مەملەكەتتىك سپورت جارىسى اياقتادى

    شينجياڭ ۋاكىلدەر ۇيىرمەسى 6 التىن مەدال، 8 كۇمىس مەدال، 12 قولا مەدال الدى

    مەملەكەتتىك 13 - كەزەكتى سپورت جارىسىنىڭ لاپىلداپ جانعان قاسيەتتى الاۋى 8 - قىركۇيەكتە تيانجيندە باياۋ ءسوندىرىلدى. ون نەشە كۇننەن بەرى، شينجياڭنىڭ دەنە تاربيە ساڭلاقتارى مەملەكەتتىك سپورت جارىسىنىڭ الاڭىندا قايراتتانا ۇمتىلىپ، جيىنى 6 التىن مەدالعا، 8 كۇمىس مەدالعا، 12 قولا مەدالعا يە بولۋداي تاماشا ناتيجەگە قول جەتكىزىپ، وزدەرىنىڭ بەينەلەرى ارقىلى شينجياڭنىڭ ناقتى قۋاتىن دالەلدەپ، وزدەرىنىڭ قۇلشىنىسى ارقىلى شينجياڭنىڭ كەلبەتىن ايگىلەدى.

    مەملەكەتتىك سپورت جارىسى اياقتاعان كۇنى شينجياڭنىڭ ەرلەر باسكەتبول كومانداسى مەن لياۋنيڭنىڭ ەرلەر باسكەتبول كومانداسى اعا جۇلدەگەرلىككە تالاستى. 78گە قارسى 61 ۇپايمەن جۇلدەگەر بولعانىمەن، ءبىراق شينجياڭ ەرلەر باسكەتبول كومانداسىنىڭ مەملەكەتتىك سپورت جارىسىنا قاتىناسىپ جاڭا رەكورد جاساعان ازاماتتار جونىنەن شەشۋشى جارىسقا قاتىناسۋدىڭ ءوزى ۇلكەن قۋانىش سانالادى.

    6 التىن مەدال، 8 كۇمىس مەدال، 12 قولا مەدال، بۇل شينجياڭ ۋاكىلدەر ۇيىرمەسىنىڭ وسى رەتكى مەملەكەتتىك سپورت جارىسىنا قاتىناسقانداعى قول جەتكىزگەن ناتيجەسى. 26 مەدال الدىڭعى رەتكى مەملەكەتتىك سپورت جارىسىنا قاتىناسقانداعى 16 مەدالدان الدەقايدا كوپ.

    سونىمەن قاتار، وسى رەتكى مەملەكەتتىك سپورت جارىسىندا شينجياڭ تاعى ءبىرتالاي تاريحي جاڭا رەكورد جاسادى. رايونىمىزدان جيىنى 206 سپورتشى 18 ۇلكەن، 71 شاعىن جارىس تۇرىنەن شەشۋشى جارىسقا قاتىناسۋ تولىمدىلىعىنا يە بولدى، ادام سانى الدىڭعى رەتكى سپورت جارىسىنداعىدان %70 ارتىپ، رايونىمىزدىڭ مەملەكەتتىك سپورت جارىسىنا قاتىناسۋ تاريحىندا شەشۋشى جارىسقا قاتىناسقان ءتۇرى ەڭ كوپ، ادام سانى ەڭ كوپ بولعان ءبىر رەتكى جارىس بولدى.

    ساتى - ساتى بويىنشا سارالاپ تاڭداۋ ارقىلى رايونىمىزدان 30 سپورتشى مەملەكەتتىك سپورت جارىسىنىڭ بۇقارالىق دەنە تاربيە جارىس تۇرىنەن شەشۋشى جارىسقا قاتىناسۋ تولىمدىلىعىنا يە بولىپ، 8 ۇلكەن، 18 شاعىن جارىس ءتۇرى بويىنشا شەشۋشى جارىسقا قاتىناستى.

    مەملەكەتتىك سپورت جارىسىنا قاتىناسقان شينجياڭ ۋاكىلدەر ۇيىرمەسىنىڭ ورىنباسار باستىعى، اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ شۋجيى نيە چۇن بىلاي دەدى: وسى رەتكى مەملەكەتتىك سپورت جارىسىنىڭ جارىس الاڭىندا رايونىمىزدىڭ جاس سپورتشىلارى تەز جەتىلگەندىگىن بايقاتتى، جۇدىرىقشىلىق، كۇرەس، فۋتبول، قايراڭ ۆولەيبولى، نىسانا اتۋ سياقتى جارىس تۇرىندە ءبىر توپ جاس ساڭلاقتار كوزگە ءتۇستى، مىنە بۇل شينجياڭنىڭ ءىزباسار دارىندىلاردى باۋلۋعا وسكەلەڭ ءمان بەرگەندىگىنىڭ ناقتى ناتيجەسى.

    سيلىق ساحناسىنان ءتۇسىپ كەلە جاتقان سول ءبىر ءسات جاڭا ءبىر مەملەكەتتىك سپورت جارىسىنا دايىندالۋ پەريوتىنىڭ باستالعانىنان دەرەك بەرەدى. نيە چۇن تىلشىگە بىلاي دەدى: شينجياڭ رەفورمانى تەرەڭدەتۋ سىندى وسى ءبىر نەگىزگى جەلىنى مىقتاپ ارقاۋ ەتىپ، شەبەرلەردى تاڭداۋ قىزمەتىن ويداعىداي ىستەپ، جوعارى دەڭگەيدەگى جاتتىقتىرۋشىلاردى ەنگىزۋ جانە جەتىلدىرۋ تەبىنىن كۇشەيتىپ، عىلمي جاتتىعۋ ورەسىن جوعارىلاتادى. سونىمەن قاتار، تۇتاس حالىقتىڭ دەنە شىنىقتىرۋ قيمىلىن كەڭىنەن ەتەك الدىرىپ، اناعۇرلىم كەمەلدەنگەن جالپى حالىقتىق دەنە شىنىقتىرۋ الەۋمەتتىك قىزمەت كورسەتۋ جۇيەسىن قۇرادى. باس نىسانانى مىقتاپ ارقاۋ ەتىپ، دەنە تاربيەنىڭ حالىق تۇرمىسىن جاقسارتۋ، جۇرت تىلەگىن ۇيىستىرۋ، ۇلتتار ىنتىماعىن ىلگەرىلەتۋ، ءدىني ۇشقارىلىققا سوققى بەرۋ، نەگىزگى ساتىنىڭ نەگىزدىك قۇرىلىسىن كۇشەيتۋ جاعىنداعى ەرەكشە يقۋاتىن ويداعىداي ساۋلەلەندىرەدى.

    نيە چۇن بىلاي دەدى: كەلەر جىلى وتكىزىلەتىن اۆتونوميالى رايوندىق 14 - كەزەكتى سپورت جارىسىندا شينجياڭ دا وسى رەتكى مەملەكەتتىك سپورت جارىسىنىڭ ۇلگىسى بويىنشا بۇقارالىق دەنە تاربيە جارىس ءتۇرىن بەلگىلەپ، بۇقارانىڭ دەنە شىنىقتىرۋعا قاتىناسۋىنا، دەنساۋلىق دەڭگەيىن جوعارىلاتۋىنا مۇمكىندىك جاسايدى.

جاۋاپتى رەداكتور:الىمبەك نۇرالين