«ايبوتا قورى» — قازاق قىزىنىڭ وقۋعا كومەك بەرۋ ارمانى

    — كىشكەنتاي قازاق قىزىنىڭ وقۋعا كومەك بەرۋ ارمانى

ايبوتا (سولدان ءبىرىنشى) ساباقتاستارىمەن بىرگە مەيىر – شاپاعاتقا تولى كومەك اقشاسىن جىلۋ ساندىقشاسىنا سالۋدا ...

    15 – ناۋرىز تۇستەن كەيىن، ءۇرىمجى قالاسى شۇيموگوۋ رايونىنداعى 22 باستاۋىش مەكتەپتە «ايبوتا قور ۇيىمىنىڭ» بولىمشەلەرى رەسمي قۇرىلدى. بۇعان ەڭ العاش وسى ۇيىم قۇرىلعان ءۇرىمجى قالالىق 64 – باستاۋىش مەكتەپتى قوسقاندا، ءۇرىمجى قالاسىنداعى 23 باستاۋىش مەكتەپتە «ايبوتا قور ۇيىمى» قۇرىلدى.

    ءۇرىمجى قالاسىنداعى باستاۋىش مەكتەپ وقۋشىسىنىڭ اتىندا قۇرىلعان تۇڭعىش قور ۇيىمى بولعان بۇل ورىننىڭ اۋەلگى ماقساتى كىشكەنتاي قىزدىڭ وقۋعا كومەك بەرۋ ارمانىن ورىنداۋ بولاتىن.

    اڭگىمەنى ءتورت جىلدىڭ الدىنداعى مىناداي ءبىر ىستەن باستاۋعا تۋرا كەلەدى. 2013 – جىلى قازان ايىندا، 7 جاستاعى ايبوتا ەرزات قىزى تەلەۆيزورداعى ءبىر باعدارلامادان شەت شالعاي تاۋلى وڭىردەگى بالالاردىڭ اتا – اناسىمەن بىرگە ءۇي جۇمىسىن تىندىرىمدى ىستەۋمەن بىرگە، قۇلشىنا ۇيرەنىپ، وقۋىن جالعاستىرىپ جاتقانى جايلى اسەرلى اڭگىمەنى كورەدى. باستاۋىشتىڭ ەكىنشى جىلدىعىنا ەندى عانا تۇسكەن ايبوتا بۇدان تەرەڭ شابىت الىپ، ۇساق – تۇيەك اقشالارىن جيناستىرىپ، سەمياسىندا قيىنشىلىعى بار وقۋشىلارعا كومەكتەسۋ بەكىمىنە كەلەدى.

    ايبوتا ءوزى دە قاراپايىم قازاق وتباسىندا دۇنيەگە كەلگەن. شەشەسى شينجياڭ پەداگوگيكا ۋنيۆەرسيتەتىندە ارتقى شەپ قىزمەتىن اتقارادى. ول وقىپ جاتقان 64 – باستاۋىش مەكتەپ بولسا اۋىل – قىستاق كونە مەكتەبىنەن وزگەرتىلىپ قۇرىلعان، وقۋشىلاردىڭ 70 پايىزى دەرلىكتەي ديقان – جۇمىسكەرلەردىڭ پەرزەنتتەرى، از ۇلت وقۋشىلارىنىڭ سالىستىرماسى 60 پايىزىن يەلەيدى، ءبىر ءبولىم وقۋشىنىڭ سەمياسىندا ەكونوميكالىق قيىنشىلىق اۋىر.

    2014 – جىلدىڭ ناۋرىز ايىندا، ساباقتاسىنىڭ اكەسىنىڭ نەسەپ ءزارىنىڭ دەنەگە جينالۋى سىندى اۋىر ناۋقاسقا شالدىققانىن، سەمياسىنىڭ ءال – اۋقاتى ناشار ەكەندىگىنەن حاباردار بولعان ايبوتا كلاس جەتەكشىسى جاڭ جياۋدىڭ كەڭسەسىنە جۇگىرىپ بارىپ، قالتاسىنان 50 تيىندىق، 1 يۋاندىق ءبىر بۋدا اقشانى الىپ شىعىپ، مۇعالىمىنا تاپسىرىپ بەرىپ، وسى ساباقتاسىنىڭ قيىنشىلىق قىسپاعىنان قۇتىلۋىنا ازدا بولسا سەپتىگى تيسە ەكەن دەپ ويلايدى.

    — سول كەزدە بۇل ماعان تىم توسىن سەزىلدى، كلاستاعى وقۋشىلاردىڭ ءبارى بۇل جاعدايدى بىلەدى، ءبىراق تەك ايبوتا عانا جىلۋ اتادى، كەيىن ساناپ كورسەم، تۇپ – تۋرا 40 يۋان ەكەن، - دەيدى جاڭ جياۋ.

    — مەيلى قانداي جاعداي بولسا دا باسقالارعا شىن پەيىلىمەن كومەكتەسۋ راسىندا ماقتانۋعا تاتيتىن جۇمىس. سودان باستاپ، ءار جولى وزىمدەگى ۇساق – تۇيەك اقشالارىمدى مۇعالىمعا تاپسىرىپ وتىراتىن بولدىم، - دەيدى ايبوتا.

    سول جىلدان باستاپ ايبوتا اكە – شەشەسى مەن اجەسى بەرگەن ۇساق – تۇيەك اقشالاردى بەتالدى جۇمساماي، ساقتاپ وتىرۋدى ادەتكە اينالدىرىپتى.

    — ءار ايدىڭ 20 – كۇنى ايبوتا ءوزى جيناقتاعان اقشالارىن ماعان تاپسىرىپ بەرەدى. 2014 – جىلدىڭ سوڭىنا بارعاندا، جيناعان اقشاسى 520 يۋان بولىپتى. مەن ونىڭ شەشەسىنە حابارلاسىپ، بۇل اقشانى قالاي، قايدا جۇمساۋ جايىندا اقىلداستىم، - دەيدى كلاس جەتەكشىسى جاڭ جياۋ.

    — قىزىمنىڭ بەتالدى اقشا جۇمسامايتىنىن سەزە باستادىم، ويتكەنى ول ۇساق – تۇيەك اقشالارىن ءوز بولمەسىنە ساقتاپ قوياتىن ادەت قالىپتاستىرا باستادى، كەيىن كلاس جەتەكشىسى ماعان حابارلاسقاندا بارىپ، ناقتىلى جاعدايدايدان تولىق حاباردار بولدىم، - دەيدى ايمان قاسەن قىزى.

    ايمان اپاي مەن جاڭ جياۋ اقىلداسا وتىرىپ، شۇيموگوۋ رايوندىق قىزىل كرەست قوعامىنا بارادى، بۇل ورىننىڭ سايكەستىرۋىمەن ايبوتا جيناعان اقشالاردى مەكتەپتىڭ قىزىل كرەست قوعامىنا تاپسىرىپ بەرەدى.

    2014 – جىلى جەلتوقسان ايىندا، ايبوتا اتىنداعى «ءۇرىمجى قالالىق 64 – باستاۋىش مەكتەپ ايبوتا قور ۇيىمى» رەسمي قۇرىلدى. بۇل قور ۇيىمى قوعامداعى ءار سالا ادامدارىنىڭ نازارىن اۋداردى. مەكتەپتىڭ ماڭايىنداعى كاسىپورىن، اسكەري ءبولىم، قوعامداعى ىزگى نيەتتى جاندار سونداي – اق، مەكتەپتەگى وقىتۋشىلار مەن وقۋشىلار دا ءوز ەرىكتەرىمەن بەلسەنە ات سالىسىپ، قور ۇيىمىنا قولداۋشى بولدى.

    «ايبوتا قورى» قۇرىلعاننان بەرى، قوعامنىڭ ءار سالاسىنان جيىلعان 50 مىڭ يۋاندىق كومەك سوما مەن ۇن، ماي، كۇرىش، وقۋ قۇرالدارى، كىتاپ سياقتى زاتتاردى قابىلداعان ەكەن. بۇل كومەك سوما مەن زاتتىق بۇيىمدار تالايلاعان وتباسى مەن وقۋشىلاردىڭ تۇرمىستىق قيىنشىلىعىن شەشىم ەتتى.

    64 – باستاۋىشتىڭ وقۋشىسى جاڭ مىڭ جالعاستى ءۇش جىل مەكتەپتىڭ وقۋعا كومەك سوماسىنان يگىلىكتەنىپ كەلەدى. — ءار وقۋ ماۋسىمى سايىن 500 يۋان بەرەدى، مۇعالىمنىڭ ايتۋىنشا، بۇل اقشالاردى «ايبوتا قور ۇيىمى» ۇسىنعان ەكەن. ايبوتا اپكەمە شىنايى راقىمەتىمدى ايتامىن، - دەيدى جاڭ مىڭ.

    «ايبوتا قورى» ءۇش جىلدان بەرى، تالاي وقۋشىنىڭ قيىنشىلىعىن شەشىم ەتىپ، ولارعا جاقىننان جاردەمشى بولدى. بۇل باستامانىڭ ەل يگىلىگىنە جاراعانىن كورگەن سوڭ، ايبوتانىڭ بويىندا جاۋاپكەرلىك سەزىمى پايدا بولدى.

    ايبوتا بيىل باستاۋىش مەكتەپتى بىتىرەدى. — باستاۋىشتى بىتىرگەننەن كەيىن دە، اپتا سايىن انا مەكتەبىمە كەلىپ، كومەك اقشامدى بۇرىنعىداي مۇعالىمعا تابىس ەتىپ تۇرامىن. بۇل قور ۇيىمى مەنىڭ اتىمدا قۇرىلعان، مەن باستان – اياق تاباندى بولۋىم كەرەك، سوندا عانا قوعامداعى ىزگى جانداردىڭ كومەگىنە يە بولا الامىز، - دەيدى ايبوتا.

جاۋاپتى رەداكتور:سايراش تۇرارجان قىزى