التاي قازاق ەتنو-فوتوگرافيا قوعامىنىڭ شىڭگىلدەگى فوتو سۋرەت كۋرسى وتكىزىلدى

 

    قۇرمانگۇل اسپەن قىزى حابارلايدى. فوتو بىلىمدەرىن كەڭىنەن جالپىلاستىرۋ، اۋدان كولەمىندەگى فوتو اۋەسكەرلەرى مەن ەرىكتى تىلشىلەردىڭ اقپاراتتىق فوتوعا بولعان قىزعىندىلىقتارىن ارتتىرۋ، اۋداننىڭ سىرتقى ۇگىت قىزمەتىن كۇشەيتۋ ماقساتىندا، شىڭگىل اۋداندىق ۇگىت ٴبولىمى، شىڭگىل اۋداندىق فوتو سۋرەت قوعامى بىرلەسىپ، جۇڭگو ەتنو-فوتوگرافيا قوعامىنىڭ ماگيسترى، التاي قازاق ەتنو-فوتوگرافيا قوعامىنىڭ ٴتوراعاسى سەرىك مۇقىش ۇلىن ۇسىنىس ەتىپ، شىڭگىلدەگى فوتو اۋەسكەرلەرى مەن اۋىل-قالاشىقتارداعى ەرىكتى تىلشىلەرگە ەكى كۇندىك ۋاقىتپەن فوتو سۋرەت كۋرسىن اشىپ بەردى.

    كۋرس بارىسىندا، سەرىك مۇقىش ۇلى فوتوعا الۋدا جارىقتى قالاي تەڭشەۋ، جىلدامدىقتى قالاي مەڭگەرۋ، اپپاراتتىڭ ٴتۇرلى تەتىكتەرىن قالاي مەڭگەرۋ، فوتوعا الۋداعى كومپوزيتسيالىق تۇيىندەر، تولىمدى، ۇزدىك فوتو تۋىندىلارىن قالاي جاراتۋ تۋراسىنداعى بىلىمدەردى اشالاپ ٴتۇسىندىرىپ، فوتو ونەرىنىڭ قىرى مەن سىرىنا بويلاپ، كۋرسكە قاتىناسقانداردى فوتو ونەرى جانە فوتوگراف تۋرالى تەرەڭ تۇسىنىكتەرگە يە ەتتى.

    سەرىك مۇعالىم ساباق بارىسىندا، وقۋشىلارعا اپپاراتتى قالاي ۇستاۋ، قالاي تەڭشەۋ، قانداي تۇيىندەرگە كوڭىل ٴبولۋ سىندى بۋىندارعا دەيىن تاپتەشتەي ٴتۇسىندىرىپ، ولاردىڭ اراسىنا بارىپ، قولما-قول ۇيرەتىپ، جەتەكتەدى. سونىمەن بىرگە شىڭگىلدەگى فوتو قوعامنىڭ مۇشەلەرى تۇسىرگەن فوتو تۋىندىلارىنا باعا بەرىپ، ولاردىڭ فوتولارىندا ساقتالعان ماسەلەلەر مەن ارتىقشىلىقتاردى كورسەتىپ، ولاردى ٴتىپتى دە قۇندى شىعارمالار جاراتۋعا شابىتتاندىردى.

    سەرىك مۇقىش ۇلى بىلاي دەدى: «التاي قازاق ەتنو-فوتوگرافيا قوعامىن قۇرۋداعى ماقسات التاي كولەمىندەگى قويۋ ۇلتتىق سالت-سانا جانە مادەنيەتتى ۇگىتتەۋ، وعان مۇراگەرلىك ەتۋ، كوركەم تۋىندىلاردى باسقار ۇلت ۋاكىلدەرىمەن ٴبولىسۋ، ٴوزارا تاجىريبە الماستىرۋ بولىپ تابىلادى. قوعامىمىز قۇرىلعان سوڭ العاشقى كۋرستى مىنە بۇگىن شىڭگىل اۋدانىنان باستاپ كەتتىك، شىڭگىل اۋدانىندا فوتو اۋەسكەرلەرى ٴبىرشاما مول، الايدا، ولاردا كەيبىر تەحنيكالىق، شەبەرلىك جاقتارداعى ماسەلەلەر ساقتالۋدا، بۇل رەتكى كۋرس ولارعا وسى جاقتاردان سەپتىگىن تيگىزسە دەگەن ۇمىتتەمىن».

    شىڭگىل اۋدانى اعاشوبا اۋىلدىق ۇكىمەتتەن كەلگەن كۋرسانت گۇلايشا ەلسىنقان قىزى: «بۇل رەتكى كۋرس ٴبىز جونىنەن وتە قاجەتتى بىلىمدەردى تولىقتاپ بەردى، بۇرىندار اپپاراتتى اۆتوماتتى تۇردە تەڭشەپ تارتا بەرەتىنبىز، بۇل جولى اپپاراتتى قالاي تەڭشەۋ، سۋرەتتى قالاي تارتۋ، قالاي وڭدەۋ تۋرالى ٴبىرشاما تەرەڭ تۇسىنكتەرگە يە بولدىق، سەرىك مۇعالىمعا جانە سىرتقى ۇگىت كەڭسەسىنە العىسىمىز شەكسىز»،-دەدى.

جاۋاپتى رەداكتور:نۇرجان مينۋار قىزى