قازاقپارات اگەنتتىگى" />

بۇگىن - نۇرعيسا تىلەنديەۆتىڭ تۋعان كۇنى

    استانا. قازاقپارات - بۇگىن - كومپوزيتور، ديريجەر، ك س ر و حالىق ءارتىسى، قازاقستاننىڭ ەڭبەك سىڭىرگەن ونەر قايراتكەرى، قازاقستان مەملەكەتتىك سىيلىعىنىڭ لاۋرەاتى، حالىق قاھارمانى تىلەنديەۆ نۇرعيسا اتاباي ۇلىنىڭ تۋعان كۇنى. داۋلەسكەر دومبىراشى 1925-جىلى 1- ءساۋىر كۇنى الماتى وبلىسى ىلە اۋدانىندا دۇنيەگە كەلگەن. الماتى كونسەرۆاتورياسىن (قازىرگى قۇرمانعازى اتىنداعى قازاق ۇلتتىق كونسەرۆاتوريا)، ماسكەۋ مەملەكەتتىك كونسەرۆاتورياسىن بىتىرگەن. 1952-1961-جىلدارى - اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديريجەرى. 1960-1964-جىلدارى - قازاقتىڭ حالىق اسپاپتار وركەسترىنىڭ باس ديريجەرى. 1968-1981-جىلدارى - «قازاق فيلم» كينوستۋدياسى مۋزىكا رەداكسياسىنىڭ باس رەداكتورى. 1981-جىلدان «وتىرار سازى» فولكلورلىق-ەتنوگرافيالىق ءانسامبلىنىڭ ۇيىمداستىرۋشىسى ءارى كوركەمدىك جەتەكشىسى قىزمەتتەرىن اتقاردى. «التىن تاۋلار» وپەراسىنىڭ (ق. قوجامياروۆپەن بىرگە)، «دوستىق جولىمەن» بالەتىنىڭ (ل. ستەپانوۆپەن بىرگە)، «ورتەكە» بالەت-پوەماسىنىڭ، «مەنىڭ قازاقستانىم» كانتاتاسىنىڭ، وركەسترگە ارنالعان «پوەما»، «اتا تولعاۋى»، «اقساق قۇلان»، «اققۋ»، «ارمان»، «ماحامبەت»، «كوش كەرۋەن» پوەمالارى مەن «حالىق قۋانىشى»، «قايرات»، «جەڭىس سالتاناتى» اتتى كىرىسپەلەردىڭ، 400 گە تارتا ءان مەن رومانستىڭ اۆتورى. 50 دەن استام درامالىق قويىلىمعا، 19 كوركەم فيلمگە، 17 مۋلتيپليكاتسيالىق فيلمگە، 14 دەرەكتى-حرونيكالىق فيلمگە مۋزىكا جازدى. 1998-جىلى كوز جۇمعان. ەكى رەت ەڭبەك قىزىل تۋ وردەنىمەن ماراپاتتالعان. استانا، الماتى قالالارىندا نۇرعيسا تىلەنديەۆ اتىنداعى كوشە بار.

جاۋاپتى رەداكتور:سايراش تۇرارجان قىزى