«مەملەكەتتىك جاراسىمدى جانۇيانىڭ» جارشىسى


( وچەرىك  )

راحىمەتحان شوناي ۇلى 

    وزىندىك اۋىرتپالىعى بار ءبىر وتباسىنىڭ ىستىعىنا كۇيىپ، سۋىعىنا توڭىپ، ىشكى-سىرتقى شارۋاسىنا بىردەي جۇگىرىپ، ەكى بىردەي قارت پەن ەكى ءسابيىن ۋاعىندا تاماقتاندىرۋمەن بىرگە، جاعا-جەڭدەرىن كىرلەتپەي ەل قاتارىندا باعىپ-قاعىپ، شاڭىراعىنىڭ ون نەشە جىلدان بەرگى بار اۋىرتپالىعىن ارقالاعان اشتى تەرىنىڭ ناتيجەسىندە، 2016-جىلى بۇكىل مەملەكەتتىك ايەلدەر بىرلەسپەسى جاعىنان «مەملەكەت بويىنشا ونەگەلى وتباسى» سىندى جوعارى دارەجەلى داڭق تورىنە كوتەرىلىپ، وزگەلەردىڭ ونەگەسىنە ايلانعان نەگىزگى ساتىداعى جەلەكتىلەرىمىزدىڭ ىشىندەگى جاراسىمدىلىقتىڭ جارشىسى، ۇزدىك پارتيا مۇشەسى، كوكتوعاي اۋدانى قارا بۇلعىن اۋىلى جامىكە قىستاعىنىڭ تۇرعىنى — كوكتەمگۇل نۇردان قىزى.

    كوكتەمگۇل نۇردان قىزى كوكتوعاي اۋدانىنىڭ كۇرتى اۋىلىنا قاراستى دالاۋىز قىستاعىنداعى قاراپايىم وقىتۋشى وتباسىندا تۋىپ بوي جەتتى دە، تولىقسىز ورتا مەكتەپتى تامامداعاننان كەيىن، وتباسىلىق جاعدايىنىڭ سەبەبىنەن جالعاستى وقي الماي وتباسىنىڭ شارۋاسىنا جەگىلدى.

    2002-جىلى ءدام-تۇزدارى جاراسىپ قارابۇلعىن اۋىلى جامىكە قىستاعىنىڭ تۇرعىنى مۇراتپەن نەكەلەنگەن بىرنەشە جىلدان كەيىن، باقىتتى شاڭىراقتارىنىڭ ءتۇتىنىن سۇركەي جەل ايداپ، 2011-جىلى ناۋرىز ايىنىڭ باسىندا، جۇبايى مۇرات 1-جىلدىقتا وقيتىن تۇڭعىش بالالارىن مەكتەپكە اپارىپ ۇيىنە قايتىپ كەلەجاتقان جولىندا، جازاتايىم قاتىناس شىرعالاڭىنان دۇنيە سالادى. ويلاماعان جەردەن شاڭىراعى شايقالىپ، باقىتىنىڭ بازارى تاراعانداي بولعان كوكتەمگۇل جانە ونىڭ جاستارى جەتىپ قارتايعان اتا-ەنەسىنىڭ باستارىنا قايعىنىڭ قارا تۇمانى ءۇيىرىلىپ، جۇزدەرىن قاسىرەت جاسىنا جۋدىرادى. ەكى قارت ۇرپاقتارىنىڭ قىزىعىن كورىپ كوڭىلدى كۇن كەشەر شاقتارىندا سۇيەنەر ۇلدارىنان، كوكتەمگۇل ۇلكەنى 7جاسار، كىشىسىنىڭ تۋىلعانىنا ەندى عانا 6 اي عانا بولعان قوس قۇلىنىن قۇشاقتاپ قۇداي قوسقان قوساعىنان قاپىدا ايىرىلىپ، ەڭىرەگەندە ەتەكتەرى جاسقا تولىپ، كوكتەمگۇلدەن باسقا ەڭبەك قۋاتى جوق ءبىر وتباسى ادامدارى قايعى ارقالاپ، كوكىرەكتەرى قارىس ايىرىلىپ ارىسىنىڭ ارتىندا امالسىز قالا بەرەدى.

    قانشا قايعىرعانمەن قاتال تاعدىردىڭ باسقا سالعانىنا كونبەسكە شارا نە؟ «باسقا تۇسسە باسپاقشىل»،-دەگەندەي، ەڭبەك قۋاتى جوق قايىن اتاسى مەن ەنەسى جانە ەكى كىشكەنتاي بالاسى عانا بار وسى وتباسىنىڭ ەندىگى تىرشىلىگىن جالعاستىرار وزىنەن باسقا ەشكىمنىڭ جوقتىعىن ويلاعان كوكتەمگۇل، كوز جاسىن كولدەتە ءجۇرىپ اۋىرعا ارقاسىن توسەپ، بولماس ىسكە بولاتتاي بەرىك بولۋعا بەلىن بەكىتىپ، تىربىنىپ تىرشلىك قىلدى. اسىرەسە، قايىن اتاسىنىڭ جوعارى قان قىسىم، جۇرەك ناۋقاسى بار، ونىڭ ۇستىنە، قايىن ەنەسىنىڭ قوس جانارى 2003-جىلدان بەرى قاراي سۋ قاراڭعى بولىپ قالعاندىقتان، ول كىسىگە قارايلاسۋدىڭ ءوزى ءبىر ادامنىڭ كۇندەلىكتى قولىن بايلايتىن شارۋا ەدى. العاشىندا قايىن ەنەسى قوس جانارىنىڭ كورمەي قالعانىن قاتتى ۋايىمداپ كۇنى بويى جىلاپ-سىقتاعاندا، كەيبىرەۋلەرشە كەلىنسىنىپ كەكجيمەي، قىزىنداي بولىپ قىزعىشتاي ۇشىپ، اپاسىنىڭ جانى جابىققاندا جاناشىرى بولىپ جانىنان تابىلدى.

جاۋاپتى رەداكتور:سايراش تۇرارجان قىزى