مەكتەپتىڭ ۇگىت-اقپارات قىزمەت جيىنى اشىلدى

 

    ىنتىماق داۋلەتباي ۇلى حابارلايدى. پارتيا مەن حالىقتىڭ اراسىنا كوپىرلىك رول اتقارىپ، پارتيانىڭ ءۇنىن حالىققا جەتكىزىپ، قالا مەن دالانىڭ جىلت ەتكەن جاڭالىقتارىن قوردالى قوعامعا جاريالاپ وتىرعان اقپارات قۇرالدارىنىڭ ەلپەك تە ەلگەزەك رولىن جوعارى باعالاپ، ونى مەكتەپتى ۇگىتتەۋدىڭ ماڭىزدى قۇرالى رەتىندە تانىپ كەلگەن بۋرىلتوعاي اۋداندىق 1-تولىق ورتا مەكتەبى 10-ناۋرىز كۇنى ۇگىت-اقپارات جينالىسىن شاقىرىپ اشتى.

    بۇل مەكتەپ بۇرىننان بەرى اقپارات قىزمەتىنە ايىرىقشا كوڭىل ءبولىپ، ونى ماڭىزدى ساياسي قىزمەت رەتىندە قاراپ، مەكتەپتە ورىستەتىلىپ جاتقان وقۋ-وقىتۋعا، ءتالىم-تاربيەگە قاتىستى سونداي-اق ءتۇرلى جاقتارداعى وقۋ-اعارتۋ رەفورمالارى مەن مادەني، دەنەتاربيە قيمىلدارىن دەر كەزىندە اقپارات دانەكەرلەرى ارقىلى قوعامعا جاريالاۋدى قاداعالاپ، كلاس قىزمەتى، كۇندەلىكتى ساباق دايىنداۋ، ساباق ءوتۋ، تاپسىرما تەكسەرۋ سىندى قول ۇزدىرمەس قاربالاستىقتار اراسىنان ارەدىك ۋاقىت اجىراتىپ، وقىرمانعا تولعامدى وي تاستاپ، تولاعاي تابىستاردى ماقتانىشپەن جاريا ەتۋگە اتسالىسىپ جۇرگەن ءتىلشى وقىتۋشىلاردىڭ ەڭبەگىن دە قاعىس قالدىرماي ماراپاتتاپ كەلە جاتقان بولاتىن.

    جيىندا مەكتەپ سەكراتارى باس بولعان 10 ادامدىق ۇگىت-اقپارات قىزمەت باسشىلىق القاسى مەن تىلشىلەر قوسىنى قۇرىلىپ، مەكتەپتىڭ وتكەن ءبىر جىلداعى وسى سالاداعى قىزمەت قورتىندىسى جاسالىپ، كەلەر قادامداعى قىزمەت تۇيىندەرى ورتاعا قويىلىپ، ءار كەزەڭدەگى تاقىرىپتىق قيمىلدار بەلگىلەنىپ، مىندەت جۇكتەلىپ، الداعى باعىت-باعدار جونىندە ءجون-جوسىق كورسەتىلدى. بۇل مەكتەپتىڭ وتكەن جىلدا رايونىمىز كولەمىندەگى اقپارات دانەكەرلەرىنە جاريالانعان حابار ماقالا سانى مىڭ نۇسقادان اسىپ، كەي تۇىندىلار ايماق، اۋدان دارەجەلى ۇگىت تاراۋلارى جاعىنان سيلانىپ،تەك مەكتەپتىڭ عانا ەمەس تۇتاس اۋداننىڭ ۇگىت سالاسىنا زور ۇلەس قوسقاندىعى اتاپ ءوتىلدى.

    جىيىن سوڭىندا، مەكتەپ پارتيا ياچيكاسىنىڭ سەكراتارى ادال ۋاپا ۇلى تىلشىلىكپەن شۇعىلدانىپ، قالام تەربەپ جۇرگەن وقىتۋشىلاردىڭ جاپالى ەڭبەكتەرىن تولىق تياناقتاندىرا كەلىپ، ولاردان جالعاستى تىرىسشاڭدىلىق كورسەتىپ، ۇگىتتىك رولى جوعارى، مازمۇنى باي، ءداۋىر ءۇنىن حالىق تىلەگىنە ساي ۇنامدى جاقتان جىرلايتىن ءتىلى شىمىر، ويى ورەلى، سارا تۋىندىلار جاريالاۋلارىن ءۇمىت ەتتى.

 

ءتىلشىنىڭ قىزمەت ورنى: بۋرىلتوعاي اۋداندىق 1-تولىق ورتا مەكتەپ

جاۋاپتى رەداكتور:نۇرجان مينۋار قىزى