاتاڭ اتقارىپ، «3 جوعارى نىساننىڭ» شينجياڭدا ءجۇرىلۋىن قاتاڭ تيادى.

جاۋاپتى رەداكتور:سايراش تۇرارجان قىزى