«ينتەرنەتتەگى جۇڭگو. 2016 - جىلى حالىقتى اسەرلەندىرگەن» ينتەرنەت جىل ادامدارىنىڭ ەسىمدىگى جاريالاندى

    اۆتونوميالى رايونىمىزدان «شەكارا كۇزەتۋشى قارت» ۋي دىيۋ ەسىمدىكتەن ورىن الدى

    شينحۋا اگەنتتىگىنىڭ 21 - قاڭتاردا بەيجيڭنەن بەرگەن حابارى. شينحۋا اگەنتتىگى وتكىزگەن «ينتەرنەتتەگى جۇڭگو. 2016 - جىلى حالىقتى اسەرلەندىرگەندەرگە» سيلىق تاپسىرۋ سالتى 21 - قاڭتاردا جۇڭگو مەديا ۋنيۆەرسيتەتىندە ءوتتى.

    بيىلعى سيلىق يەگەرلەرىنىڭ اراسىندا، كەيبىرەۋلەرى بار ءومىرىن توڭكەرىستىك سەنىمگە ارناعان بولسا، كەيبىرەۋلەرى جۇرەك قانىن، ماڭداي تەرىن وتاننىڭ شەكاراسىنا سىڭدىرگەن... ولار كىرشىكسىز كوڭىلدەرىمەن ءداۋىردى اسەرلەندىرەتىن كۇش تۋدىرىپ، قاراپايىم ىستەرىمەن كەرەمەت ءومىر داستانىن جازدى.

    «شەكارا كۇزەتۋشى قارت» ۋي دىيۋ شەكارا بويىندا جارتى عاسىرعا جۋىق تۇرمىس كەشىرىپ، 200 مىڭ كيلومەترگە جۋىق شەكارا لەنياسىن مىندەتتى تۇردە شارلادى، 76 جاستاعى ول قارا كىرپىشتەن قالانعان ۇيدە تۇرادى، ىشكەنى تۇزدى سۋ، جاپان تۇزدە قارلى بوران، اش قاسقىرلارمەن الىسىپ، شەكارا بويىنداعى «جاندى بەلگى» اتاندى.

    قىستاق شيپاگەرى حى شيڭلۇڭ 80 - جىلداردىڭ تۋماسى. اۋىلداستارى ونى ءوز بالاسىنان ارتىق كورەدى. «الەۋمەتتىك يگىلىك ىستەرىندەگى ايتۋلى ادام» ليۋ تيانميڭ قاراپايىم ەڭبەكشىلەردى قايىر - ساحابات ىستەرىنە ات سالىسۋعا باستادى. «قورمال اپەكە» ليۋ مەي قوعامدى بۇقپا اۋرۋىنا ءمان بەرۋگە شاقىردى. «سۋ ەتىك شۋجي» پاڭ چييۋاندى اۋىلداستارى «سۋ ەتىك شۋجي»، «ۇقىپتى ادام» دەپ اتايدى. «توڭمويىن» جياڭ چۋانچۇن − ەسىرتكىدەن تيۋ ورنىنداعى جاڭاشىل باستىق. 73 جاسقا كەلگەن «مىسىق ايۋ اكە» اتانعان چىن يۇيسۇن ءالى دە ءبىرىنشى شەپتە قىزمەت ەتىپ كەلەدى. «ءتاتتى ۇيقىعا باتقان» لي جينلۇڭ، ونىڭ قولىندا اس ىدىسىن ۇستاعان بەتى ۇيقىعا كەتكەن سۋرەتىنىڭ استارىندا ونىڭ تاسقىنمەن 4 كۇن، 3 ءتۇن ايقاسقان حيكاياسى بار. «قۇلىپتاس ورناتۋ جولىندا عاسىر اتتاعان ۇزاق جورىقتى» باستان كەشىرگەن جاڭ چۇڭيۇي قىزىل ارميا جاۋىنگەرلەرىنە ارناپ مەملەكەت بويىنشا كولەمى ەڭ ۇلكەن قۇلىپتاس ورناتتى. «ارمانعا جول اشۋشى» ۋاڭ چۇن 50 جاسىندا ارمانىن ىسكە اسىرۋ ءۇشىن شيشا توپ ارالىنا بارىپ تامىر تارتتى.

    سانشي، گۋاڭدۇڭ، چۇڭچيڭ، حۋنان، شينجياڭ، فۋجيان، گۇيجوۋ، سىچۋان، حاينان سياقتى جەرلەردەن كەلگەن، حالىق اراسىنان شىققان وسى باتىرلار اقپارات قۇرالدارىنىڭ، مامانداردىڭ باعالاۋى، عالامتور قولدانۋشىلاردىڭ داۋىس بەرۋى سياقتى وتكەلدەردەن ءوتىپ، بۇكىل ەل حالقىنا تانىلدى. ولاردىڭ ءىس ىزدەرى «ينتەرنەتتەن باستاۋ الىپ، ينتەرنەتتە تارالىپ، ينتەرنەتتە ىقپالداستىق تۋدىرىپ، ينتەرنەتكە اسەر ەتتى». ولاردىڭ اڭگىمەسى سان مىڭداعان عالامتور قولدانۋشىلاردىڭ جان - دۇنيەسىن تەبىرەنتىپ، اقاۋسىز، ىزگىلىككە ۇمتىلعان قوعامدىق سالت قالىپتاستىرۋدا بەلسەندى ىلگەرىلەتۋ رولىن اتقاردى.

جاۋاپتى رەداكتور:سايراش تۇرارجان قىزى