جازعى استىق ساتىپ الۋ قىزمەتى ورنالاستىرىلدى

    اداق شايمۇرات ۇلى حابارلايدى. مەملەكەتتىڭ استىققا بەرىلەتىن قوسىمشا قاراجاتتارىنىڭ جىل سايىن جوعارلاۋىنا بايلانىستى، استىق ەگەتىن ەگىنشىلەردە كوبەيە ءتۇستى. ۇستەگى جىلى قۇتىبي اۋدانىنداعى ەگىنشىلەر 280 مىڭ مۋ جەرگە دۇمبە ءبيداي ەگىپ، وتكەن جىلداعىدان 40 مىڭ مۋ ارتتى.

    بۇل اۋدان ەڭ اۋەلى استىق ساتىپ الۋدى جاريا ۇستاپ، ءبيدايعا بەرىلەتىن قوسىمشا قاراجاتتى تۇراقتاندىرىپ، ونى بۇقاراعا اشىق جاريالادى. بيىل ءار كيلوگرام ءبيدايعا 0.30 يۋان قوسىمشا قاراجات بەرىلەدى.

    ءبيدايدىڭ ءار كيلوگرامىن 2.36 يۋاننان ساتىپ الۋدى بەلگىلەپ، وتكەن جىلداعى باعامەن نەگىزىنەن ۇقساس بولعان. سونىمەن ەگىنشىلەر استىقتا بولاتىن دەرت- دەربەزدەردىڭ الدىن الىپ، باعىپ- باسقارۋدى جۇيەلى ىستەگەندىكتەن، 14- شىلدەدەن باستاپ ءبيدايعا وراق قويدى.

    استىق ساتىپ الۋ قىزمەتى باستالۋدان بۇرىن بۇل اۋدان استىق ساتىپ الۋشى قىزمەتكەرلەرىن ارناۋلى تاربيەلەپ، استىق قامبالاردى دەزەنفەكسيالاپ، ورتتەن ساقتانۋ حاۋپسىزدىك اسپاپتارىن تولىقتادى. جانە استىق ساتىپ الۋعا قاجەتتى تارازى، ماشينا جابدىقتارىن تەكسەرىپ جوندەپ، استىقتى دەر كەزىندە ساتىپ الۋدى ورنالاستىردى. سونىمەن بىرگە، ەگىنشىلەردىڭ ءوزى تۇرعان جاقىن جەردەن استىق تاپسىرۋعا مۇمكىندىك جاراتىپ، 24 ساعات قىزمەت وتەۋ ءتۇزىمىن ورناتىپ، ەگىنشىلەرگە اق تالون بەرمەۋگە، مەملەكەت بەلگىلەگەن باعادا ساتىپ الۋعا كەپىلدىك ەتتى. سونداي-اق، جازعى استىق ساتىپ الۋ قىزمەتىن ءساتتى جۇرگىزۋ ءۇشىن اۋىل شارۋاشىلىق ماشينالارىن باسقارۋ مەكەمەسى ەگىس ماشينالارىن ءبىر اي بۇرىن جوندەپ، ءارى سىناق رەتىندە جۇرگىزىپ كورىپ، قاتىناس باسقارۋ تاراۋلارىمەن بىرلەسىپ، ەگىس ماشينالاردىڭ ءنومىر تاقتايشاسى، شوفەرلاردىڭ كۋالىگى سياقتىلاردى تولىق تەكسەرۋدەن وتكىزىپ، حاۋىپسىزدىككە كوڭىل ءبولۋ جونىندە ۇگىت جۇرگىزدى. ءسۇيتىپ بۇل اۋدان ءتۇرلى قىزمەتتەردى ورنالاستىرىپ بولىپ، جازعى استىق ساتىپ الۋعا ساقاداي سايلاندى.

    ءتىلشىنىڭ قىزمەت ورنى:  قۇتىبي اۋدانى تورعايتى قالاشىعى

جاۋاپتى رەداكتور:نۇرجان مينۋار قىزى