شي جينپيڭ كامبودجانىڭ باس ءۋازىرى كەزدەستى

    شينحۋا اگەنتتىگىنىڭ 17 - مامىردا بەيجيڭنەن بەرگەن حابارى. مەملەكەت ءتوراعاسى شي جينپيڭ 17 - مامىردا دياۋيۇيتاي قوناق ۇيىندە كامبودجانىڭ باس ءۋازىرى حۇڭسىنمەن كەزدەستى.

    شي جينپيڭ حۇڭسىننىڭ جۇڭگوعا رەسمي ساپارلاي كەلگەندىگىن، سونداي - اق «ءبىر بەلدەۋ، ءبىر جول» حالىقارالىق سەلبەستىك جوعارى دارەجەلى باسشىلار تالقى مىنبەرىنە قاتىناسقاندىعىن قارسى الدى. شي جينپيڭ مىنانى اتاپ كورسەتتى: جۇڭگو - كامبودجا بايلانىسىنىڭ دامۋ جاعدايى جاقسى. جۇڭگو كامبودجامەن بايلانىستى دامىتۋعا وسكەلەڭ تۇرعىدان ءمان بەرەدى، كامبودجامەن بىرگە جۇڭگو - كامبودجا دوستىق ىستەرىن مىزعىماي ىلگەرىلەتىپ، جان - جاقتى ستراتەگيالىق سەلبەستىكتى تەرەڭدەتىپ، ەكى ەل حالقى ءۇشىن يگىلىك جاساپ، وڭىرلەردىڭ بەيبىتشىلىگى مەن كوركەيىپ - گۇلدەنۋىنە مۇنان دا زور ەسە قوسۋدى قالايدى.

    شي جينپيڭ مىنانى باسا دارىپتەدى: كەلەر جىل − جۇڭگو مەن كامبودجانىڭ ديپلوماتيالىق قاتىناس ورناتقاندىعىنىڭ 60 جىلدىعى. ەكى ەل ديپلوماتيالىق قاتىناس ورناتقاندىعىنىڭ 60 جىلدىعىن وراي ەتىپ، جۇڭگو - كامبودجا بايلانىسىنىڭ ورنىقتى، باياندى، ءتىپتى دە جاقسى دامۋىن جەبەۋى كەرەك. ءبىز جوعارى جىكتەگىلەر كەزدەسۋىنىڭ ەكى جاقتىلى قاتىناستاعى جەتەكشىلىك رولىن ساۋلەلەندىرىپ، ەل باسقارۋ جاعىندا اۋىس - كۇيىس جاساۋدى كۇشەيتۋىمىز كەرەك. ناقتى سەلبەستىكتى تەرەڭدەتىپ، «ءبىر بەلدەۋ، ءبىر جول» قۇرىلىسىن ىلگەرىلەتۋ سەلبەستىك جوبا پروگرامماسىن ويداعىداي تياناقتاندىرىپ، ءوندىرىس قۋاتى مەن قارجى قوسۋ ءتۇيىندى سەلبەستىك نىساندارىن ويداعىداي يگەرۋىمىز قاجەت. ەكونوميكا - ساۋدا سەلبەستىك كولەمى مەن دەڭگەيىن جوعارىلاتىپ، سەلبەستىك نىساندارىنا قاتىستى قۇرىلىستاردى ويداعىداي اتقارۋىمىز كەرەك. زاڭ اتقارۋ، حاۋىپسىزدىك، لاڭكەستىككە قارسى تۇرۋ، ينتەرنەت قىلمىسىنا سوققى بەرۋ، شەكارا سىرتىندا قۋعىنداۋ سياقتى سالالارداعى سەلبەستىكتى كۇشەيتىپ، ساياحات، مادەنيەت، وقۋ - اعارتۋ، جاستار سياقتى قوعامدىق، گۋمانيتارلىق اۋىس - كۇيىس ءورىسىن كەڭەيتۋىمىز كەرەك. جۇڭگو كامبودجانىڭ حالىقارالىق جانە وڭىرلىك ىستەردە مۇنان دا زور رول اتقارۋىن قولدايدى، كامبودجانىڭ لانساڭجياڭ - مەكونگ سەلبەستىگىندە ءتوراعا ەل مىندەتىن جاقسى وتەۋىن قولدايدى.

    حۇڭسىن بىلاي دەدى: كامبودجا كەزىندە سىحانوك پاتشا بەلگىلەگەن جۇڭگومەن دوس بولۋ ساياساتىن تاباندىلىقپەن اتقارىپ كەلدى. جۇڭگونىڭ ۇزاق ۋاقىتتان بەرى تاباندىلىقپەن قولداپ، بارىنشا كومەك كورسەتكەندىگىنە العىس ايتادى، جۇڭگومەن بىرگە ءداستۇرلى دوستىقتى بەكەمدەپ، كامبودجا مەن جۇڭگونىڭ جان - جاقتى ستراتەگيالىق سەلبەستىك سەرىكتەستىك قاتىناسىندا مۇنان دا زور دامۋعا قول جەتكىزۋدى قالايدى. تاراپتار ءبىر - ءبىرىنىڭ دامۋى مەن قاداعالاپ وتىرعان كەلەلى ماسەلەلەرىندە باستان - اياق ءوزارا ءتۇسىنىسىپ جانە قولداۋ كورسەتىپ، ەكونوميكا - ساۋدا، دامۋ، كەدەيلەر سانىن ازايتۋ، دەنساۋلىق ساقتاۋ، حاۋىپسىزدىك، ەل اتتاعان قىلمىستىق ارەكەتتەرگە سوققى بەرۋ سياقتى سالالارداعى ناقتى سەلبەسۋ ءورىسىن كەڭەيتىپ، حالىقارالىق جانە وڭىرلىك ىستەردە بايلانىس جاساۋدى، سايكەسۋدى كۇشەيتۋ كەرەك. كامبودجا تاراپتاردىڭ كەلەر جىلى كامبودجا مەن جۇڭگو ديپلوماتيالىق قاتىناس ورناتقاندىعىنىڭ 60 جىلدىعىن اتاپ ءوتۋ قيمىلىن بىرگە ويداعىداي وتكىزۋىن قۇپتايدى.

    ۋاڭ حۋنيڭ، لي جانشۋ، ياڭ چيەچى قاتارلىلار كەزدەسۋدە بىرگە بولدى.

جاۋاپتى رەداكتور:سايراش تۇرارجان قىزى