حالىق قالاۋىنان شىققان قىزمەت اترەتى

 

سۋرەتتە:داۋلەت قارت (ورتادا) قىزمەت اترەتىنە العىس تۋ ۇسىنۋدا.

 

    قادىل نۇراحىمان ۇلى حابارلايدى. ساۋان اۋدانى بورتىنكو اۋىلىنىڭ ارالتوبە قىستاعى اۋدان قالاشىعىنان 70 كيلومەتر شالعايداعى ەرەنقابىرعا تاۋىنىڭ بوكتەرىنە ورنالاسقان ەكونوميكالىق شارت-جاعدايى ءالسىز قىستاقتاردىڭ ءبىرى بولىپ، جول قاتناسى مەن اۋىز سۋ ماسەلەسى ۇزاق ۋاقىتتان بەرى شەشىلمەي كەلگەن ەدى.

    وتكەن جىلى 5-اقپاندا اۋداندىق دامۋ، رەفورمالاۋ كوميتەتىنەن حان يۇچي قاتارلى ءتورت ادامنان ۇيىمداسقان قىزمەت اترەتى ارالتوبە قىستاعىنا كەلگەننەن كەيىن، حالىقتىڭ جاعدايىن ءبىر-بىرلەپ ۇعىسىپ، ادەتتەگىدەي قيىنشىلىقتاردى وزدەرى شەشىپ، كۇردەلى ماسەلەلەردى اۋدانداعى قاتىستى ورىندارعا مالىمدەپ، حالىقتى كەدەيلىكتەن قۇتىلدىرىپ، اۋقاتتانۋ جولىنا باستاۋدىڭ جاڭا ءادىس-شارالارىن قارايلاستىرادى.

    لياۋنيڭ ولكەسى انشان قالاسىنىڭ شينجياڭعا باعىتتامالى كومەكتەسۋ قىزمەتى الدىڭعى شەپ باس شتابىنان ساۋان اۋدانىنا كومەككە كەلگەن كادرى ليۋ گولي ارالتوبە قىستاعىنىڭ قيىنشىلىق جاعدايىنان حابار تاپقاننان كەيىن، اۋدانداعى قاتىستى باسشىلاردىڭ سەرىك بولۋىندا ارالتوبە قىستاعىنا ىشكەرىلەي تەكسەرۋ زەرتتەۋ جۇرگىزىپ، ناق مايداندا قىستاقتىڭ جول جانە مادەنيەت قۇرىلىستارىن جاڭالاۋعا 200 مىڭ يۋان قارجى بوساتۋمەن بىرگە، وسى قىستاقتاعى تۇرمىستىق قيىنشىلىعى اۋىر داۋلەت وتباسىنا 15 مىڭ يۋان كومەك قارجى ۇسىنىپ، ونىڭ وقۋ جاسىنا تولسا دا وقي الماي وتىرعان تۋما ساقاۋ ، ەستي الماۋ ناۋقاسى بار نەمەرەسىنىڭ جالعاستى ەمدەلۋىنە كومەكتەستى.

    قىستاققا تۇسكەن قىزمەت اترەتى، قارجىنى ورنىن تاۋىپ ىستەتۋ مەن ۇنەمدەپ ىستەتۋ شارتى استىندا، ەڭ اۋەلى التىنقول وزەنى باس قۇبىرىنان ارالتوبەگە تارماق قۇبىر جەتكىزىپ، 115 وتباسىنىڭ تازا، تۇنىق سۋ تۇتىنۋىنا كەپىلدىك ەتتى. قىستاق پەن اۋىل ارالىعىنداعى 6 كيلومەترلىك جولعا شاعىل جاتقىزىپ ، 1200 مەتر ارالىققا سۋ سىڭبەيتىن توعان جاسادى . 1800 مەتر ۇزىندىقتاعى قىستاق اينالاسىنا بيىكتىگى 1.8 مەتر كەلەتىن قورعان جيناپ، ۇلتتار ىنتىماعى مەن باياندى تىنىشتىقتى ۇگىتتەۋدى مازمۇن ەتكەن سۋرەتتەر مەن كوركەم جازۋلاردى جازىپ، مادەنيەت تامىن بەزەندىردى. قىستاق ورتالىعىنان ولشەمدى ۆاسكەتبول دوپ مايدانىن قاتىرىپ، اۋىل جاستارىنىڭ مادەني قيمىلدارمەن شۇعىلدانۋىنا قولايلىلىق جاراتتى.

    قىستاق باستىعى ەربولاتتىڭ ايتۋىنشا، قىزمەت اترەتىندەگىلەر ۇستەگى جىلى كوكتەم، جاز ايلارىندا قىستاق ءىشى جولدارىن جوندەپ، اعاش ەگىپ ورتانى كورىكتەندىرۋمەن بىرگە، ارناۋلى اماندىق قورعاۋعا مىندەت وتەۋ بولمەسىن سالىپ، قىستاقتىڭ نەگىزگى قۇرىلعى قۇرىلىستارىن جىلۋمەن قامداۋ جۇيەسىن ىسكە قوسپاقشى ەكەن. بيىلعى كوكتەم مەرەكەسىندە ولار اۋىلدارىنا قايتپاي، نەگىزگى ساتىدا تاپجىلماي كەزەكشىلىك مىندەت اتقارىپ، تۇرمىس قيىنشىلىعى اۋىر 16 كەدەي وتباسىنا ۇن، ماي، كۇرىش قاتارلى حال سۇراۋ بۇيىمدارىن جەتكىزىپ بەرىپ، ولاردىڭ مەرەكەلەرىنىڭ مەرەيلى ءوتۋىن تىلەدى.

 

ءتىلشىنىڭ قىزمەت ورنى: ساۋان اۋدانى 2-ورتا مەكتەپ

جاۋاپتى رەداكتور:نۇرجان مينۋار قىزى