شي جينپيڭ قازاقستاننىڭ زۇڭتۇڭى نازاربايەۆپەن كەزدەستى

    شينحۋا اگەنتتىگىنىڭ 14 - مامىردا بەيجيڭنەن بەرگەن حابارى. مەملەكەت ءتوراعاسى شي جينپيڭ 14 - مامىردا حالىق سارايىندا «ءبىر بەلدەۋ، ءبىر جول» حالىقارالىق سەلبەستىك جوعارى دارەجەلى باسشىلار تالقى مىنبەرىنە قاتىناسۋ ءۇشىن جۇڭگوعا كەلگەن قازاقستاننىڭ زۇڭتۇڭى نازاربايەۆپەن كەزدەستى.

    شي جينپيڭ بىلاي دەپ اتاپ كورسەتتى: جۇڭگو - قازاقستان ديپلوماتيالىق قارىم - قاتىناس ورناتقان 25 جىلدان بەرى، ەكى ەل قاتىناسى جەدەل دامىپ كەلەدى. تاراپتاردىڭ جوعارى جىكتەگىلەرىنىڭ قارىم - قاتىناسى جيىلەپ، ساياسيداعى ءوزارا سەنىمى ۇزدىكسىز نىعايىپ، ناقتى ىستەر سەلبەستىگى جاپپاي ىلگەرىلەدى. جۇڭگو قازاقستانمەن ديپلوماتيالىق قارىم - قاتىناس ورناتقانىنا 25 جىل تولعاندىعىن وراي ەتىپ، كورشىلەر ارا تاتۋ بولۋ رۋحىن اسقاقتاتىپ، ستراتەگيالىق سايكەسۋدى كۇشەيتىپ، ءوزارا تيىمدىلىك جاساپ سەلبەسۋدى تەرەڭدەتىپ، جۇڭگو مەن قازاقستاننىڭ جان - جاقتى ستراتەگيالىق سەرىكتەستىك قاتىناسىنىڭ اناعۇرلىم جوعارى دەڭگەيگە، اناعۇرلىم تەرەڭ ساتىعا، اناعۇرلىم كەڭ اياعا قادام تاستاۋىن بىرگە ىلگەرىلەتۋدى قالايدى. تاراپتار زاڭ اتقارۋ، حاۋىپسىزدىك سەلبەستىگىن كۇشەيتىپ، «ءۇش ءتۇرلى كۇشكە» قاتاڭ سوققى بەرۋى كەرەك. جۇڭگو قازاقستاننىڭ حالىقارادا جانە بەيبىتشىلىك، حاۋىپسىزدىك ىستەرىندە ءتىپتى زور رول اتقارۋىن قولدايدى، قازاقستانمەن ب م ۇ، شاڭحاي سەلبەستىك ۇيىمى، ازيا ءوزارا ىقپالداستىق جانە سەنىم شارالارى جونىندەگى كەڭەس جۇلگەسىندەگى سەلبەستىكتى تەرەڭدەتۋدى قالايدى.

    شي جينپيڭ مىنانى باسا دارىپتەدى: 2013 - جىلى قازاقستانعا ساپارلاي بارعانىمدا، جىبەك جولى ەكونوميكالىق بەلدەۋى دارىپتەمەسىن تۇڭعىش رەت العا قويعان ەدىم، قازىر بۇعان قازاقستاندى قامتىعان 100 نەشە مەملەكەت پەن حالىقارالىق ۇيىم بەلسەنە ءۇن قوستى. 4 جىلدان بەرى، جۇڭگو - قازاقستان «ءبىر بەلدەۋ، ءبىر جول» قۇرىلىسىن بىرگە قۇرۋ توڭىرەگىندە بەلسەنە سەلبەستىك جاساپ، سەلبەستىك جاساۋ كومەسكى كۇشىن اشىپ، «ءبىر بەلدەۋ، ءبىر جول» قۇرىلىسىن بىرگە قۇرۋدا ىشكەرىلەي توعىسۋدىڭ، ءوزارا جەبەۋدىڭ تىڭ ساتىسىنا قادام قويدى. جۇڭگو قازاقستانمەن بىرگە «ءبىر بەلدەۋ، ءبىر جول» قۇرىلىسىن ىلگەرىلەتۋدى، ءتىپتى كوپ جەتىستىكتەر ارقىلى ەكى ەل حالقىنا يگىلىك جەتكىزۋدى قالايدى.

    نازاربايەۆ بىلاي دەدى: «ءبىر بەلدەۋ، ءبىر جول» حالىقارالىق سەلبەستىك جوعارى دارەجەلى باسشىلار تالقى مىنبەرىنىڭ تابىسپەن اشىلعانىن قۇتتىقتايمىن، شي جينپيڭ ءتوراعا ارقاۋ سوزىندە كەزەكتەگى حالىقارالىق قوعام ءدوپ كەلگەن كوپتەگەن ماڭىزدى ماسەلەلەرگە وتە جاقسى جاۋاپ بەردى. قازاقستان «ءبىر بەلدەۋ، ءبىر جول» دارىپتەمەسىن باتىل قولدايدى، «ءبىر بەلدەۋ، ءبىر جول» دارىپتەمەسىن «نۇرلى جول» دامۋ ستراتەگياسىمەن بەلسەنە ۇشتاستىرادى، وسى جۇلگەدە ەكى ەلدىڭ ەكونوميكا - ساۋدا، اۋىل شارۋاشىلىعى، كەن، تەمىر جول، عىلىم - تەحنيكا سياقتى سالالارىنداعى ناقتى سەلبەستىكتى ۇزبەي تەرەڭدەتۋدى قالايدى. قازاقستان جۇڭگومەن حالىقارالىق جانە وڭىرلىك حاۋىپسىزدىك، دامۋ سالالارى بويىنشا سەلبەستىكتى نىعايتىپ، شاڭحاي سەلبەستىك ۇيىمىنىڭ ورنىقتى دامۋىن ىلگەرىلەتۋدى ءارى بەلسەندى رولىن ساۋلەلەندىرۋدى قالايدى.

    ۋاڭ حۋنيڭ، لي جانشۋ، ياڭ جيەچى قاتارلىلار كەزدەسۋدە بىرگە بولدى.

جاۋاپتى رەداكتور:سايراش تۇرارجان قىزى