التايدا قازاق شيپاگەرلىگىن قورعاۋ نىسانى جايلى تالقى وتكىزىلدى

    گۇلميرا داۋلەتبەك قىزى حابارلايدى. جۋىقتا مەملەكەت دارەجەلى بەيزاتتىق مادەنيەت مۇرالارىنىڭ ۋاكىلدىك نىسانى سانالاتىن قازاق ءداستۇرلى شيپاگەرلىگىن قورعاۋ جيىنى التاي قالاسىندا اشىلدى، شينجياڭنىڭ ءارقايسى جەرىنەن كەلگەن قازاق شيپاگەرلىگىمەن شۇعىلدانعان ماماندار مەن ەمشىلەر تالقى وتكىزىپ، قازاق شيپاگەرلىگىن قورعاۋ، ونى دامىتۋ جونىندە تاماشا ويلارىن ورتاعا قويدى.

    جيىننىڭ باستالۋ سالتىندا التاي ايماقتىق قازاق ەمشىلىگى شيپاحاناسىنىڭ باستىعى ەرجان داقار ۇلى قازاق ءداستۇرلى شيپاگەرلىگىن قورعاۋ جيىنىن اشۋ جونىندەگى ۇقتىرۋدى جەتكىزدى. التاي ايماقتىق مەديتسينا مەكتەبىنىڭ باستىعى ارعىنبەك ءانۋار ۇلى قازاق شيپاگەرلىگىنىڭ دامۋ جاعدايى جونىندە، التاي ايماقتىق مادەنيەت سارايى بەيزاتتىق مادەنيەت مۇرالارىن قورعاۋ ورتالىعىنىڭ ورىنباسار مەڭگەرۋشىسى جەڭىس قالەل ۇلى مەملەكەتتىك بەيزاتتىق مادەنيەت مۇراسىنا ءوتىنىش ەتۋدىڭ بارىستارى جايلى توقتالىپ، مەملەكەتتىك بەيزاتتىق مادەنيەت مۇراسىنا ەنگەن وتاشىلىق، ماي سىلاۋ، كۇيىك سىندى قازاق ەمشىلىگىنىڭ جالعاستىرۋشىلارى قولىنداعى بار ەمدەۋ ادىستەرىن مەملەكەتتىك بەيزاتتىق مادەنيەت مۇراسىنا قالاي ءوتىنىش ەتۋ جايلى تۇسىنىك بەردى.

    التاي ايماقتىق قازاق ەمشىلىگىن زەرتتەۋ ورنىنىڭ باستىعى اسقار قابدۋالىپ ۇلى: زەرتتەۋ ورنىمىز قازاق ءداستۇرلى شيپاگەرلىگى تۋرالى تەكسەرۋ - زەرتتەۋ جۇرگىزدى، ماتەريال جينادى، وقۋلىق قۇراستىردى، قىسقا مەرزىمدىك تاربيەلەۋ كۋرىستارىن اشتى، قازىر «قازاق شيپاگەرلىك تەحنيكاسى» كىتابىن قۇراستىرىپ باسپادان شىعارۋ الدىندا تۇر. مادەنيەت مۇرالارىن جالعاستىرۋ، قورعاۋ قۇرىلىمىن قۇرىپ، بەيزاتتىق مادەنيەت مۇرالارىنا ءوتىنىش ەتۋ، تۇراقتاندىرۋ، ەمدەۋ قۇرىلىمدارىمەن سايكەسە وتىرىپ، حالىق ەمشىلەرىن ارحيۆتەستىرىپ قورعاۋدى، حالىق ەمشىلەرىنىڭ سالاۋاتىن ءبىر تۇتاس تۇراقتاندىرىپ باسقارۋدى كۇشەيتىپ، قازاق ءداستۇرلى شيپاگەرلىگىنىڭ كلينيكا بارىسىندا بىرتىندەپ جۇيەلەنۋىن، عىلميلانۋىن ماڭىزدى بۋىن رەتىندە مىقتى ۇستاپ، قازاق شيپاگەرلىگىن حالىقارالىق بەيزاتتىق مادەنيەت مۇراسىنا ەنگىزۋگە كۇش سالامىز، - دەدى.

    ىلە قازاق اۆتونوميالى وبلىستىق قازاق شيپاگەرلىگىن زەرتتەۋ ورنىنان كەلگەن كامىشبەك نۇرمۇقامەت ۇلى بىلاي دەدى: «قازاق شيپاگەرلىگىن قورعاۋ جانە بەيزاتتىق مادەني مۇراعا قالاي ءوتىنىش ەتۋ تۋراسىندا اشىلعان بۇل جيىن بارىسىندا كوپتەگەن تۇسىنىككە يە بولدىم. ىلە وبلىسىندا قازاق شيپاگەرلىگىن قورعاۋ، بەيزاتتىق مادەنيەت مۇراسىنا قالاي ءوتىنىش ەتۋ جونىندە جۇمىستارىمىزدىڭ ءالى دە كەمشىل ەكەنىن بايقادىم. بۇدان كەيىن ىلە وبلىسىنداعى قازاق ەمشىلىگىمەن شۇعىلداناتىن مامانداردىڭ ەمدەۋ ادىستەرىن جيناپ، ولاردىڭ تۇسىنىگىن ارتتىرىپ، ولاردىڭ قولىنداعى اتادان بالاعا جالعاسقان ەمدەۋ ونەرىن قالاي قورعاۋ، ونى جالعاستىرۋ تۋراسىندا كوپتەپ ۇگىت جاساپ، قازاق شيپاگەرلىگىن جالعاستى دامىتۋ جونىندە جۇمىستار ىستەيمىز».

    تارباعاتاي ايماقتىق جۇڭگوشا ەمدەۋ شيپاحاناسى قازاق ەمشىلىك ءبولىمىنىڭ مەڭگەرۋشىسى ەربول ءجۇمادىل ۇلى: ۇلتىمىزدىڭ بوگەنايى بولەك ەمدەۋ ونەرى حالىقاراعا دەيىن بەت الىپ، دامۋ ۇستىندە. قازاق شيپاگەرلىگىنىڭ ءار رەت اشىلعان جيىندارىنا قاتىناسىپ، عىلمي ماقالا جاريالادىم. وسى جولعى اشىلعان قازاق شيپاگەرلىگىن مەملەكەتتىك بەيزاتتىق مادەنيەت مۇراسىنا ءوتىنىش ەتۋ، ونى قورعاۋ، مۇراگەرلىك ەتۋ جيىنىنان ءوزىمىزدىڭ ىستەتىپ جۇرگەن ەمدەۋ ونەرىمىزدى قالاي ساقتاپ قالۋ، ونى جالعاستىرۋ جونىندە بەلگىلى تۇسىنىكتەرگە يە بولدىم. تارباعاتاي ايماعىندا جۇڭگوشا ەمشىلىك شيپاحاناسىندا قازاق ەمشىلىك ءبولىمى، تولى اۋداندىق قازاق شيپاگەرلىك شيپاحاناسى بار، ءدوربىلجىن اۋدانىنان اۋدان دارەجەلى قازاق ەمشىلىك شيپاحاناسى قۇرىلماقشى، شاعانتوعاي اۋدانى، ساۋان اۋدانىندا قازاق ەمشىلىك ءبولىمى قۇرىلىپ، العاشقى جۇمىستارىن باستاپ كەتتى. ءبىز قايتىپ بارعان سوڭ، اتادان بالاعا جالعاسقان قازاق ەمشىلىگىمەن شۇعىلدانىپ جاتقان قارت مامانداردىڭ ءوزىنىڭ ىستەتىپ جاتقان قولىنداعى ونەرىن قالاي ساقتاۋ، قالاي كادەگە جاراتۋ تۋراسىنداعى تاجىريبەلەرىن جەتكىزىپ، تارباعاتاي ايماعىنداعى قازاق شيپاگەرلىگىن دامىتۋعا، بۇدان كەيىنگى ۇرپاقتارعا جالعاسۋىنا، تارباعاتاي ايماعىنىڭ قازاق ەمشىلىگىن حالىقاراعا قاراي بەت الدىرۋىنا كۇش سالامىز، - دەدى.

جاۋاپتى رەداكتور:سايراش تۇرارجان قىزى