2017 - جىلعى (جۇڭگو) ازيا - ەۆروپا تاۋار ساۋداسى كورمەسى تامىز ايىندا وتكىزىلەدى

    دايىندىق قىزمەتتەر ورنىقتى ىستەلۋدە

    8 - مامىردا وتكىزىلگەن 2017 - جىلعى (جۇڭگو) ازيا - ەۆروپا تاۋار ساۋداسى كورمەسىنىڭ دايىندىق قىزمەتىنە اتتانىسقا كەلتىرۋ جونىندەگى تەلەۆيزور - تەلەفون ماجىلىسىنەن ۇعىسۋعا قاراعاندا، 2017 - جىلعى (جۇڭگو) ازيا - ەۆروپا تاۋار ساۋداسى كورمەسى 24 - تامىزدان 28 - تامىزعا دەيىن شينجياڭ حالىقارالىق ءماجىلىس - كورمە ورتالىعىندا وتكىزىلەدى ەكەن، بۇل رەتكى كورمەنىڭ تاقىرىبى: «جىبەك جولى ساۋداسى تۇعىرىن ورناتىپ، ەكونوميكالىق سەلبەستىكتەن تەڭ يگىلىكتەنۋگە دەم بەرەيىك».

    تانىستىرۋعا قاراعاندا، وسى كەزەكتى كورمەنىڭ كورمە ورنى اۋماعى 62 مىڭ شارشى مەتر، بۇل وتكەن كەزەكتەگىدەن ءبىر ەسەدەي ارتىق، وندا توقىماشىلىق، كيىم - كەشەك كاسىبى كورمەسى رايونى، اۋىل شارۋاشىلىق ونىمدەرى كورمەسى رايونى، وڭدەلگەن ازىق - تۇلىكتەر كورمەسى رايونى، ساياحات - مادەنيەت كاسىبى كورمەسى رايونى، دەنە تاربيە - مادەنيەت كاسىبى كورمەسى رايونى، زەردەلى تۇرمىس كورمەسى رايونى، حالىقارالىق جانە شياڭگاڭ، اۋمىن، تايۋان تاڭداۋلى ونىمدەرى كورمەسى رايونى اشىلادى. وسى كەزەكتى كورمەدە تاعى حالىقاراداعى جانە شينجياڭداعى ايگىلى، تاڭداۋلى، ەرەكشە ونىمدەر كورمەسى ۇيىمداستىرىلادى، ساۋداگەرلەردى قارسى الۋ جينالىسى، كورمەنىڭ اشىلۋ سالتى، كورمەنى ارالاۋ سياقتى قيمىلدار وتكىزىلەدى. سونىمەن بىرگە كورمەدە توقىماشىلىق، كيىم - كەشەك، قاتىناس - تاسىمال، ساياحات سياقتى اۆتونوميالى رايوننىڭ ءتۇيىندى كاسىپتەرى ارقاۋ ەتىلىپ، 20 رەت ساۋدا، قارجى قوسۋدى جەبەۋ قيمىلى جانە كاسىپ تالقى مىنبەرى ۇيىمداستىرىلادى؛ ءىش پەن سىرتتى بايلانىستىراتىن نىساندارعا شوعىرلى قول قويۋ قيمىلى ءتۇيىندى تۇردە جاقسى ىستەلىپ، نىسانداردىڭ تياناقتانۋى ىلگەرىلەتىلەدى؛ توقىماشىلىق، كيىم - كەشەك كەڭەسى، توقىماشىلىق، كيىم - كەشەك مەرەكەسى، «ءبىر بەلدەۋ، ءبىر جول اياسىندا زاڭنان قىزمەت كورسەتۋ تالقى مىنبەرى» سياقتى 4 تالقى مىنبەرى وتكىزىلەدى.

    وسى كەزەكتى كورمەنى ۇيىمداستىرۋشى ورىندار: جۇڭگو − ازيا - ەۆروپا كورمەسىنىڭ حاتشىلار باسقارماسى جانە ساۋدا مينيسترلىگىنىڭ سىرتقى ساۋدانى دامىتۋ مەكەمەسى. وتكىزۋشى ورىندار: اۆتونوميالى رايوندىق ساۋدا مەڭگەرمەسى جانە بيڭتۋان ساۋدا مەكەمەسى سياقتى 32 ورىن، سونداي - اق ەلىمىزدەگى ولكە، اۆتونوميالى رايون، قالالاردىڭ كاسىپ باسقارۋ تاراۋلارى. قولداۋ كورسەتەتىن ورىندار: جۇڭگو كيىم - كەشەك قوعامى سياقتى مەملەكەت دارەجەلى 5 كاسىپتىك قوعام جانە شاڭحاي سەلبەستىك ۇيىمىنىڭ حاتشىلار باسقارماسى سياقتى 26 حالىقارالىق ۇيىم، شەتەلدەردەگى ونەركاسىپ - ساۋدا ۇيىمدارى.

    2017 - جىلعى (جۇڭگو) ازيا - ەۆروپا تاۋار ساۋداسى كورمەسىن ۇيىمداستىرۋ كوميسسياسىنىڭ ورىنباسار مەڭگەرۋشىسى، باس حاتشىسى ادىلجان داۋۇت كەزەكتە ءتۇرلى دايىندىق قىزمەتتەرىنىڭ ورنىقتى ىستەلىپ جاتقاندىعىن ايتتى.

جاۋاپتى رەداكتور:سايراش تۇرارجان قىزى