مەملەكەتتىك كوركەمونەر بايقاۋىنا قاتىناسقان شينجياڭ مۇگەدەكتەر كوركەمونەر ۇيىرمەسى تابىسپەن ورالدى

    بايقاۋعا قاتىناستىرىلعان 6 ءنومىرى تۇگەلدەي سيلىق الىپ، تاريحتاعى ەڭ جاقسى ناتيجەگە قول جەتكىزدى

   ءبىر اپتاعا جالعاسقان مۇگەدەكتەردىڭ مەملەكەتتىك 9 - كەزەكتى كوركەمونەر بايقاۋىنا قاتىناسقان شينجياڭ مۇگەدەكتەر كوركەمونەر ۇيىرمەسىنىڭ 52 مۇشەسى 24 - تامىز تۇستەن كەيىن ۇشاقپەن ۇرىمجىگە قايتىپ كەلدى. ۇيىرمە 6 ءنومىرىن بايقاۋعا قاتىناستىرىپ ەكى 1 - دارەجەلى، ءبىر 2 - دارەجەلى، ءۇش 3 - دارەجەلى سيلىق الۋداي تاماشا ناتيجەگە قول جەتكىزدى، بۇل ولاردىڭ تاريحتاعى ەڭ جاقسى ناتيجەسى سانالادى.

    مۇگەدەكتەردىڭ مەملەكەتتىك كوركەمونەر بايقاۋى 4 جىلدا ءبىر كەزەك وتكىزىلەدى. بيىل بايقاۋعا جيىنى 1300دەن استام ونەرپاز قاتىناسىپ، 107 ءنومىر ورىندادى، كوركەمونەر بايقاۋى شىعىس جانە باتىس وڭىرگە ءبولىندى. باتىس وڭىردەگى بايقاۋ 17 - تامىزدان 24 - تامىزعا دەيىن چۇڭچيڭ قالاسىندا وتكىزىلدى، بۇعان جياڭشي، حۋبەي، حۋنان، شانشي، گانسۋ، شينجياڭ سياقتى 16 ولكە (رايون، قالا) قاتىناستى.

    شينجياڭ مۇگەدەكتەر كوركەمونەر ۇيىرمەسىنىڭ 43 ونەرپازى شينجياڭنىڭ جەر - جەرىنەن كەلگەن، كوپ ۇلتتان قۇرالعان، ولاردىڭ اراسىنداعى جاسى ەڭ ۇلكەنى 75 جاستاعى تۇردى قادىر ياركەن اۋدانى جاعا ارىق اۋىلى ساي وستەڭ قىستاعىنان كەلگەن، ول قاتىناسقان توپتىق ءبي «ناۋا مۇقامى» وسى كەزەكتى كوركەمونەر بايقاۋىندا 1 - دارەجەلى سيلىققا يە بولدى. «بۇل مەنىڭ مەملەكەتتىك كوركەمونەر بايقاۋىنا تۇڭعىش قاتىناسۋىم، قاتتى اسەرلەندىم. پارتيا مەن ۇكىمەتتىڭ بىزگە وسىنداي تۇعىر ازىرلەپ، مۇگەدەكتەردىڭ ءوز دارىنىن ايگىلەۋىنە مۇمكىندىك بەرگەنىنە العىس ايتامىن»، - دەدى قاريا.

    سامتۋر (گۋجىڭ) شەرتۋمەن اينالىسقانىنا 16 جىل بولعان شۋ يىڭ «جىرلا» اتتى مۋزيكانى ويناپ، 1 - دارەجەلى سيلىققا يە بولدى، دوڭگەلەكتى ورىندىقتا وتىرعان ونىڭ جۇزىنەن شاتتىق لەبى ەسەدى. «ءبىز ۇزبەي سايكەسۋ ارقىلى سامتۋر مەن گيتارانى، داپتى ءوزارا ۇشتاستىرىپ، كلاسسيكالىق مۋزيكا اسپاپتارى مەن ۇلتتىق مۋزيكا اسپاپتارىن بىرلەستىرۋدى سىناق ەتىپ، تىعىز سايكەسۋ ارقىلى تاماشا ناتيجەگە قول جەتكىزدىك»، - دەيدى ول.

    اۆتونوميالى رايوندىق مۇگەدەكتەر بىرلەستىگى پارتيا باسشىلىق گرۋپپاسىنىڭ شۋجيى، بىرلەستىكتىڭ ورىنباسار باسالقاسى جاڭ حاييان بىلاي دەدى: مۇگەدەكتەردىڭ مەملەكەتتىك كوركەمونەر بايقاۋىنىڭ ماقساتى − مۇگەدەكتەردىڭ ءوزى جارىمجان بولسا دا، جىگەرى تاسىعان، ۇمىتكەرلىكپەن العا ۇمتىلعان رۋحاني بەينەسىن ايگىلەۋ بولىپ تابىلادى. شينجياڭنىڭ كوركەمونەر بايقاۋىنا دايىنداعان نومىرلەرى ءداستۇرلى ەلەمەنتتەردى ساقتاۋمەن بىرگە، وسى زامانعى ەلەمەنتتەردى دە قامتىپ، جاڭالىق اشۋ ارقىلى باعالاۋشىلاردىڭ جاقسى باعاسىن الدى. 1 - دارەجەلى سيلىققا يە بولعان نومىرلەر وسىدان كەيىن بەيجيڭدە مەملەكەتتىك كوركەمونەر بايقاۋىنا قاتىناستىرىلادى.

جاۋاپتى رەداكتور:سايراش تۇرارجان قىزى