قىلمىسكەر مەن باس جورانىڭ اناسىنا جازعان حاتتارى

    چىن شيۋجين

    (1) قىلمىسكەردىڭ حاتى

    اياۋلى اناشىم:

    ەرتەڭ جازا مايدانىنا اپارىلاتىن بولدىم، وسى كۇنگە قالاي عانا دۋشار بولعانىمدى بىلسەم بۇيىرماسىن، وتكەن كۇندەر ەلەسى كوز الدىمنان بۇلدىراپ وتۋدە...

    ءۇش جاسىمدا وزىڭمەن بىرگە دالادا قۇلدىراڭداپ، جۇگىرىپ ويناپ جۇرگەنىمدە، ابايسىزدا اياعىم تاسقا شالىنىپ، جىعىلىپ قالدىم، سول كەزدە ءسىز مەن شالىنىپ قالعان تاستى كىنالادىڭىز دا، مەنى سۇيەپ تۇرعىزدىڭىز. اسىلىندە، جىلاماي - اق قويسام دا بولاتىن ەدى، الايدا مەن ءسىزدىڭ مۇسىركەۋىڭىزدى ەستىپ، جارتى كۇن جىلاعانىم ءالى ەسىمدە، ءسىزدىڭ بىلاي ىستەۋىڭىز مەنى ۋاتۋ ءۇشىن ەكەنىن ول كەزدە مەن بىلمەگەن ەدىم.

    ءتورت جاسقا شىققان جىلى تەلەۆيزور كورىپ، كەشكى تاماقتى ىشپەگەن كەزىمدە، تاماقتى كوتەرىپ قاسىما كەلىپ، تاماقتى قاسىقپەن اۋزىما سالىپ جەگىزىپ، مەنىڭ تۇرمىس دەگەن وسىنداي راقات بولادى ەكەن - اۋ! دەگەن ويعا كەلۋىمە سەبەپشى بولدىڭىز، مەن ءسىزدىڭ بۇلاي ىستەۋىڭىز مەنىڭ تاماقتى توگىپ - شاشىپ، كيىمدەرىمدى كىرلەتىپ الماۋىم ءۇشىن قولدانعان شاراڭىز ەكەنىن سول كەزدە تۇسىنبەگەن ەدىم.

    التى جاسقا شىققان جىلى مەنى بالالار ويىنشىعىن ساتاتىن دۇكەنگە ەرتىپ بارىپ، جاڭا جىلدىق تارتۋدان ءبىر تال عانا الۋىما بولاتىنىن ايتتىڭىز، الايدا مەن انا - مىنا ويىنشىقتاردى الامىن دەپ قيعىلىق سالىپ، دۇكەندى باسىما كوتەرىپ، ەدەندە دومالاپ جاتىپ الىپ، ءسىز بارلىعىنىڭ اقشاسىن تولەپ بولعاننان كەيىن عانا ۋانۋشى ەدىم، مەن بۇل ءتاسىلىمنىڭ كادەگە جاراعانىن ۇققانىممەن، ءسىزدىڭ باسقالاردىڭ الدىندا بەتىڭىزدەن جەر باسۋدان قورىنىپ، شاراسىز سولاي ىستەگەنىڭىزدى بىلمەدىم.

    سەگىز جاسقا شىققان جىلى بايپاعىمدى جۋايىن دەسەم مەنىڭ تازا جۋا الماۋىمنان، ىدىس - اياق جۋايىن دەسەم شاعىپ الۋىمنان، وزىمە تاماق سالىپ الايىن دەسەم كۇيىپ قالۋىمنان الاڭدادىڭىز دا، ماعان تۇرمىستا ۇنەمى كەزىگەتىن حاۋىپ - قاتەرگە بەتپە - بەت كەلۋگە بولاتىنىن ۇعىندىرماي، قايتا - قايتا ىستەپ اۋرە بولۋدان قاشقالاقتاپ، سولاي ىستەگەنىڭىزدى بىلمەگەن ەدىم.

    ون جاسىمدا مەنى پىسىقتاۋ كلاستارى مەن ەكى ءتۇرلى كۋرجەككە قاتىناستىرىپ، مەن ۇيرەنۋدەن قاجىعانىمدا ماعان جاپا شەكپەيىنشە، جاقسى ادام بولۋعا بولمايدى دەگەن سىندى اقىل ايتىپ، ماعان پىسىقتاۋ كلاستارى مەن گۇرجەككە قاتىناسۋدىڭ سونشاما ازاپتى ءىس ەكەنىن سەزىندىردىڭىز. ءبىراق مەن ءسىزدىڭ كۇندەردىڭ كۇنىندە مەنىڭ ناتيجەم ارقىلى دوستارىڭىزدىڭ الدىندا ەڭسەڭىزدى كوتەرىپ ءجۇرۋ ءۇشىن ىستەپ وتىرعانىڭىزدى سول كەزدە بىلسەم بۇيىرماسىن.

    مەن ون ءۇش جاسقا شىققان جىلى دوپ تەۋىپ ءجۇرىپ، كورشى ءۇيدىڭ تەرەزەسىنىڭ اينەگىن شاعىپ الدىم، ءسىز سىنعان اينەكتى تولەپ بەرگەننەن كەيىن، مەنى كورشىدەن كەشىرىم سۇراتىپ، مەنىڭ تەك «كەشىرىڭىز» دەگەن ءبىر اۋىز سوزبەن وتكىزگەن اعاتتىقتىڭ ورنىن تولتىرۋعا بولادى ەكەن - اۋ! دەگەن ويعا كەلۋىمە سەبەپشى بولدىڭىز. الايدا مەن ءسىزدىڭ كورشىنىڭ سىنعان اينەگىن تولەۋگە كەتكەن اقشاعا ءىشىڭىزدىڭ ۋداي اشىپ تۇرعانىن بىلمەدىم.

    ون بەس جاسىمدا مەنى پيانينو ۇيرەنۋگە اپارىپ، باسقالاردان اقشا قارىز سۇراپ، ماعان ءبىر دانا پيانينو ساتىپ الىپ بەردىڭىز، الايدا ءبىر ايدان كەيىن سول پيانينوعا جولاماي كەتتىم. ءسىز ماعان اقشا بولماسا دا كەرەكتى نارسەنى ساتىپ الۋعا بولاتىنىن ۇعىندىردىڭىز، ەسەسىنە مەن ءسىزدىڭ سول قارىزدى ءۇش جىل دەگەندە زورعا قايتارىپ بولعانىڭىزدى بىلمەدىم.

    ون توعىز جاسىمدا مەن ەرىكتى بولۋعا تىزىمدەلدىم، ءسىز مەنىڭ اۋەسىمە قاراي جۇيەلى تالداۋ جاساي وتىرىپ، مەنىڭ بەكىمىمدى بىرنەشە رەت قايتالاپ سۇرادىڭىز دا، مەنىڭ كەلەشەگىمە ءوزىم جاۋاپتى بولۋىمدى ۇعىندىرعاننىڭ ورنىنا، ءوز ويلاعانىڭىز بويىنشا ءجۇرۋىمدى ۇعىندىردىڭىز.

    جيىرما جاسقا شىققان جىلى مەن قول تەلەفونىمدى اۋىستىرعىم كەلەتىنىن، جاڭا قول تەلەفون ساتىپ السام سىزبەن ۇنەمى حابارلاسىپ تۇرۋىما بولاتىنىن ايتتىم، ءسىز ەكى سوزگە كەلمەي - اق مەنىڭ كارتچكاما 3000 يۋان سالىپ جىبەردىڭىز، جاڭا قول تەلەفون ساتىپ العاننان كەيىن، ۇنەمى قالىڭدىعىما تەلەفون شالۋدان تىس، سىزگە ءبىر جىلدا ساناۋلى عانا تەلەفون شالىپ حابارلاستىم، ماعان سىزدەن كەز كەلگەن ۋاقىتتا اقشا الا بەرۋىمە بولاتىنىن ۇعىندىردىڭىز، الايدا مەن ءسىزدىڭ تۋىلعان كۇنىڭىزدە مەنىڭ تەلەفون شالۋىمدى اسىعا كۇتىپ وتىراتىنىڭىزدى بىلمەدىم.

    جيىرما ءتورت جاسىمدا جوعارى مەكتەپ تاۋىسىپ كەلگەننەن كەيىن، اقشا جۇمساپ ءجۇرىپ مەنى ءبىر جۇمىس ورنىنا قىزمەتكەر ەتىپ ورنالاستىردىڭىز دا، ماعان جوعارى مەكتەپتە وقۋدىڭ تەك تەمىر توستاعاننان ەڭبەكاقى الاتىن قىزمەتكەر بولۋ ءۇشىن عانا ەكەن عوي! دەگەندى سەزىندىردىڭىز، الايدا مەن ءسىزدىڭ وسى جۇمىستار ءۇشىن قانشالاعان ادامدارعا جالىنىشتى بولعانىڭىزدى بىلمەدىم.

    مەن جيىرما جەتى جاسقا شىققان جىلى تالاي قىزدارمەن تانىسسام دا، ولار مەنى «جاۋاپكەرسىزسىڭ، ءالى بالا ەكەنسىڭ» دەپ بويلارىنا توعىتپادى، ءسىز ماعان «نەكە دەگەن عايىپتىڭ ءىسى، بۇيىرعان بىرەۋ بار، ولار سەنىڭ تەڭىڭ ەمەس» دەدىڭىز، مەن وزىمشە مەنى مەنسىنبەگەن قىزدار وكىنەتىن بولادى دەپ ويلايتىنمىن، الايدا ءسىزدىڭ مەنەن جاسىرىپ، كومەسكىدە نەكەگە تانىستىرۋ ورنىنا بارعانىڭىزدى بىلمەدىم.

    وتىز ەكى جاسىمدا مەن قوماقتى قارىزدىڭ استىندا قالدىم، ءسىز ماعان اشۋ شاقىرام دەپ اۋىرىپ قالدىڭىز، دەگەنمەن، سوڭىندا مەنىڭ قارىزدارىمدى ءسىز قايتاردىڭىز دا، ماعان مەيلى قانداي ىسكە دۋشار بولسام دا شەشەم بار عوي! دەيتىن يدەياعا كەلۋىمە سەبەپشى بولدىڭىز، الايدا مەن ءسىزدىڭ زەينەتكەرلىك قاراجاتىڭىزدى جۇمساپ بولعانىڭىزدى بىلمەدىم.

    وتىز بەس جاسىمدا سىزدەن ەندىگارى اقشا الا المايتىن بولعاننان كەيىن، توناۋشىلىق ىستەپ، ادام ءولتىردىم، مەنىڭ ولىمگە ۇكىم ەتىلگەنىمدى ەستىگەندە، كوز جاسىڭىز كول بولىپ، «ءومىر بويى قۇلشىنعانداعى جەتەم دەگەن بيىگىم وسى بولدى ما؟ بۇل ماعان ادىلەتسىز بولدى» دەپ ءتاڭىردى قارعاپ - سىلەدىڭىز.

    مەن ويلانا كەلە، ءسىزدىڭ مەنى اسىرا جاقسى كورۋىڭىزدەن ءبىر - بىرلەپ مەنىڭ ەرجەتۋ ورايىمدى ۇرلاپ، قايتا - قايتا مەنىڭ ءومىر ءسۇرۋ ەركىندىگىمدى تۇنشىقتىرىپ، ءومىر ءسۇرۋ ۇقىعىمنان ماقرۇم ەتكەنىڭىزدى تۇسىنگەندەي بولدىم. ءدال قازىر ءولىم اۋزىندا تۇرسام دا ءوزىم ءالى دە ەسەيىپ - ەرجەتپەگەندەيمىن. دۇرىس بولماعان تاسىلمەن بالاعا بوداۋ بەرۋ ەكى ۇرپاق ادامدى قۇردىمعا جىبەرۋدەن باسقا دانەڭە دە ەمەس ەكەن - اۋ، بالا تاربيەلەۋ ورايى ەكى كەلمەيدى، ءسىز مەنى ءوز قولىڭىزبەن باس كەسەر جازا مايدانىنا تاپسىردىڭىز...

    اياۋلى اناشىم: دەنساۋلىعىڭىزدى ايالاڭىز، مەن ەرتەڭ - اق كەلمەستىڭ كەمەسىنە مىنەمىن، مۇمكىن و دۇنيەدە دۇرىس تاربيە جولىن تاۋىپ، وزىمە ءتان باقىتىمدى تابارمىن.

    قوش بولىڭىز.

    ءسىزدى كىنالارىن دا، جاقسى كورەرىن دە بىلەمەيتىن ۇلىڭىزدان

جاۋاپتى رەداكتور:سايراش تۇرارجان قىزى