شي جينپيڭ 22 - كەزەكتى حالىقارالىق پروكۋرورلار بىرلەستىگىنىڭ جىلدىق ءماجىلىسى جانە بىرلەستىككە مۇشە ەلدەر مەن وڭىرلەردىڭ ۋاكىلدەر قۇرىلتايى اشىلعاندىعىن حات جازىپ قۇتتىقتادى

    شينحۋا اگەنتتىگىنىڭ 11 - قىركۇيەكتە بەيجيڭنەن بەرگەن حابارى. 22 - كەزەكتى حالىقارالىق پروكۋرورلار بىرلەستىگىنىڭ جىلدىق ءماجىلىسى جانە بىرلەستىككە مۇشە ەلدەر مەن وڭىرلەردىڭ ۋاكىلدەر قۇرىلتايى 11 - قىركۇيەك تۇستەن بۇرىن بەيجيڭدە اشىلدى. مەملەكەت ءتوراعاسى شي جينپيڭ قۇرىلتايدىڭ اشىلعاندىعىن حات جازىپ قۇتتىقتادى.

    شي جينپيڭ مىنالاردى اتاپ كورسەتتى: الەۋمەت مۇددەسىنىڭ ۋاكىلى بولعان پروكۋرورلار ماڭىزدى جاۋاپكەرلىك ارقالاپ وتىر. بۇل جولعى حالىقارالىق پروكۋرورلار بىرلەستىگىنىڭ جىلدىق ءماجىلىسى «الەۋمەتتىك يگىلىك ىستەرى ءۇشىن قىزمەت كورسەتەتىن پروكۋرورلىقتى» نەگىزگى تاقىرىپ ەتىپ، تىنىش، ءادىل، جاراسىمدى، زاڭمەن جونگە سالىناتىن قوعام قۇرۋدى توڭىرەكتەي وتىرىپ، پروكۋرورلاردىڭ الەۋمەتتىك يگىلىك ىستەرىن قورعاۋ ماسەلەسى جونىندە تەرەڭ كەڭەس قۇرۋى ءار ەلدىڭ زاڭمەن جونگە سالۋ قۇرىلىسىن ىلگەرىلەتۋى جونىنەن ماڭىزدى ءمان الادى.

    شي جينپيڭ بىلاي دەپ باسا دارىپتەدى: جۇڭگو ۇكىمەتى مەملەكەتتى جاپپاي زاڭمەن جونگە سالۋعا ايرىقشا كوڭىل ءبولىپ، زاڭ شىعارۋدا عىلمي باعىت ۇستانۋدى، زاڭدى قاتاڭ اتقارۋدى، ءادىليانى ءادىل جۇرگىزۋدى، جالپى حالىقتىڭ زاڭعا بويسۇنۋىن ۇزدىكسىز ىلگەرىلەتىپ، مەملەكەتتى زاڭمەن جونگە سالۋدى، بيلىكتى زاڭ بويىنشا اتقارۋدى، اكىمشىلىكتى زاڭ بويىنشا جۇرگىزۋدى قاتار ىلگەرىلەتۋدە تاباندى بولىپ، زاڭمەن جونگە سالىناتىن مەملەكەت قۇرۋدى، زاڭمەن جونگە سالىناتىن ۇكىمەت قۇرۋدى، زاڭمەن جونگە سالىناتىن قوعام قۇرۋدى ءبىر تۇلعالاندىرۋدان جازباي، جۇڭگوشا سوتسياليزمنىڭ زاڭمەن جونگە سالۋ جۇيەسىن ورناتۋعا، سوتسياليستىك زاڭمەن جونگە سالىناتىن مەملەكەت قۇرۋعا قۇلشىندى. جۇڭگونىڭ پروكۋراتۋرا ورگانى − مەملەكەتتىڭ زاڭ باقىلاۋ ورگانى، ول قىلمىس وتكىزگەندەردى جازالاۋ جانە قىلمىس وتكىزۋدەن ساقتانۋ، ارىز - شاعىم ىستەرىن باقىلاۋ سياقتى جاۋاپكەرلىك ارقالاعان، مەملەكەت مۇددەسى مەن قوعامدىق الەۋمەتتىك يگىلىك ىستەرىن قورعاۋداعى ماڭىزدى كۇش. جۇڭگو پروكۋرورلاردىڭ الەۋمەتتىك يگىلىك ىستەرىن قورعاۋداعى رولىن ساۋلەلەندىرۋ، زاڭمەن جونگە سالۋ قۇرىلىسىن ىلگەرىلەتۋ بارىسىندا كوپتەگەن تاجىريبەلەر توپتادى، سونداي - اق دۇنيە ءجۇزى ەلدەرىنىڭ زاڭمەن جونگە سالۋ وركەنيەتىنىڭ قول جەتكىزگەن تابىستارىنان بەلسەندى تۇردە ۇلگى الۋدى ءۇمىت ەتەدى. مەن ءار ەلدەن كەلگەن پروكۋرورلاردىڭ وسى ورايدا الەۋمەتتىك يگىلىكتى قورعاۋدا، زاڭمەن جونگە سالۋ قۇرىلىسىن ىلگەرىلەتۋدە قول جەتكىزگەن تاجىريبەلەرىن ءوزارا ءبولىسىپ، ءادىلياداعى سەلبەستىكتى، اۋىس - كۇيىستى تەرەڭدەتىپ، ادامزاتتىڭ بەيبىتشىلىگى مەن دامۋىن تىزە قوسا جەبەۋ سىندى ۇلاعاتتى ءىستى ورتاق ىلگەرىلەتۋ جولىندا تىڭ ۇلەس قوسۋىن ءۇمىت ەتەمىن.

جاۋاپتى رەداكتور:سايراش تۇرارجان قىزى