G7 بەيجيڭ - شينجياڭ جوعارى قارقىندى تاس جولىنىڭ جالپى لەنياسى تۇتاستىرىلدى

    شينجياڭنان ىشكى وڭىرگە تۇتاسقان جوعارى قارقىندى 2 - تاس جول بەيجيڭگە دەيىنگى ارالىقتى 1300 كيلومەتردەن استام قىسقارتتى

    15 - شىلدەدە تۇسىرىلگەن بەيجيڭ - شينجياڭ جوعارى قارقىندى تاس جولى مەن قورعاس - ليانيۇنگاڭ جوعارى قارقىندى تاس جولىن تۇتاستىرعان قۇمىل لوتوجۋانزى ايقاسپالى كوپىرىنىڭ كورىنىسى

    15 - شىلدە ساعات 10نان 45 مينۋت وتكەندە، قۇمىل قالاسىنىڭ لوتوجۋانزى اقى الۋ پۋنكتىنەن جۇك اۆتوكولىكتەرى ءبىرىنىڭ سوڭىنان ءبىرى قاز - قاتار ءتىزىلىپ شىقتى، سول كۇنى G7 بەيجيڭ - شينجياڭ جوعارى قارقىندى تاس جولىنىڭ جالپى لەنياسى تۇتاستىرىلدى، بۇل رايونىمىزدى شىعىستاعى ىشكى ولكەلەرمەن تۇتاستىراتىن جوعارى قارقىندى 2 - تاس جولدىڭ ۇلكەن ارناسىندا جالپى بەتتىك اۆتوكولىك قاتىناعاندىعىن كورسەتەدى. وسى جوعارى قارقىندى تاس جول G30 مەملەكەت جولىمەن سالىستىرعاندا، بەيجيڭ مەن شينجياڭنىڭ ارالىعىن 1300 كيلومەتردەن استام قىسقارتتى.

    G7 بەيجيڭ - شينجياڭ جوعارى قارقىندى تاس جولى بەيجيڭنەن باستالىپ، حىبەي، شانشي، ىشكى موڭعۇل، گانسۋدى باسىپ ءوتىپ، ەڭ سوڭىندا شينجياڭنىڭ ءۇرىمجى قالاسىنا كەلىپ توقتايدى، جالپى ۇزىندىعى مولشەرمەن 2768 كيلومەتر. مۇندا لينحى - بايگىدا بولەگىنىڭ جالپى ۇزىندىعى 930 كيلومەتر، ول ەلىمىزدەگى ارالىعى ەڭ ۇزاق جوعارى قارقىندى تاس جول نىسانى ەسەپتەلەدى، ىشكى موڭعۇلدىڭ باتىس بولەگىندەگى بايىننۇر قالاسى مەن الشا ايماعىنىڭ شەكاراسى ىشىنە ورنالاسقان؛ بايگىدا - ميڭشۇي بولەگىنىڭ جالپى ۇزىندىعى 134 كيلومەتر، گانسۋ ولكەسىنىڭ جيۋچۋان قالاسى سۋبەي اۋدانىنىڭ شەكاراسى ىشىنە ورنالاسقان؛ ميڭشۇي - قۇمىل بولەگىنىڭ جالپى ۇزىندىعى 178 كيلومەتر، شينجياڭنىڭ قۇمىل قالاسىنىڭ شەكاراسى ىشىنە ورنالاسقان.

    بەيجيڭ - شينجياڭ جوعارى قارقىندى تاس جولىنىڭ ميڭشۇي - قۇمىل بولەگى شينجياڭ مەن گانسۋدىڭ شەكاراسىنداعى ميڭشۇيدىڭ ماڭىنان باستالىپ، اقتاۋ باستاۋىن، قوسقۇدىق اۋىلىن، ۋتۇڭ داچۋاندى، جيڭحۋاڭ تاس جولىن، قازبۇلاقتى باسىپ ءوتىپ، قۇمىل قالاسىنىڭ لوتوجۋانزى دەگەن جەرىندە، G30 لەنياسىنىڭ ليانيۇنگاڭ - قورعاس مەملەكەتتىك جوعارى قارقىندى تاس جولىمەن تۇتاسادى. نەگىزىنەن شىعىس پەن باتىستى بەتكە الادى، ساعاتتىق جىلدامدىعى 120 كيلومەتر.

    اۆتونوميالى رايوندىق قاتىناس - تاسىمال مەڭگەرمەسى پارتكومىنىڭ ورىنباسار شۋجيى، مەڭگەرمە باستىعى زۇلفيا ابدىقادىر بىلاي دەدى: بەيجيڭ - شينجياڭ جوعارى قارقىندى تاس جولى − مەملەكەتتىك جوعارى قارقىندى تاس جول تورابىنداعى استانانىڭ ەڭ باتىسىنان باستالاتىن نەگىزگى جول، ەلىمىزدىڭ شىعىس سولتۇستىگىن، سولتۇستىك جۇڭگونى، باتىس سولتۇستىك ءوڭىردى تۇتاستىرىپ، ورتا ازيادان ەۆروپاعا باراتىن تەز قارقىندى تاس جول تاسىمال ارناسىمەن تۇتاسادى. وتە - موتە، ميڭشۇي - قۇمىل جوعارى قارقىندى تاس جولى شينجياڭنىڭ نەگىزگى تاس جول تورابىن كەمەلدەندىرۋ، وڭىرلىك تاس جول تورابىن قالىپتاستىرۋ رولىن اتقارىپ، وتانىمىزدىڭ سولتۇستىك بولەگىنەن شينجياڭعا كىرەتىن ەڭ تەز قارقىندى ۇلكەن ارنا قالىپتاستىرىپ، شينجياڭنىڭ قورعاس شەكارا وتكەلىنەن تيانجين كەمەجايىنا باراتىن سولتۇستىك تەڭىز جاعالاۋىنداعى ەڭ تەز قارقىندى تەڭىزگە شىعۋ جولىن اشىپ، «ءبىر بەلدەۋ، ءبىر جول» قۇرىلىسىن ۇزدىكسىز ىلگەرىلەتۋ جونىنەن كەلەلى ماڭىز الادى.

جاۋاپتى رەداكتور:سايراش تۇرارجان قىزى