شي جينپيڭ حات جولداپ، جۇڭگو قوعامدىق عىلىمدار اكادەمياسى قۇرىلعاندىعىنىڭ 40 جىلدىعىن قۇتتىقتادى

    شينحۋا اگەنتتىگىنىڭ 17 - مامىردا بەيجيڭنەن بەرگەن حابارى. ج ك پ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 17 - مامىردا حات جولداپ، جۇڭگو قوعامدىق عىلىمدار اكادەمياسى قۇرىلعاندىعىنىڭ 40 جىلدىعىن قۇتتىقتاپ، بۇكىل ەلدەگى فيلوسوفيا جانە قوعامدىق عىلىم قىزمەتكەرلەرىنە ىقىلاستى سالەم جولدادى.

    شي جينپيڭ قۇتتىقتاۋ حاتىندا بىلاي دەپ اتاپ كورسەتتى: 40 جىلدان بەرى پارتيانىڭ باسشىلىعىندا، جۇڭگو قوعامدىق عىلىمدار اكادەمياسى داۋىرمەن بىرگە دامىپ، حالىقپەن بىرگە تالپىنىپ، ماركسيزم نازارياسىنىڭ شەبىن قۇلشىنا قۇرىپ، پارتيا مەن مەملەكەتتىڭ شەشىم جاساۋىنا قىزمەت كورسەتۋ سىندى يدەيا قامباسىندىق رول اتقارىپ، جەتىستىكتەر شىعارىپ، دارىندىلار تاربيەلەپ، ماركسيزمنىڭ جۇڭگولانۋىن ىلگەرىلەتۋگە، ەلىمىزدىڭ فيلوسوفيا، قوعامدىق عىلىمدارىنىڭ گۇلدەنىپ دامۋىنا ماڭىزدى ۇلەستەر قوسىپ كەلدى.

    شي جينپيڭ بىلاي دەپ باسا دارىپتەدى: جۇڭگوشا سوتسياليزمگە تاباندى بولۋ جانە ونى دامىتۋ نازاريا مەن اماليات سىندى ەكى جاقتى ىزدەنۋدەن تۋىنداعان. جۇڭگو قوعامدىق عىلىمدار اكادەمياسىنداعى جولداستار مەن فيلوسوفيا، قوعامدىق عىلىم قىزمەتكەرلەرىنەن جۇڭگوشا سوتسياليزمگە تاباندى بولۋدى جانە ونى دامىتۋدى مىقتاپ ارقاۋ ەتىپ، ماركسيزمنىڭ جەتەكشىلىك ورنىنان جازباي، «بارشا گۇل شەشەك اتسىن، جالپى جارىسا ءۇن قاتسىن» باعىتىن دايەكتىلەندىرىپ، حالىق ءۇشىن ءبىلىم قۋۋ ۇستانىمىنا تاباندى بولىپ، ەلىمىزدىڭ رەفورما، دامۋ، ورنىقتىلىق ىستەرىنىڭ ماڭىزدى نازاريالارى مەن امالياتتىق ماسەلەلەرىن زەرتتەۋدى نەگىزگى قامال الۋ باعىتى ەتىپ، زامانا كوشىنىڭ باسىندا ءجۇرىپ، بۇرىنعى جانە بۇگىنگى وزگەرىستەردى قانىق ءبىلىپ، يدەولوگيانىڭ العاشقى دابىلىن قاعىپ، جۇڭگونىڭ عىلمي ىستەرىن گۇلدەندىرىپ، جۇڭگو نازارياسىن دامىتىپ، جۇڭگو يدەياسىن تاراتىپ، 21 - عاسىرداعى ماركسيزم مەن قازىرگى جۇڭگونىڭ ماركسيزمىن دامىتۋعا قۇلشىنىپ، جۇڭگوشا فيلوسوفيا جانە قوعامدىق عىلىم جۇيەسىن، عىلىم جۇيەسىن، ءسوز جۇيەسىن قالىپتاستىرىپ، ەلىمىزدىڭ فيلوسوفيالىق، قوعامدىق عىلىمىنىڭ حالىقارالىق ىقپالىن ارتتىرۋعا ءتىپتى زور، تىڭ ۇلەستەر قوسۋىن ءۇمىت ەتەمىن.

    جۇڭگو قوعامدىق عىلىمدار اكادەمياسى قۇرىلعاندىعىنىڭ 40 جىلدىعىن قۇتتىقتاۋ جينالىسى 17 - مامىر تۇستەن كەيىن بەيجيڭدە ءوتتى. ج ك پ ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى ليۋ ياندۇڭ جينالىستا شي جينپيڭنىڭ قۇتتىقتاۋ حاتىن وقىدى.

    ج ك پ ورتالىق كوميتەتى ساياسي بيۋروسىنىڭ مۇشەسى، ورتالىق ۇگىت ءبولىمىنىڭ باستىعى ليۋ چيباۋ جينالىسقا قاتىناستى ءارى ءسوز سويلەپ بىلاي دەدى: باس شۋجي شي جينپيڭنىڭ فيلوسوفيا جانە قوعامدىق عىلىمدار قىزمەتى جونىندەگى اڭگىمە ماجىلىسىندە سويلەگەن ماڭىزدى ءسوزىنىڭ رۋحى مەن قۇتتىقتاۋ حاتىندا ورتاعا قويعان تالاپتارىن مۇقيات ۇيرەنىپ، دايەكتىلەندىرىپ، پارتيا ورتالىق كوميتەتىنىڭ جۇڭگوشا فيلوسوفيا جانە قوعامدىق عىلىم جۇيەسىن جەدەل قالىپتاستىرۋ جونىندەگى پىكىرىن دايەكتىلەندىرىپ، تياناقتاندىرىپ، ماركسيزمدى جەتەكشى ەتۋدەن باستان - اياق اۋىتقىماي، قازىرگى جۇڭگو ماركسيزمىنىڭ ەڭ جاڭا جەتىستىكتەرىن ۇيرەنۋدى، زەرتتەۋدى، ءتۇسىندىرۋدى ءتۇيىننىڭ ءتۇيىنى ەتىپ، كەلەلى نازاريالار مەن رەال ماسەلەلەردى نەگىزگى قامال الۋ باعىتى ەتىپ، باسىمدىقتاردى شوعىرلاندىرىپ، دامۋعا جاڭالىق ەنگىزىپ، اناعۇرلىم جاقسى جەتىستىكتەر شىعارىپ، دارىندى تاربيەلەپ، فيلوسوفيا جانە قوعامدىق عىلىمداردى ۇزبەي گۇلدەندىرىپ، دامىتۋ كەرەك.

جاۋاپتى رەداكتور:سايراش تۇرارجان قىزى