شي جينپيڭ وزبەكستاننىڭ زۇڭتۇڭىمەن كەڭەس وتكىزدى

    شينحۋا اگەنتتىگىنىڭ 12 - مامىردا بەيجيڭنەن بەرگەن حابارى. مەملەكەت ءتوراعاسى شي جينپيڭ 12 - مامىردا حالىق سارايىندا وزبەكستاننىڭ زۇڭتۇڭى ميرزيايەۆپەن كەڭەس وتكىزدى. ەكى ەل باسشىسى جۇڭگو مەن وزبەكستاننىڭ ۇرپاقتان - ۇرپاققا جالعاسقان دوستىق رۋحىن ساۋلەلەندىرىپ، جۇڭگو مەن وزبەكستان قارىم - قاتىناسىنىڭ بۇرىنعىعا مۇراگەر، كەيىنگىگە بۇيداگەر بولۋىن ىلگەرىلەتىپ، ەكى ەل حالقىنا ءتىپتى جاقسى يگىلىكتەر جەتكىزۋدى ءبىر اۋىزدان ماقۇلداستى.

    شي جينپيڭ مىنالاردى اتاپ كورسەتتى: وزبەكستان − جۇڭگونىڭ جاقىن، ماڭىزدى كورشىسى. ديپلوماتيالىق بايلانىس ورناتقان 25 جىلدان بەرى، ەكى جاقتىڭ تەڭ قۇلشىنۋىمەن جۇڭگو مەن وزبەكستاننىڭ قارىم - قاتىناسى سەكىرمەلى دامۋدى ىسكە اسىرىپ، شىنايى، ءوزارا سەنىمدى جانە ءوزارا ءتيىمدى جاپپاي ستراتەگيالىق سەرىكتەستىك قاتىناس ورنادى. قازىر ەكى ەلدىڭ جوعارى دەڭگەيلى بايلانىسى تىعىز، ساياسي ءوزارا سەنىمى بەرىك. ەكى جاقتىڭ «ءبىر بەلدەۋ، ءبىر جول» اياسىندا تىعىز سەلبەسىپ، ءبىر قاتار ءىرى سەلبەستىك نىسانىن اتقارۋى ەكى ەل حالقىنا ناقتى يگىلىكتەر الا كەلدى. جۇڭگو وزبەكستانمەن امبەباپ رايلى دوستىقتى دامىتۋعا كۇش سالادى. ەكى جاق ءبىر - ءبىرىنىڭ وزەكتى مۇددەسى مەن ماڭىزدى كوڭىل ءبولىپ وتىرعان قاتىستى ماسەلەلەردە ءوزارا قولداۋ كورسەتىپ، ساياسي جانە ستراتەگيالىق ءوزارا سەنىمدى ۇزدىكسىز بەكەمدەپ جانە تەرەڭدەتىپ، ەكى جاقتى قاتىناستىڭ ەكى ەلدىڭ بىرگە دامىپ - گۇلدەنۋىنە ءتىپتى جاقسى دەم بەرۋىنە مۇمكىندىك تۋدىرۋ كەرەك. جۇڭگو وزبەكستانمەن حالىقارالىق ىستەر، ورتا ازيا ءوڭىرى جاعدايى، شاڭحاي سەلبەستىك ۇيىمىنىڭ دامۋى، ت.ب جونىندە تىعىز بايلانىس پەن سايكەستىكتى ساقتاۋدى قالايدى.

    شي جينپيڭ مىنالاردى باسا دارىپتەدى: وزبەكستان − «ءبىر بەلدەۋ، ءبىر جول» قۇرىلىسىنا ەڭ العاش قولداۋ كورسەتكەن جانە ات سالىسقان مەملەكەت. جۇڭگو مەن وزبەكستان «ءبىر بەلدەۋ، ءبىر جول» قۇرىلىسىنىڭ سەلبەستىگىندە مول تابىستارعا جەتتى، بۇل ەكى ەل سەلبەستىگىنە باعدار كورسەتكەن نەگىزگى جەلىگە اينالدى. جۇڭگو جاق وزبەكستان جاقپەن مۇمكىندىكتەردى اشىققا شىعارىپ، جۇڭگو مەن وزبەكستاننىڭ «ءبىر بەلدەۋ، ءبىر جول» قۇرىلىسى سەلبەستىگىنىڭ تىڭ ىلگەرىلەۋشىلىكتەرگە جەتۋىن جەبەۋدى قالايدى. ەكى جاق دامۋ ستراتەگيالارىن ۇشتاستىرۋدى كۇشەيتىپ، ەكى ەل سەلبەستىگىنىڭ ەلەۋلى باعىتتارىن، ەلەۋلى سالالارىن، ەلەۋلى نىساندارىن بىرلەسىپ جاقسى جوبالاۋى قاجەت. ەكونوميكا - ساۋدا سەلبەستىگىنىڭ مۇمكىندىكتەرىن تولىق جاڭعىرتىپ، ەكى جاقتى ساۋدانىڭ كولەمىن كەڭەيتىپ، ساۋدا قۇرىلىمىن ساپالىلاندىرىپ، ەكى جاقتى ساۋدانىڭ ۇزاق ۋاقىت ورنىقتى، اقاۋسىز دامۋىن ىسكە اسىرۋى كەرەك. جۇڭگو تەڭدىك، ەرىكتىلىك، ءوزارا تيىمدىلىك نەگىزىندە، وزبەكستانمەن ءوندىرىس قۋاتى، قارجى سالۋ، ونەركاسىپ باقشاسى جانە نەگىزدىك قۇرىلعىلار قۇرىلىسى بويىنشا سەلبەستىكتەردى قانات جايدىرۋدى قالايدى. ميرزيايەۆ مىنالاردى ءبىلدىردى: جۇڭگو − وزبەكستاننىڭ ۇلى كورشىسى، جۇڭگونىڭ ەكونوميكالىق، قوعامدىق دامۋدا قول جەتكىزگەن جەتىستىكتەرى الەم جۇرتىن تاڭداي قاقتىرىپ وتىر. قازىرگى حالىقارالىق جاعدايدا، جۇڭگو الەمنىڭ بەيبىت، تۇراقتى دامۋىن ىلگەرىلەتكەن ەرەكشە ماڭىزدى، بەلسەندى فاكتور بولىپ وتىر. وزبەكستاننىڭ ءوز ەلىنىڭ جاعدايىنا ۇيلەسەتىن دامۋ جولىن تاڭداعانىنا جۇڭگونىڭ قولداۋ كورسەتكەنىنە العىس ايتامىز، وزبەكستان ءبىر جۇڭگو ساياساتىنا اۋىتقىماستان تاباندى بولادى، جۇڭگونىڭ ءوز مۇددەسىن جانە ماڭىزدى كوڭىل ءبولىپ وتىرعان تۇيىندەردى قورعاۋىنا قولداۋ كورسەتەدى، جۇڭگونىڭ «ءۇش ءتۇرلى كۇشكە» سوققى بەرۋ جاعىنداعى ۇستانىمىنا قولداۋ كورسەتەدى. وزبەكستان وزبەكستان مەن جۇڭگونىڭ جاپپاي ستراتەگيالىق سەرىكتەستىك قاتىناسىن بەكەمدەپ جانە دامىتىپ، ەكى ەلدىڭ جوعارى دەڭگەيلى بايلانىسىن نىعايتىپ، «ءبىر بەلدەۋ، ءبىر جول» قۇرىلىسىن ۇتىمدى وراي ەتىپ، ەكونوميكا، ساۋدا، قارجى سالۋ، ءوندىرىس قۋاتى، نەگىزدىك قۇرىلعى، سۋ ىستەرى سياقتى سالالارداعى سەلبەستىكتەر مەن جەرگىلىكتى جانە گۋمانيتارلىق بارىس - كەلىستەردى تەرەڭدەتىپ، ب م ۇ، شاڭحاي سەلبەستىك ۇيىمى سياقتى كوپ جاقتى تۇعىرلار اياسىندا سايكەستىك پەن سەلبەستىكتى كۇشەيتۋگە تالپىنادى.

    كەڭەستەن كەيىن، ەكى ەل باسشىسى «جۇڭحۋا حالىق رەسپۋبليكاسى مەن وزبەكستان رەسپۋبليكاسىنىڭ بىرلەسكەن مالىمدەمەسىنە» قول قويدى ءارى ەكى ەلدىڭ ەكونوميكا، تەحنيكا، قاتىناس تاسىمالى، ەمدەۋ، اۋىل شارۋاشىلىعى، سۋ ەلەكتر، ورتا، شاعىن كاسىپورىندار، نەگىزدىك قۇرىلعىلار، ساياحات جانە جەرگىلىكتى بارىس - كەلىس سياقتى سالالار بويىنشا ەكى جاقتى سەلبەستىك حۇجاتتارىنىڭ قول قويىلۋىنا كۋا بولدى. كەڭەستەن بۇرىن، شي جينپيڭ حالىق سارايىنىڭ شىعىس زالىنىڭ سىرتىنداعى الاڭدا ميرزيايەۆتى قارسى الۋ سالتىن وتكىزدى. پىڭ لييۋان، ۋاڭ حۋنيڭ، لي جانشۋ، مەملەكەتتىك حالىق قۇرىلتايى تۇراقتى كوميتەتىنىڭ ورىنباسار مەڭگەرۋشىسى ۋاڭ چىن، ياڭ جيەچى، مەملەكەتتىك ساياسي كەڭەستىڭ ورىنباسار ءتوراعاسى جاڭ چيڭلي قاتارلى باسشىلار سالتقا قاتىناستى.

جاۋاپتى رەداكتور:سايراش تۇرارجان قىزى