قىزىل ميا

    قىزىل ميا − بۇرشاقتار تۇقىمداسىنىڭ ميا تۋىسىنا جاتاتىن كوپ جىلدىق ءشوپ تەكتەس وسىمدىك. بوتانيكالىق ەرەكشەلىگى: بيىكتىگى 30 - 100 سانتيمەتر. بۇكىل ءشوبى تۇكتى كەلەدى. تامىر ساباعى (كوگەن تامىرى) جۇمىر ءارى جۋان، سىرتقى قابىعى قىزىل قوڭىر ءتۇستى نەمەسە قارا قوڭىر ءتۇستى، ءدامى ءتاتتى. ساباعى تىك، ءتۇپ جاعى اعاش تەكتەس، جوعارى جاعى كوپ بۇتاقتى بولادى. تاق قاۋىرسىندى كۇردەلى جاپىراقتار كەزەكتەسىپ ورنالاسادى، ءبىر قاتاردا 7 - 17گە دەيىن ۇساق جاپىراقشالارى وسەدى. جاپىراعى جۇمىرتقا فورمالى نەمەسە سوپاقشا، ءبۇتىن جيەكتى بولادى. شاشا گۇل شوعىرى ساباق قولتىعىندا وسەدى، گۇلى كوبەلەك فورمالى، كوگىلدىر ءتۇستى نەمەسە قىزىل كوك ءتۇستى. بادانا جەمىسى وراق ءتارىزدى يمەك، قوڭىر ءتۇستى، سىرتىندا ءجيى تىكەن تۇتىكشەلەرى وسەدى. وسەتىن ورىندارى: قۇمدى شولدەردە، جايلاۋدىڭ قۇمدى توپىراقتى جەرلەرىندە وسەدى. بۇكىل شينجياڭعا تارالعان.

    دارىلىك بولەگى جانە ونى جيناۋ: قىزىل ميانىڭ تامىرى ءدارى. ونى كوكتەمدە جانە كۇزدە قازىپ الىپ، ۇساق تامىرلارى مەن وركەندەرىن الىپ تاستاپ، جۋىپ تازالاپ كەپتىرەدى.

    ەم بولاتىن اۋرۋلارى: قىزىل ميانىڭ ىستىقتى باسىپ، ۋىتتى قايتارۋ، كوك باۋىردى كۇشەيتۋ، جوتەلدى باسۋ رولى كورنەكتى بولاتىندىقتان، ىستىق جوتەل، جۇتقىنشاق - تاماق قابىنۋ جانە اسقازان، ون ەكى ەلى ىشەك جاراسى سياقتىلاردى ەمدەۋگە پايدالانىلادى.

جاۋاپتى رەداكتور:سايراش تۇرارجان قىزى