وقۋشىلاردىڭ زەرتتەۋ تاقىرىبى بويىنشا ونەر كورسەتۋ باسەكەسى وتكىزىلدى


    ىنتىماق داۋلەتباي ۇلى، ادال ۋاپا ۇلى حابارلايدى. بۋرىلتوعاي اۋداندىق 1-تولىق ورتا مەكتەبى 13-مامىر كۇنى تۇستەن كەيىن جارىم كۇن ۋاقىتپەن تولىق ورتا 2-جىلدىق ۇلتتىق وقۋشىلارىنىڭ وتكەن وقۋ ماۋسىمىنداعى زەرتتەۋ تاقىرىپتارى بويىنشا ونەر كورسەتۋ، تاقىرىپتى اشۋ باسەكە قيمىلىن وتكىزدى.

    زەرتتەۋ سيپاتىنداعى ۇيرەنۋ جاڭا ساباق رەفورماسى مەن ساپا اعارتۋىنىڭ ماڭىزدى قۇرامداس بولەگى بولىپ، ول وقۋشىلاردان قوعامدىق ورتاداعى ماسەلەلەر جونىندە ماتەريال جيناپ، ماسەلەنىڭ ٴتۇپ قاينارىن اشىپ، ونى شەشۋ جونىندە تىڭ كوزقاراس، سونى ادىستەردى ورتاعا قويۋدى تالاپ ەتەتىن جاسامپازدىق سيپاتىنداعى ۇيرەنۋ بولىپ، ول وقۋشىلاردىڭ دەربەس وي جۇگىرتۋ، بايقاۋ، باقىلاۋ، سىناقتان وتكىزۋ، تاجىريبە جاساۋ قابىلەتىن جەتىلدىرەتىن، جاسامپازدىق جاراتۋ رۋحىن ساۋلەلەندىرەتىن ۇيرەنۋ فورماسى بولىپ تابىلادى.

    ٴبىر وقۋ ماۋسىمىندا ٴبىر رەت تاپسىرماعا بەرىلىپ، ٴبىر رەت ناتيجەسى قورتىندىلاناتىن بۇل تۇردەگى ۇيرەنۋدىڭ وتكەن وقۋ ماۋسىمىنداعى تاقىرىپتى اشۋ قيمىلى وسى رەت ونەر باسەكەسى تۇرىندە وتكىزىلدى.

    قيمىلعا تولىق ورتا 2-جىلدىعىنداعى قوس ٴتىل كلاستارى مەن ۇلتتىق كلاستاردان جيىنى 5 ٴتۇرلى تاقىرىپ ۇستىندە زەرتتەۋ جۇرگىزىلىپ، ونەر كورسەتىلدى. «اقتان ارتىق اس بولماس»، «قازاق حالقىنىڭ اس-سۋ مادەنيەتى تۋرالى ىزدەنىس»، «قۇستاردى ايالايىق اعايىن»، «اتا مۇرا - اق بەسىك»، «زالالدى ىشپەك-جەمەكتىكتەردى الاستاۋعا ات سالىسايىق» قاتارلى تاقىرىپتار جونىندە جۇرگىزىلگەن زەرتتەۋلەردە وقۋشىلار قوعامدىق، جاراتىلىستان ورتادان يەلەگەن جاندى ماتەريالدارى، كەسكىن تاسپالارى، موددەل- سىزبالارى، قاتىستى مامانداردارمەن بولعان سۇحبات ەستەلىكتەرى، ناقتىلى ساندىق مالىمەتتەردى كورسەتە وتىرىپ، ونى قىزىقتى دا تارتىمدى، يلانىمدىلىعى كۇشتى بولعان ارەكەتتەرى ارقىلى مايداندا اسەرلى بەينەلەپ، تاقىرىپتىڭ ٴساتتى اشىلۋىنا كەپىلدىك ەتتى.

    كەي تاقىرىپتاردى اشۋدا كومەديا، ٴان، بەسىك جىرى، تەرمە ورىنداۋ ارقىلى ساحىنانى دۋمانعا بولەۋمەن بىرگە بالقايماق، جەنت سياقتى قازاقي تاعامداردى وقۋشىلار مايداندا وزدەرى جاساپ، ٴدامىن تاتىرىپ ۇلگىردى.

    قىزعىلىقتى دا اسەرلى ونەر باسەكەسى مارەسىنە جەتكەندە 2-جىلدىق 4-كلاسى 1-دارەجەلى بولسا، 1-،5-كلاستار 2-دارەجەلى، 2-،3-كلاستار 3-دارەجەلى سيلىقتاردى قانجىعالارىنا بايلاپ، كورەرمەن كوپتىڭ وسكەلەڭ قۇرمەتىنە بولەندى.

    بۇل رەتكى ونەر كورسەتۋ قيمىلى وقۋشىلاردىڭ ماسەلەلەردى تەكسەرىپ- زەرتتەۋگە بولعان باتىلدىعىن جەبەپ، جاسامپازدىق جاراتۋ سەنىمدەرىن بەكەمدەپ، دەربەس ىزدەنىس جاساۋ رۋحىنا دەم بەردى.


تىلشىلەردىڭ قىزمەت ورنى: بۋرىلتوعاي اۋداندىق –تولىق ورتا مەكتەبى

جاۋاپتى رەداكتور:نۇرجان مينۋار قىزى