شي جينپيڭ ا ق ش زۇڭتۇڭى ترامپپەن تەلەفوندا سويلەستى

    شينحۋا اگەنتتىگىنىڭ 10 - اقپاندا بەيجيڭنەن بەرگەن حابارى. 10 - اقپاندا مەملەكەت ءتوراعاسى شي جينپيڭ ا ق ش زۇڭتۇڭى ترامپپەن تەلەفوندا سويلەستى.

    شي جينپيڭ ترامپتىڭ ا ق ش زۇڭتۇڭى بولىپ رەسمي مىندەتكە وتىرعاندىعىن قۇتتىقتادى، ترامپتىڭ 8 - اقپاندا حات جازىپ، يۋانشياۋ مەرەكەسى جانە جۇڭگوشا كالەندارداعى تاۋىق جىلى بايلانىسىمەن جۇڭگو حالقىنا مەرەكەلىك سالەم جولداعانىنا العىس ايتتى، ترامپتىڭ جۇڭگو - ا ق ش سەلبەستىگىن قۇلشىنا كەڭەيتۋدى، جۇڭگو مەن ا ق ش ەلدەرىنە جانە حالىقارالىق قوعامعا ءتيىمدى، ناتيجەلى ەكى جاقتى قاتىناستى دامىتۋدى قالايتىنىن بىلدىرگەنىن ايرىقشا القادى.

    ترامپ بۇعان العىس ءبىلدىرىپ، ءتوراعا شي جينپيڭ مەن جۇڭگو حالقىنىڭ مەرەكەسىنە تاعى ءبىر رەت قۇتتى بولسىن ايتتى.

    شي جينپيڭ مىنالاردى اتاپ كورسەتتى: زۇڭتۇڭ مىرزا مىندەتكە وتىرعاننان بەرى، جۇڭگو مەن ا ق ش ەكى ەل بىرگە كوڭىل بولەتىن ماسەلەلەر جونىندە تىعىز قارىم - قاتىناستى ساقتادى. كەزەكتەگى الماعايىپ، كۇردەلى حالىقارالىق جاعداي مەن تولاسسىز تۋىلعان ءتۇرلى سىن - سايىستار الدىندا، جۇڭگو مەن ا ق ش - تىڭ سەلبەستىكتى كۇشەيتۋىنىڭ قاجەتتىلىگى مەن كوكەي تەستىلىگى ونان ارى ارتا ءتۇستى. جۇڭگو مەن ا ق ش ەكى ەل دامۋىنىڭ ءبىر - بىرىنە دەمەۋ، ءبىر - بىرىنە جەبەۋ بولۋىنا، تاراپتاردىڭ جاقسى سەلبەستىك سەرىكتەردەن بولۋىنا ابدەن بولادى. جۇڭگو - ا ق ش قاتىناسىن جاقسارتۋ ەكى ەل حالقىنىڭ ءتۇبىرلى مۇددەسىنە ۇيلەسەدى، سونىمەن بىرگە، بۇل − جۇڭگو مەن ا ق ش سىندى 2 ءىرى ەلدىڭ الەم الدىندا ارقالاۋعا ءتيىستى جاۋاپكەرشىلىگى. جۇڭگو دۇنيە جۇزىندەگى ءار ەلمەن جاراسىمدى قارىم - قاتىناس جاساۋعا، سەلبەسىپ تەڭ يگىلىككە كەنەلۋگە بەلسەنە كۇش سالادى. ءبىز ا ق ش پەن ەكونوميكا، قارجى قوسۋ، عىلىم - تەحنيكا، ەنەرگيا، گۋمانيتارلىق، نەگىزدىك قۇرىلعىلار سياقتى سالالارداعى ءوزارا ءتيىمدى سەلبەستىكتى كۇشەيتۋدى، حالىقارالىق جانە وڭىرلىك ىستەردە پىكىرلەسۋ مەن سايكەسۋدى كۇشەيتىپ، الەمنىڭ بەيبىتشىلىگى مەن تۇراقتىلىعىن بىرگە قورعاۋدى قالايمىز.

    ترامپ بىلاي دەدى: ءتوراعا شي جينپيڭمەن تەلەفوندا سويلەسكەنىمە ايرىقشا قۋانىشتامىن، ا ق ش پەن جۇڭگونىڭ جوعارى جىكتەگىلەردىڭ قارىم - قاتىناسىن ساقتاۋى ايرىقشا ماڭىزدى. مەن مىندەتكە وتىرعاننان بەرى تاراپتاردىڭ تىعىز بايلانىستى ساقتاعانىنا ريزامىن. مەن جۇڭگونىڭ دامۋىنىڭ تاريحي تابىسقا قول جەتكىزگەنىنە ءتانتىمىن، بۇل ءۇشىن جۇڭگو حالقىنا قۇرمەت بىلدىرەمىن. ا ق ش پەن جۇڭگو قاتىناسىن دامىتۋ ا ق ش حالقى تاراپىنان كەڭ قولداۋعا يە. مەن ا ق ش پەن جۇڭگونىڭ سەلبەستىك سەرىكتەس رەتىندە، بىرگە قۇلشىنۋ ارقىلى ەكى جاقتى قارىم - قاتىناسىمىزدى تاريحي جاڭا بيىككە كوتەرۋگە بولاتىنىنا سەنەمىن. ا ق ش ەكى ەلدىڭ ەكونوميكا - ساۋدا، قارجى قوسۋ سياقتى سالالار مەن حالىقارالىق ىستەردە ءوزارا ءتيىمدى سەلبەستىكتى كۇشەيتۋگە كۇش سالادى.

    ترامپ مىنانى باسا دارىپتەدى: مەن ا ق ش ۇكىمەتىنىڭ ءبىر جۇڭگو ساياساتىن جۇرگىزۋىنىڭ ايرىقشا ماڭىزدىلىعىن تولىق تۇسىنەمىن. ا ق ش ۇكىمەتى ءبىر جۇڭگو ساياساتىنا بۇلجىماي تاباندى بولادى.

    شي جينپيڭ ترامپتىڭ ا ق ش - تىڭ ءبىر جۇڭگو ساياساتىندا تاباندى بولاتىنىن باسا دارىپتەگەنىن القاپ، ءبىر جۇڭگو پرينسيبى جۇڭگو - ا ق ش قاتىناسىنىڭ ساياسي نەگىزى ەكەنىن اتاپ كورسەتتى. جۇڭگو ا ق ش - پەن بىرگە قۇلشىنىپ، قارىم - قاتىناستى كۇشەيتىپ، سەلبەستىكتى كەڭەيتىپ، جۇڭگو - ا ق ش قاتىناسىنىڭ اقاۋسىز، ورنىقتى دامۋىن ىلگەرىلەتىپ، ءتىپتى دە مول تابىستارعا قول جەتكىزىپ، ەكى ەل حالقىنا جانە ءار ەل حالقىنا باقىت جاراتۋدى قالايدى.

    ەكى ەل باسشىلارى تىعىز بايلانىستى ساقتاۋعا، بىرگە كوڭىل بولەتىن ماسەلەلەر جونىندە دەر كەزىندە پىكىر اۋىستىرىپ، ءار سالاداعى اۋىس - كۇيىس پەن سەلبەستىكتى كۇشەيتۋگە قوسىلدى، سونداي - اق تەزىرەك كەڭەسۋدى كۇتەتىندىكتەرىن ءبىلدىردى.

جاۋاپتى رەداكتور:سايراش تۇرارجان قىزى