قايىرىمدىلىق − اسىل قاسيەت

    ىسپانديار سولتاش ۇلى

    قايىرىمدىلىق − جاردەمگە مۇقتاج جانداردى سۇيەمەلدەۋ، قولداۋ ماقساتىندا جۇرگىزىلەتىن زاتتىق جانە رۋحاني جاقتاعى بوداۋسىز كومەك. ول ادام بالاسىندا بولۋعا ءتيىستى ەڭ اسىل قاسيەتتەردىڭ ءبىرى. حالقىمىز ەجەلدەن «پاناسى جوق تاۋدان بەز، پايداسى جوق بايدان بەز»، «قاراۋ بايدان كەۋدەلى كەدەي ارتىق» دەپ قايىرىمدىلىعى جوق ادامداردىڭ قوعامدا قادىر - قاسيەتىنىڭ بولمايتىنىن ايشىقتاپ كورسەتكەن. جايشىلىقتا ادامدار قوعامدىق ورتاعا جان اشىرلىقپەن قارايتىن، وزگەلەرگە كومەكتەسە جۇرەتىن، مەيىرىمدى جانداردى قايىرىمدى ادام، جان اشىر جان دەپ ماقتايدى. ەگەردە ءمالىم ءبىر ازامات ءوزى جاساپ وتىرعان قوعامدىق ورتادا تۇرمىس ورەسى جوعارى بولسا، قازىرگىنىڭ سوزىمەن ايتقاندا قالتالى بولسا، ءوز ماڭايىنداعى حال - جاعدايى تومەن، جوق - جىتىك، كومەككە ءزارۋ جاندارعا قولىنان كەلگەنشە كومەكتەسە جۇرگەنى ورىندى. وسى بارىستا ول ءوز ىستەگەن ىسىنە بولا ەشكىمگە مىندەتسىمەگەندە، ماقتاۋ تىلەمەگەندە عانا ونىڭ ىستەگەن ءىسى شىنايى قايىرىمدىلىققا جاتادى.

    قايىرىمدىلىق شىن نيەتپەن ىستەلگەن جەردە سيلاستىق، مەيىرىمدىلىك، سۇيىسپەنشىلىك، القاۋ - ماداقتاۋ ەشكىمنىڭ قۋزاۋىنسىز - اق وزدىگىنەن قالىپتاسادى. قوعامدا ەلدىڭ، ۇلتتىڭ بولاشاعى دەگەندە ىشكەن اسىن جەرگە قوياتىن، قينالعانعا كومەك قولىن سوزاتىن، جاقسىلىق جاساۋعا قاشاندا جانى قۇمار ادامدار از ەمەس. دەسەدە بىرەۋگە بىرەۋ ازعانتاي كومەكتەسسە، سوعان بولا بوداۋ تىلەيتىن، ىستەگەن ءىسى بولماشى بولعانىمەن، ونى كوپىرتىپ كوپ الدىندا جارنامالاپ كورسەتكىسى كەلىپ تۇراتىن ادامدار دا بار، مۇنداي كىسىلىك قاسيەتى كەمشىل، رۋحاني الەمى جۇتاڭ ادامداردىڭ يدەياسىن وزگەرتۋگە قۋزاۋ، كومەكتەسۋ كەرەك.

    كەيدە اۋىلدى جەرلەرگە قۋانا بارىپ، تۇرمىستىق جاقتان قينالعان، ناۋقاس سەبەبىنەن قارىزعا بەلشەلەرىنەن باتىپ كەدەيلەسكەن ادامداردى، قارايلاسار جان اشىر - جاقىنى جوق جالعىزدىقتىڭ تاقسىرەتىن تارتقان قاريالاردى كورگەندە كوڭىلىمىز قۇلازىپ قايتاتىن كەزدەرىمىز دە بولادى.

    ۇلتىمىزدىڭ نەگىزگى تۇلعاسى كەڭ - بايتاق اۋىل - قىستاقتاردا، كەدەيلەردى كەدەيلىكتەن قۇتىلدىرۋدان قامال الۋ كۇرەسىندە پارتيا مەن ۇكىمەت ورىندارىندا ىستەيتىن ءار دارەجەلى كادرلار، جۇمىسشى - قىزمەتشىلەر، بازار شارۋاشىلىعىندا ءوز ەڭبەگىمەن اعالاپ العا شىققان كاسىپكەرلەر ءتۇرلى قىزمەت ورنىندا ءتۇرلى فورمالارمەن اۋىل - قىستاق تۇرعىندارىنىڭ تۇرمىسىنىڭ جاقسارۋىنا، مادەنيەتى مەن ءبىلىم ورەسىنىڭ جوعارىلاۋىنا ايانباي ۇلەس قوسۋدا. سەبەبى اۋىل - قىستاق گۇلدەنسە باسىم كوپ حالىقتىڭ جاعدايى جاقسارادى، قوعامنىڭ دامۋى تەزدەيدى. سوندىقتان ءار سالا، ءار شەپتە قىزمەت اتقاراتىن ازاماتتار وسى جاعىن كوكەيلەرىندە بەرىك ساقتاپ، قاي - قاشان دا نەگىزگى ساتىداعى ءار ۇلت حالقىنىڭ مۇددەسى ءۇشىن قىزمەت وتەۋدى ەستەرىنەن شىعارماعانى ءجون. تۋىسقان ۇلت ازاماتتارى قالتاسى قالىڭداسا قارجىسىن جاستاردىڭ شارۋاشىلىق قۇرۋىنا، ۇرپاقتىڭ ساۋاتتى بولۋىنا، حالقىنىڭ ونەر - ءبىلىم، مادەنيەت ۇيرەنۋىنە كومەگى بولسىن دەپ قوماقتى جىلۋ اتايتىن جاقسى قاسيەتىن ءبىز دە ۇيرەنۋىمىز، ىستەگەن قايىرىمدى ىستەرىمىزدى كەڭەيتە ءتۇسۋىمىز ءتيىس. ءجونىن بىلگەن ادامعا ارتىنا قالاتىنى تەك قانا حالقىنا ىستەگەن جاقسىلىعى، بايانى بار يگىلىكتى ءىسى، ۇرپاققا رۋح سيلايتىن ۇلاعاتتى باستاماسى ەكەنى تاريحتان دالەلدەنگەن شىندىق.

    قۇن كوزقاراسى بويىنشا قاراعاندا، ءبىر ادامنىڭ وزگەلەرگە قامقورلىق كورسەتۋىندە ونىڭ باي، باردام بولۋى، ىستەگەن جاقسىلىعىنىڭ از - كوپتىگى استە مىندەتتى ەمەس. ماسەلەنىڭ ءتۇيىنى − سانالى تۇردە ىستەلگەن شىنايى نيەتىندە جاتىر. سوندىقتان ءارقانداي ادام ءوز قوعامدىق ورنىندا، وزىنە ءتان تۇرمىس دەڭگەيىندە قولىنان كەلگەنشە تارىققانعا تايانىش، جىلاعانعا جۇبانىش بولا بىلسە بولعانى. ادامداردىڭ رۋحاني جان دۇنيەسى تۇرعىسىنان قارايتىن بولساق، ءبىر ادامنىڭ وزگەلەرگە قاراتا ىزگى نيەت، جاقسى تىلەكتە بولا وتىرىپ اقىل - كەڭەس بەرگەنىنىڭ ءوزى رۋحاني جاقتان دەمەلگەن ادامنىڭ كوڭىل كۇيىن جاقسى سەزىمگە بولەپ، رۋحاني جاقتان سەرپىلتىپ، پسيحولوگيالىق جاقتان اقاۋسىز بولۋعا جەتەلەۋ رولىن اتقاراتىنى داۋسىز.

    رەال ومىردە ءبىر ءبولىم ادامدار قايىرىمدىلىقتى جوق - جىتىك، جاردەمگە مۇقتاج جاندارعا دۇنيە - مۇلىك، اقشا بەرۋ دەپ جالاڭ تۇسىنەدى. بۇل ءبىر قىرىنان قاراعاندا دۇرىس بولعانىمەن، ءبىراق بۇلاي ىستەۋدىڭ ناتيجەسى كوبىنەسە مەزەتتىك قانا بولىپ، ولاردىڭ قيىنشىلىعىن تۇبەگەيلى شەشە المايدى. ءمالىم ءبىر ادام جونىنەن ايتقاندا، ەكىنشى ادامعا جىلى سوزىمەن، ايالى الاقانىمەن، ىلىكتى ىستەرىمەن دە قايىرىمدىلىق جاساۋىنا بولادى. قيىنشىلىعى بارلاردى، كەدەي جانداردى رۋحاني جاقتان سەرپىلتىپ، «قان قۇيعىزۋدان» ءوزى «قان جاساۋعا» قاراي جەتەلەي الساق ناعىز ناتيجەلى كومەك بولادى.

    اتا - بابالارىمىز «جەتىم كورسەڭ جەبەي ءجۇر» دەپ ءار ادامنىڭ كۇيزەلىستى جاندارعا قولىنان كەلگەنىنشە جاقسىلىق ىستەۋگە، قايىرىمدى بولۋعا شاقىرعان. كۇندەلىكتى ومىردە ادامدار وسىلاي ىستەۋدى قاراپايىم داعدىعا اينالدىرعان كەزدە عانا قازىرگى تاڭدا ۇنەمى دارىپتەلىپ جاتقان وركەنيەتتى قوعام قۇرۋ ءىسى شىنايى جۇزەگە اسادى. سوندىقتان وركەنيەتتى قوعام قۇرۋدىڭ نەگىزگى شارتتارىنىڭ ءبىرى بولعان قايىرىمدىلىق سىندى اسىل قاسيەتىمىزدى ونان ارى ارداقتاپ، ءۇرتىس ساۋلەلەندىرە تۇسەيىك.

جاۋاپتى رەداكتور:سايراش تۇرارجان قىزى