كودەكتىڭ كومپوزيتورلىعى تۋرالى از ءسوز

    نۇرلىبەك ماۋلەنبەك ۇلى

    ەلىمىز وسى زامان قازاق ادەبيەتىنىڭ نەگىزىن سالۋشىلاردىڭ ءبىرى، توكپە جىردىڭ ءدۇلدۇلى، تالانتتى ءسوز زەرگەرى كودەك بايشىعان ۇلى مارالبايەۆتى تانۋدىڭ تەرەڭدەۋىنە بايلانىستى، سوڭعى كەزدەردە اقىننىڭ بىزگە بەيتانىس بولىپ كەلگەن ءبىر قىرى التىننىڭ سىنىعىنداي نۇر شاشىپ، ءبىزدى ىشكەرىلەي ىزدەنە تۇسۋگە جەتەلەگەن ەدى. اشىپ ايتار بولساق، بۇل كودەك اقىننىڭ كومپوزيتورلىعى جونىندەگى كەي دەرەكتەمەلەر بولاتىن.

    كۇنى بۇگىنگە دەيىن ءبىز تەك اقىن دەپ تانىپ كەلە جاتقان كودەك مارالبايەۆتىڭ كومپوزيتورلىعى جونىندەگى ويدى ەڭ العاش اقىننىڭ ۇلى مارحۇم ايتۋعان اقساقال بايانداعان ەكەن. اقىننىڭ 2005-جىلى شينجياڭ حالىق باسپاسى جاعىنان باسىلىپ شىققان شىعارمالار جيناعىنا ەنگەن «ءۇمىشتى جوقتاۋ» اتتى داۋىسقا تۇسىنىكتەمە بەرگەن ايتۋعان اقساقال: «مەنىڭ بالا كەزىمدە بۇل جوقتاۋدى ىلەنىڭ ارعى بەتىنەن ءبىر كىسى كەلىپ جازدىردى. ول كەزدە ءبىزدىڭ ءۇي اتتاۋىندا وتىراتىن ەدى. قوناق ەكى-ءۇش كۇن ايالداپ، جوقتاۋدىڭ ءانىن دە دومبىراعا سالىپ، ۇيرەنىپ كەتتى» دەيدى. بۇدان ءبىز اقىننىڭ جوقتاۋ جازدىرتۋعا كەلگەن ادامنىڭ تىلەگىنە ساي، جوقتاۋدىڭ ءماتىنى مەن ءانىن بىردەي ۇيرەتكەنىن ايقىن اڭعارامىز. ال 2008-جىلى قازاقستاننىڭ «ان -ارىس» باسپاسى جاعىنان باسىلىم كورگەن اقىننىڭ ەكى تومدىق شىعارمالار جيناعىندا، جيناقتى قۇراستىرۋشى اقىن نۇرلان ابدىبەكوۆ اقىننىڭ «ديقانبايعا داۋىس»، «تۇنعاتار قاجىعا داۋىس»، «اعىبايعا داۋىس»، «ورازاي بولىسقا داۋىس»، «بوقشەك مامپاڭعا داۋىس» سياقتى ءبىرقىدىرۋ داۋىستارىنىڭ وزىندىك اۋەن، ىرعاعىنىڭ بولعاندىعىن، كودەك اقىننىڭ جوقتاۋشىلارعا داۋىستىڭ ءسوزى مەن اۋەنىن قاتار ۇيرەتكەندىگىن اتاپ وتەدى. ءبىز كودەك اقىننىڭ كوزىن كورگەن، قۇيما قۇلاق قارتتاردان قالعان ەستەمەلەرگە نازار اۋدارساق، 1920-1919 -جىلدارى ازامات سوعىسىنا قاتىناسىپ، دەنساۋلىق جاعدايىمەن شەپتەن قايتقان اقىن «ەلگە ورالۋ» اتتى تولعاۋىن دومبىرا سۇيەمەلىمەن قوڭىرلاتا ورىنداپ شىعىپتى.

جاۋاپتى رەداكتور:جاڭىلقان سايلاۋ قىزى