مەملەكەت شينجياڭ ماقتاسىنىڭ نىسانالى باعا رەفورماسىن تەرەڭدەتتى

    شينجياڭدا ماقتانىڭ ءار تونناسىنىڭ نىسانالى باعاسى 2017 - 2019 - جىلدار ارالىعىندا 18 مىڭ 600 يۋان بولادى

    17 - ناۋرىز كۇنى مەملەكەتتىك دامۋ جانە رەفورما كوميتەتى سايتىنان ۇعىسۋىمىزشا، مەملەكەتتىك دامۋ جانە رەفورما كوميتەتى 2017 - جىلدان باستاپ شينجياڭدا ماقتانىڭ نىسانالى باعا رەفورماسىن تەرەڭدەتەدى ەكەن. ماقتانىڭ نىسانالى باعاسىن تۇيىندە سىناق ەتۋ مەزگىلىندەگى ءبىر جىلدا ءبىر رەت تۇراقتاندىرۋدان 3 جىلدا ءبىر رەت تۇراقتاندىرۋعا وزگەرەدى، شينجياڭدا ماقتانىڭ ءار تونناسىنىڭ نىسانالى باعاسى 2017 − 2019 - جىلدار ارالىعىندا 18 مىڭ 600 يۋان بولادى.

    ۇعىسۋىمىزشا، 2014 - جىلدان 2016 - جىلعا دەيىن مەملەكەت شينجياڭدا 3 جىل مەرزىممەن ماقتانىڭ نىسانالى باعا رەفورماسىن تۇيىندە سىناق ەتكەن. 3 جىلدىق اماليات ارقىلى كورنەكتى ونىمدىلىككە قول جەتكىزىپ، اۋىل شارۋاشىلىق ونىمدەرى باعاسىن بازاردىڭ قامداۋ - قاجەتسىنۋ جاعدايىنا قاراي قالىپتاسۋىنىڭ، باعا مەن ۇكىمەتتىك قوسىمشا قاراجاتتى ايىرۋدىڭ جاڭا جولىن قاراستىرىپ، بۇكىل ەلدىڭ ماقتا ءوندىرىسىنىڭ جايعاسۋىن ستراتەگيالىق رەتتەۋدى جۇزەگە اسىرىپ، ماقتانى ءوندىرۋ، وڭدەۋ، اينالىمعا سالۋ، توقۋ سىندى جالپى كاسىپ تىزبەگىنىڭ دامۋىن جەبەپ، ەلىمىزدە وندىرىلگەن ماقتا ساپاسى مەن بازاردىڭ باسەكەلىك قۋاتىن جوعارىلاتىپ، اۋىل شارۋاشىلىعىنىڭ قامداۋ جاعىنداعى قۇرىلىمدىق رەفورماسىن امالياتتىق تاجىريبەمەن قامدادى.

    ماقتانىڭ نىسانالى باعا رەفورماسىن وسى رەتكى تەرەڭدەتۋدىڭ باستى مازمۇنى 3 جاقتى قامتيدى: نىسانالى باعانىڭ قالىپتاسۋ مەحانيزمى كەمەلدەندىرىلەدى. ماقتانىڭ نىسانالى باعا دەڭگەيى سوڭعى 3 جىلداعى ءوندىرىس وزىندىك قۇنىنا ۇيلەسىمدى پايدانى قوسۋ ارقىلى تۇراقتاندىرىلادى. ۇيلەسىمدى پايدانىڭ ناقتى قۇنى ماقتا كاسىبىن دامىتۋ قاجەتى، قازىنالىق كوتەرىمدىلىك قۋاتى جانە بازار جاعدايىنىڭ وزگەرىسى سياقتى فاكتورلاردى جان - جاقتى ويلاستىرۋ نەگىزىندە تۇراقتاندىرىلادى. تۇراقتى پەريودى ۇيلەسىمدى بەلگىلەنىپ، ماقتانىڭ نىسانالى باعاسىن ءبىر جىلدا ءبىر رەت بەلگىلەۋدەن 3 جىلدا ءبىر رەت بەلگىلەۋگە وزگەرتىلەدى. ەگەر تۇراقتى باعا پەريودى ىشىندە ماقتا بازارىندا ۇلكەن وزگەرىس تۋىلسا، مەملەكەتتىك كەڭەسكە جولداپ، ماقۇلداعاننان كەيىن نىسانالى باعا دەڭگەيى دەر كەزىندە رەتتەلەدى. قوسىمشا قاراجات بەرۋ ءادىسى رەتتەلەدى، جاقسارتىلادى، شينجياڭدا نىسانالى باعا قوسىمشا قاراجاتى بەرىلەتىن ماقتا مولشەرىنىڭ جوعارى شەگى بەلگىلەنەدى، جوعارى شەكتەن اسىپ كەتكەندەرىنە قوسىمشا قاراجات بەرىلمەيدى.

    كەلەسى قادامدا مەملەكەتتىك دامۋ جانە رەفورما كوميتەتى قاتىستى تاراۋلارمەن جانە وڭىرلەرمەن بىرگە باقىلاۋ - ولشەۋ، باعالاۋ جۇرگىزىپ، نىسانالى باعا ساياساتىن ۇيلەسىمدى كەزدە كەمەلدەندىرەدى.

جاۋاپتى رەداكتور:سايراش تۇرارجان قىزى