8 – كەزەكتى قىسقى ازيادا 19 – اقپاندا باستالادى، جۇڭگو كومانداسى 64 شاعىن ءتۇر بويىنشا بارلىق جارىستارعا قاتىناسادى

    جۇڭگو سپورت ساڭلاقتارى 17 - اقپاندا جاپونيانىڭ ساپپورو قالاسىنا جولعا شىعادى، 19 – اقپاندا سول ارادا 8 – كەزەكتى قسىقى ازيادانىڭ باستالۋ سالتى وتكىزىلەدى. بۇل جولى جۇڭگو ۋاكىلدەر ۇيىرمەسى 5 ءىرى ءتۇر، 11 تارماق ءتۇر، 64 شاعىن ءتۇر بويىنشا بارلىق جارىستاردا جۇلدەگە ۇمتىلادى، وسى رەتكى قىسقى ازيادا ارقىلى 2018 – جىلعى پيۋڭچاڭ قىسقى وليمپياداسىنا دايىندالۋ جاعدايىن سىناقتان وتكىزەمىز، سونىمەن بىرگە، 2022 – جىلعى بەيجيڭ قىسقى وليمپياداسىنا سپورتشىلاردى جاتتىقتىرىپ، تاجىريبە جيناقتايمىز. بۇرىنعى جارىستاردان قاراعاندا، جۇڭگو كومانداسىنىڭ ازياداعى باستى ارىپتەستەرى ــ وسى رەتكى قىسقى ازيادانى وتكىزەتىن جاپونيا مەن وڭتۇستىك كورەيا جانە قازاقستان كوماندالارى. ەرەكشە جاعداي بولماسا، اتالعان 4 كوماندا مەدال تاقتاسىندا الدىڭعى ورىندارعا جايعاساتىن بولادى.

    2018 – جىلعى پيۋڭچاڭ قىسقى وليمپياداسىنىڭ جاقىنداۋىنا وراي، ازياداعى ءارقايسى كوماندالار قىسقى وليمپياداعا دايىندالۋدىڭ ءتۇيىندى كەزەڭىنە ءوتتى، وسى سەبەپتەن قىسقى ازيادانىڭ جارىس الاڭىندا باسەكە قىزا تۇسەتىن بولادى.

    جۇڭگو، جاپونيا، وڭتۇستىك كورەيا، قازاقستان كوماندالارى ازيانىڭ قار – مۇز سپورتىندا ماڭىزدى ورىن الادى ءارى قىسقى ازيادادا ىلعي دا مەدال تاقتاسىندا الدىڭعى ءتورت ورىنعا جايعاسىپ كەلەدى. الدىڭعى كەزەكتى قىسقى ازيادا ويىندارىندا قازاقستان كومانداسى قارداعى سپورت تۇرلەرىنەن باسىمدىلىعىن بايقاتىپ، 32 التىن مەدالمەن ءبىرىنشى ورىنعا يە بولسا، جاپونيا جانە وڭتۇستىك كورەيا كوماندالارى جەكە – جەكە 13 التىن مەدالعا، جۇڭگو كومانداسى 11 التىن مەدالعا يە بولىپ، 2 – ورىننان 4 – ورىنعا دەيىن جايعاستى. وسى رەتكى قىسقى ازيادانىڭ الاۋى جاپونيادا جاعىلىپ وتىرعاندىقتان، مەدال تاقتاسىندا وزگەرىس بولۋى مۇمكىن. جۇڭگو ۋاكىلدەر ۇيىرمەسىنىڭ باستىعى گاۋ جىداننىڭ 10 – اقپاندا ۋاكىلدەر ۇيىرمەسىن قۇرۋ جيىنىندا ايتۋىنشا، جاپونيا ءوز جەرىندە وتەتىن جارىستا ەڭ ۇزدىك ناتيجەگە جەتۋدى ماقسات ەتىپ وتىر.

جاۋاپتى رەداكتور:سايراش تۇرارجان قىزى