التىن وردەندى ونەرلى ورەن--- امان

ىنتىماق داۋلەتباي ۇلى
 
 

    ۇلاعاتتى ۇستازدارىنىڭ ويعا ٴورىس، بويعا دارىن سيلار ونەگەسى مەن ٴتالىم-تاربيەسىن جاستايىنان كوكەيىنە ۇيالاتىپ، جۇرەك تۇكپىرىنە ساقتاپ، اڭعارلى اكە مەن قورمال انانىڭ ٴار كۇنگى داستارقان ۇستىندە، وتباسىندا تەرەڭنەن تولعاپ، مايىن تامىزا ايتاتىن ساپ التىنداي اسىل اقىليالارىن، اقىل-كەڭەستەرىن ەسىنە بەرىك ۇستاپ، سان ونەردىڭ قىرى مەن سىرىن يگەرىپ، ٴبىلىمنىڭ ورىنە تىنباي ورلەۋدى ٴومىر جولىنىڭ سارقىلماس ازىعى دەپ بىلەتىن جەتەلى ۇرپاق، ونەگەلى ورەندەرىمىز قانشالىق دەسەڭىزشى؟!

    قازاقتىڭ قاراپايىم قارا قوسىندا تۋىلىپ ، ەگىز ونەردىڭ قوس تىزگىنىن قاتار ۇستاپ، قاتارلاستارىنان وزا شاۋىپ، اتاعى اۋىلدان استاناعا، ونان ارى حالىقاراعا دەيىن جەتكەن، ساۋساعى سىزباعا، اياعى فۋتبولعا ەپتى ارى سىزۋشى، ارى فۋتبولشى بولىپ تانىلعان ماقتان تۇتار التىن وردەندى ورەنىمىزدىڭ ٴبىرى--- بۋرىلتوعاي اۋداندىق 1-تولىق ورتا مەكتەبى 3-جىلدىق 3-كلاسنىڭ وقۋشىسى امان زاۋپان قىزى ەدى.

    امان 1999-جىلدىڭ ٴساۋىر ايىندا بۋرىلتوعاي اۋدانىنىڭ بوزتال قىستاعىنداعى قاراپايىم مالشى وتباسىندا ٴومىر ەسىگىن اشادى. قارشادايىنان ويى سەرگەك، ونەر-بىلىمگە قۇشتار وسكەن ول ٴسابي كەزىنەن باستاپ-اق اعا-اپەكەلەرىنىڭ قاعاز-قارىنداشىنا جارماسىپ، دولبار سىزبالارىن سىزىپ، رەتسىز جازۋلاردى جازا ٴجۇرىپ-اق سىزۋ اتتى قاتپارى قالىڭ، قالتارىسى كوپ وسى ونەرگە بىردەن قۇلاي بەرىلىپ، انا مەكتەپ تابالدىرىعىن اتتاعاننان-اق ۇستازدارىنىڭ نازارىن وزىنە اۋدارىپ، بولاشاعىنان ۇلكەن ۇمىتتىڭ ۇشقىنىن بايقاتادى.

    ول باستاۋىشتىڭ 2-جىلدىعىن وقىپ جۇرگەن 2006-جىلدىڭ ماۋسىم ايىندا بۇكىل مەملەكەتتىك وسپىرىمدەردىڭ «لۇڭرىن ساۋىتى» اتىنداعى ناق مايدان حاتكەرلىك-سۋرەت سىزۋ جارىسىنا قاتىناسىپ، تۇساۋ كەسەر تۇڭعىش تۋىندىسى مىس مەدالعا يە بولىپ تالابى تاسقىنداي تۇسەدى. وسىدان كەيىن 2008-جىلى بۇكىل مەملەكەتتىڭ بەيجيڭ وليمپاداسىن قارسى الۋ تاقىرىبىنداعى وقۋ-اعارتۋ مينيستىرلىگى مەن كوركەمونەر تاربيە كوميتەتىنىڭ بىرلەسىپ وتكىزگەن مەملەكەتتىك سىزبا سىزۋ جارىسىندا توپ جارىپ 1-دارەجەلى سيلىقتى ەنشىلەپ، انا مەكتەبىنە، تۋعان ەلىنە ۇلكەن ابىروي اپەرەدى.

    قالامى بارعان سايىن قارىمدانىپ، ىلگەرى باسقان ٴار قادامى تابىستىڭ تورىنەن كورىنىپ وتىرعان ٴورشىل ورەنىمىز وسى جىلدىڭ سوڭىن الا وتكىزىلگەن وسپىرىمدەردىڭ «بەرەكە-بىرلىك ساۋىتى» اتىنداعى كانادا دا وتكىزىلگەن الەمدىك جارىسىنا توراپ ارقىلى جولداعان ەكى بىردەي تۋىندىسى كومبەگە قاتار جەتەتىن بالاگەر-سالاگەردەي كۇمىس جانە مىس مەدالدى ەنشىلەپ، موينىنا دۇنيەلىك ورەدەگى ورەلى وردەن تاققان بىردەن ٴبىر ۇلىڭگىر ۇلانىنا اينالادى.

جاۋاپتى رەداكتور:نۇرجان مينۋار قىزى