استىق يمپورت ەتۋگە تاعى ءبىر تىڭ جول اشىلدى

    قازاقستاننىڭ ءبيدايى «چاڭ - ان» اتتى پويەزبەن شي - انعا جونەلتىلدى

    ءۇرىمجى كەدەنىنەن ۇعىسۋعا قاراعاندا، جۋىقتا الاتاۋ ساعاسىنىڭ كەدەنى قازاقستاننان يمپورت ەتىلگەن ساپالى ءبيدايدى تەكسەرىپ وتكىزگەن، وسى ساپالى ءبيداي «چاڭ - ان» حالىقارالىق زات تاسىمالى كەزەكشى پويەزىمەن شي - ان قالاسىنا جەتكىزىلەدى. وسى توپتا 1795 توننا، قۇنى 2 ميلليون 631 مىڭ 700 يۋان كەلەتىن ءبيداي قازىرگە دەيىن ورتا ەۆروپا (ورتا ازيا) كەزەكشى پويەزى قايتار جولدا تيەپ قايتقان مولشەرى ەڭ كوپ يمپورت استىق ەسەپتەلەدى.

    ۇعىسۋعا قاراعاندا، 2015 - جىلى جەلتوقساندا شي - ان حالىقارالىق ساۋدا جانە زات تاسىمالى ءوڭىرى شەتەلدەن استىق يمپورت ەتىلەتىن وتكەل بولىپ بەلگىلەنىپ، ورتا ەۆروپا (ورتا ازيا) كەزەكشى پويەزدەرىنىڭ قايتار جولدا استىق تيەپ الا كەلۋى ءۇشىن كوپتەگەن مۇمكىندىكتەر ازىرلەگەن. بۇل رەت يمپورت ەتىلگەن استىق شەتەلدەن يمپورت ەتىلگەن استىقتىڭ ارناۋلى وتكەلى بەلگىلەنگەننەن كەيىن تۇڭعىش رەت يمپورت ەتىلگەن استىق ەسەپتەلەدى. بۇل توپتاعى استىقتى شي - انداعى بەلگىلى ازىق - تۇلىك سەرىكتەستىگى يمپورت ەتكەن، ساپالى ۇن مانەرلەۋگە پايدالانىلادى. وسى كاسىپورىن جاۋاپتىسىنىڭ ويىنشا: «قازاقستان ءبيدايىنىڭ باعاسى ەل ىشىندەگى ءبيداي باعاسىنىڭ تورتتەن بىرىندەي عانا، بازارداعى باسەكەلىك قۋاتى مىعىم، ونىڭ ۇستىنە كەزەكشى پويەزبەن يمپورت ەتىلسە، تاسىمال قۇنىن تومەندەتۋگە بولادى».

    «قازاقستان مەن جۇڭگو كورشىلەس، تاسىمالداۋ ارالىعى جاقىن، ونىڭ ۇستىنە قازاقستاننىڭ اۋىل شارۋاشىلىق داقىلدارىنىڭ ساپاسى جاقسى، اشۋدىڭ، دامىتۋدىڭ كومەسكى قۋاتى زور. بۇل رەت ءبىز تۇڭعىش رەت كەزەكشى پويەزبەن يمپورت ەتىلگەن ءبيدايدى ۋاكىلاتان الىپ وتىرمىز، كاسىپورىن تەڭىزبەن تاسىمالداۋدىڭ ۋاقىتى ۇزاقتىعىن، شي - انعا جەتۋ ءۇشىن 30 كۇن اينالاسىندا ۋاقىت كەتەتىندىگىن، ءبيدايدىڭ وڭاي دىمدانىپ، كوگەرىپ كەتەتىنىن ەسكەرىپ، تەمىر جولداعى زات تاسىمالداۋ ارناۋلى پويەزىن تاڭدادى. الماتىدان شي - انعا 6 كۇندەي عانا ۋاقىت كەتەدى، كەدەن 50 ۆاگونداعى ءبيدايعا قاتىستى ءتۇرلى راسمياتتاردى بىتىرۋگە جارتى ساعاتتاي عانا ۋاقىت جۇمسايدى»، - دەيدى وسى كەزەكشى پويەزگە وكىلەتشى كاسىپورىن الاتاۋ ساعاسى جىڭماۋ حالىقارلىق زات تاسىمالى وكىلەتتىك شەكتى سەرىكتەستىگىنىڭ كەدەنگە مالىمدەۋشىسى لي جيشىڭ.

    ۇعىسۋعا قاراعاندا، الاتاۋ ساعاسى كەدەنى كەزەكشى پويەزدەرگە ارناۋلى پايدالانىلاتىن «جاسىل وتكەل» بەلگىلەپ، كەدەندىك پەشەت بۇزىلماعان، ساۋدا پەشەتى ءبۇتىن، قاتىستى ينفورماتسيالاردى سالىستىرعاندا دۇرىس بولۋى العى شارتىندا، «بەلەتى كەلسە دەرەۋ جىبەرۋ، الدىمەن ءبىتىرۋ» سىندى كەدەن شاراسىن قولدانىپ، جەرگىلىكتى كەدەنمەن ۇزاق مەرزىمدى، ءونىمدى بايلانىستا بولۋ مەحانيزمىن تەرەڭدەتىپ، ينفورماتسيالاردىڭ ءوزارا اۋىسۋىن كۇشەيتىپ، كەزەكشى پويەزدىڭ كەدەن وتكەلىندە ايالداۋ ۋاقىتىن قىسقارتىپتى. ەندىگى جەردە، الاتاۋ ساعاسى كەدەنى حالىقارالىق كەدەننىڭ پىكىر اۋىسۋداعى سەلبەستىك باسىمدىعىن اناعۇرلىم ساۋلەلەندىرىپ، قولايلى قىزمەت كورسەتۋ شارالارىن ۇزبەي جاقسارتىپ، كەمەلدەندىرىپ، الاتاۋ ساعاسى وتكەلىن ەلىمىز بەن ازيا - ەۆروپا ەلدەرى بازارىنىڭ ەڭ قولايلى وتكەلىنە اينالدىرماق.

جاۋاپتى رەداكتور:سايراش تۇرارجان قىزى