5 – كەزەكتى قازاقستان – جۇڭگو تاۋار كورمەسى وتكىزىلدى

    جۋىردا جۇڭگو ساۋدا مينيسترلىگى مەن شينجياڭ ۇيعۇر اۆتونوميالى رايوندىق ۇكىمەتى، شينجياڭ ءوندىرىس – قۇرىلىس بيڭتۋانى بىرلىكتە ۇيىمداستىرعان 15 – كەزەكتى قازاقستان – جۇڭگو تاۋار كورمەسى قازاقستاننىڭ الماتى قالاسىندا وتكىزىلدى. وسى رەتكى كورمەدە اۋىل شارۋاشىلىق تەحنيكالارى مەن جابدىقتارى، قۇرىلىس ماتەريالدارى مەن ءۇي جيھازدارى، تۇرمىستىق بۇيىمدار مەن ەلەكتروندىق بۇيىمدار سىندى 3 ءتۇرلى ارناۋلى كورمە وتكىزىلىپ، شينجياڭ، گانسۋ، شانشي، جياڭسۋ قاتارلى 10 ولكە، اۆتونوميالى رايون، توتە قاراستى قالاداعى 200دەن استام كاسىپورىننىڭ ون مىڭنان استام ساپالى ونىمدەرى قويىلدى. 8000 شارشى مەترگە جۋىق كورمە زالىندا كورەرمەندەر ءيىن تىرەسىپ، الماتىدا جۇڭگو لەبى ەستى.

    ەلەكتروندىق سىرعىما تاقتاي تاڭداپ جاتقان كارىم ەسىمدى قالا تۇرعىنى تىلشىگە: ەلەكتروندىق سىرعىما تاقتاي الۋ ءۇشىن دوسىمدى ەرتىپ ارنايى كەلدىم، ــ دەدى. ول بىلتىرعى كورمەدە جۇڭگودا وندىرىلگەن ەلەكتروندىق سىرعىما تاقتاي ساتىپ العان ەكەن. ــ كورمە باستالدى دەگەندى ەستىپ، بىرنەشە دوسىمدى ەرتىپ كەلدىم، ولار دا ەلەكتورندىق سىرعىما تاقتاي ساتىپ الماقشى، مەنىڭ سىرعىما تاقتايىم شىنجىندا وندىرىلگەن ەكەن، شياۋمي تەلەفونىمەن ۇقساس. بۇل سىرعىما تاقتايدى ءبىر جىلدان بەرى پايدالانىپ كەلەمىن، ەشقانداي كىلتيپان شىقپادى. شىنجىن كاسىپورىندارى ءونىم ساپاسىنا ءسوزسىز كەپىلدىك ەتەدى، - دەيدى.

    كورمەدە كارىم سياقتى تۇراقتى قاريدارلار وتە كوپ بولدى. كيىم تاڭداپ جاتقان گۇلنار دا جىلداعىداي ەرتەمەن كورمەگە كەلگەن ەكەن، ول: جۇڭگونىڭ كيىم – كەشەكتەرىنىڭ ساپاسى جاقسى، جايلى، ۇلگىسى وسىزامانعا ساي كەلەدى، باعاسى دا قىمبات ەمەس، - دەيدى. ول تىلشىگە جىل سايىن وسى كورمەگە كەلەتىنىن، جۇڭگونىڭ شاي ونىمدەرىن، كيىم – كەشەكتەرىن، شاعىن ءۇي ەلەكتر جابدىقتارىن، سيفرلى ونىمدەرىن ۇناتاتىنىن، جىل سايىن كوپ نارسە ساتىپ الاتىنىن ايتتى.

جاۋاپتى رەداكتور:نۇرجان مينۋار قىزى