ۇلى وتانىمىزدىڭ كورىك - كەلبەتىن اناعۇرلىم اسىرايىق

    ۇرپاقتان - ۇرپاققا جالعاسقان كۇرەستى رۋحاني كۇشتەن بولە قاراۋعا بولمايدى.

    «بۇكىل پارتيا، تۇتاس قوعام جاسىل دامۋ ۇستانىمىندا تاباندى بولىپ، سايحانبا رۋحىن ساۋلەلەندىرىپ، ەكولوگيالىق وركەنيەت قۇرىلىسىن تاباندىلىقپەن ىلگەرىلەتۋ كەرەك». باس شۋجي شي جينپيڭ جۋىقتا ماڭىزدى نۇسقاۋ بەرىپ، حىبەي ولكەسى سايحانبا ورمان الاڭىن قۇرۋشىلاردىڭ اسەرلى ىزگى ىستەرىن تولىق تۇراقتاندىرىپ، بورىشتى ەستە بەرىك ساقتاپ، جاپاعا شىداپ شارۋاشىلىق قۇرىپ، جاسىل دامۋ جولىمەن جۇرگەن سايحانبا رۋحىن وسكەلەڭ جيناقتاپ، بۇكىل پارتياعا، بۇكىل قوعامعا ۇلى وتانىمىزدىڭ كورىك - كەلبەتىن اناعۇرلىم اسىرۋ تۋرالى ۇلى ۇندەۋ جاريالاپ، بۇكىل پارتيانى، بۇكىل ەل حالقىن جاسىل دامۋدى، ەكولوگيالىق وركەنيەت قۇرىلىسىن ىلگەرىلەتۋ جولىندا تىنباي كۇرەس جۇرگىزۋگە ىنتالاندىردى جانە شابىتتاندىردى.

    سايحانبا رۋحىن ساۋلەلەندىرۋدە، بورىشتى ەستە بەرىك ساقتاپ، كورىكتى جۇڭگو قۇرۋدىڭ تاريحي ماڭىزدى مىندەتىن ارقالاۋ كەرەك. 55 جىلدا، سايحانبا «كۇننىڭ كوزىن قۇم كولەگەيلەپ، قۇستار قوناقتاۋعا بۇتا تاپپايتىن» قۇبا شولدەن «وزەننىڭ باستاۋ كوزىنە، بۇلتتىڭ مەكەنىنە، گۇلدىڭ الەمىنە، ورماننىڭ تەڭىزىنە، قۇستاردىڭ سايران باعىنا» اينالدى، بۇل، تۇپتەپ كەلگەندە، سايحانبالىقتاردىڭ پارتيانىڭ ۇندەۋىنە ءۇن قوسىپ، ەكولوگيانى قالپىنا كەلتىرۋ، ەكولوگيانى قورعاۋ سىندى تاريحي بورىشتى قاشاندا ەستەرىندە بەرىك ساقتاعانىنىڭ ارقاسى. بۇگىنگى تاڭدا، كورىكتى جۇڭگو قۇرۋ وسى بۋىننىڭ − ءبىزدىڭ جاڭا بورىشىمىز. بايلىقتىڭ تەجەمى بارعان سايىن كۇشەيىپ، قورشاعان ورتانىڭ لاستانۋى اۋىرلاپ، ەكولوگيالىق جۇيە جۇتاڭداعان قىسىلتاياڭ جاعدايدا، ءبىز مىندەتتى تۇردە، تابيعاتقا جاسالعان ءارقانداي قياناتتىڭ اقىرى اينالىپ كەلىپ ادامزاتتىڭ وزىنە زيان جەتكىزەتىنىن ەستە بەرىك ساقتاۋىمىز، ەكولوگيالىق وركەنيەت قۇرۋدىڭ حالىقتىڭ ىرىس - قۇتىنا، ۇلتتىڭ بولاشاعىنا ساياتىن ۇزاق بولاشاقتىق ۇلى جوسپار ەكەنىن، ءسوز جوق، جەتە تانۋىمىز، شىنايى ارەكەتتەر ارقىلى بورىشتى اماليات بارىسىندا ورىنداۋىمىز، ءوزىمىز باس بولىپ جاۋاپكەرلىكتى تياناقتاندىرىپ،ءبىر ميلليارد 300 ميلليون ادامنىڭ كورىكتى جۇڭگونى بىرگە قۇراتىن جويقىن كۇشىن توپتاۋىمىز كەرەك.

    سايحانبا رۋحىن ساۋلەلەندىرۋدە، جاپاعا شىداپ شارۋاشىلىق قۇرۋعا تاباندى بولىپ، «ەڭبەك جەمىسىنىڭ ماعان ءتان بولۋى شارت ەمەس» دەيتىن قۇلىقپەن جاپاعا شىداي وتىرىپ كۇرەس جۇرگىزىپ، قيىندىقتاردى جەڭىپ، قامال الۋ كەرەك. ءوز كەزىندە توتەنشە ناشار قورشاعان ورتادا، سايحانبالىقتار قارا سۇلىنىڭ نانىن جەپ، قار مەن مۇزدان سۋ ەرىتىپ ءىشىپ، جەر تولەدە تۇنەۋى «اس - سۋمەن ەسەپتەسپەيتىن، قار جاستانىپ، مۇز توسەنۋدى كاپەرىنە المايتىن» ۇمىتكەرلىك دارقاندىقتى مازداتتى؛ ولار ءۇستىرتتى سۋىق وڭىردە ورمان ءوسىرۋدىڭ تەحنيكالىق قيىن ماسەلەلەرىن عىلمي رۋحپەن شەشىپ، الدىڭعى بۋىننىڭ ءىسىن سوڭعى بۋىن جالعاپ، ءبىر ءتۇپ اعاشتى ميلليون مۋلىق ورمان تەڭىزىنە اينالدىرعان حيكىمەت جاراتتى. كورىكتى جۇڭگو قۇرۋ بارىسىندا، ەنەرگيا - بايلىق تەجەمى ماسەلەسىن شەشۋدە بولسىن، الدە ەكولوگيالىق ورتادان العان نەسىبەمىزدىڭ قارىمجىسىن قايتارۋدا بولسىن، بارلىعى دا ءبىر رەتكى ناۋقانمەن بىتەتىن شارۋا ەمەس. دەسەدە، ءبىز جاپاعا شىداپ كۇرەس جۇرگىزەتىن ءداستۇردى تىنباي جالعاستىرىپ، قار جاستانىپ، مۇز توسەنەتىن، جاپانى قۋانىشقا بالايتىن رۋحتى اسقاقتاتىپ، «كەشەگىلەر ەككەن اعاش ەرتەڭگىلەرگە سايا بولاتىن» رۋحتى ساۋلەلەندىرىپ، تاباندىلىقپەن تىنباي ەڭبەك ەتسەك، ءبىز شەشە المايتىن ماسەلە، ءبىز تىندىرا المايتىن ءىس بولماق ەمەس.

    سايحانبا رۋحىن ساۋلەلەندىرۋدە، جاسىل دامۋدى ىلگەرىلەتىپ، ادام مەن تابيعاتتىڭ جاراسىمدى دامۋىنىڭ جاڭا جاعدايىن قالىپتاستىرۋعا قۇلشىنۋ كەرەك. 55 جىلدىق دامۋدان كەيىن، سايحانبا ەكولوگياسى تاماشا، ءوندىرىسى دامىعان، تۇرمىسى جاقسارعان تاماشا بەينەگە ەنىپ، «ەكولوگيالىق ورتانى قورعاۋ ەڭبەگىن وسى كەزدە تىندىرىپ، زەينەتىن سان عاسىر كورەتىن جۇمىس» دەيتىن تۇجىرىمدى تەرەڭىنەن دالەلدەپ، «تۇنىق سۋ، جاسىل تاۋدىڭ ءوزى بايلىق» دەيتىن ۇستانىمدى ىشكەرىلەي ءتۇسىندىردى. بۇگىنگى تاڭدا، قورشاعان ورتانى قورعاۋ، قورشاعان ورتانىڭ لاستانۋىن وڭاۋ كوكەي تەستى ءارى ماشاقاتتى جۇمىس، جاسىل دامۋ ءتاسىلى مەن تۇرمىس ءتاسىلىن قالىپتاستىرۋدى ىلگەرىلەتۋ − دامۋ كوزقاراسىنداعى تەرەڭ توڭكەرىس. سايحانبا سىندى ەكولوگيالىق وركەنيەت قۇرىلىسىنىڭ جاندى مىسالى بىزگە ۇنەمشىلدىكتى، قورعاۋدى الدىڭعى ورىنعا قويىپ، تابيعي تۇردە قالپىنا كەلتىرۋدى نەگىزگى باعىت، جاسىل دامۋدى، اينالمالى دامۋدى، تومەن كومىرتەكتى دامۋدى نەگىزگى جول ەتىپ، ەكولوگيالىق ورتانى بۇلدىرەتىن، ءتىپتى، ويراندايتىن دامۋ ۇلگىسىن، قورشاعان ورتانى قۇربان ەتىپ، ەكونوميكانىڭ مەزەتتىك، اۋماقتىق وسۋىنە قول جەتكىزەتىن ءادىستى باتىلدىقپەن تاستاعاندا عانا، كەلەر ۇرپاققا اسپانى ءتىپتى دە اشىق، تاۋى ءتىپتى دە مانات، سۋى ءتىپتى دە تۇنىق تاماشا قورشاعان ورتا ازىرلەپ، جۇڭحۋا ۇلتىنىڭ ماڭگى باياندى دامۋىن جۇزەگە اسىرۋعا بولاتىنىن ۇعىندىردى.

    باس شۋجي شي جينپيڭ: «قورشاعان ورتا ماسەلەسى − حالىق تۇرمىسى ماسەلەسى، جاسىل تاۋ − كورىك، اشىق اسپان − باقىت» دەپ اتاپ كورسەتتى. جاسىل دامۋ ۇستانىمىنان جازباۋدا سايحانبا رۋحىن ۇلگى ەتىپ، ەكولوگيالىق وركەنيەت قۇرىلىسىن جاپپاي ىلگەرىلەتسەك، كوركى سولمايتىن جاسىل تاۋ، مولدىرەگەن تۇنىق سۋ، لاستانباعان تازا اۋا قول جەتپەس ارمان بولۋدان قالادى، حالىق داۋلەتتى، مەملەكەت قۇدىرەتتى، جۇڭگو كورىكتى بولۋ نىساناسى دا، ءسوز جوق، ىسكە اسادى.

جاۋاپتى رەداكتور:سايراش تۇرارجان قىزى