ىلە قازاق اۆتونوميالى وبلىسىنا توتە قاراستى ورىنداردىڭ 5 – كەزەكتى اقىندار ايتىسى، مادەنيەت – ساياحات مەرەكەسى تابىسپەن اياقتادى

    سۋرەت تۇسىندىرمەسى: بۇل رەتكى اقىندار ايتىسى مادەنيەت - ساياحات مەرەكەسى 24 - شىلدە تۇستەن بۇرىن كوركى كوز سۇرىندىرگەن سۇلۋ ساحارا ناراتتىڭ قاراتەرەك دەگەن جەرىندە سالتاناتپەن باستالدى

    كەر اتتاي جەلقانات تۇلپارىمەن، ناراتتاي سۇلۋ تابيعاتىمەن الىس – جاقىنعا تانىمالى كۇنەس دالاسى ءاشىمنىڭ كۇيى مەن تاڭجارىقتىڭ جىرلارىنان تاعىلىم الىپ، ونەردىڭ كەرەگەسىن كەڭگە جايىپ، ەل جۇرەگىنە رۋحاني ءنار سيلاۋعا ۇزبەي ۇمتىلىپ كەلەدى – اق. وسى ايتقانىمىزدىڭ ءبىر دالەلى شىلدەنىڭ 24 – كۇنىنەن 26 –كۇنىنە دەيىن ءۇش كۇن بويى كوركەم ىلە، التىن التاي، تارلان تارباعاتايدان جەتكەن قوڭىراۋلى جىر كوشىن مانات دالاسىنا ەرۋلەتىپ، قارا ورمان حالقىنا جىر تىڭداتىپ، شاڭداتىپ جەتكەن شالقۇيرىقتارىنا شابىت سيلاپ، ونەر ولكەسىنىڭ شاڭىراعىن بيىكتەتۋگە بارىن ايامادى.

    ءار ۇلت حالقىن شاتتىققا بولەپ وتىرعان ىلە قازاق اۆتونوميالى وبلىسى قۇرىلعاندىعىنىڭ 60 جىلدىعىن قۇتتىقتاۋ مازمۇنىنىڭ ءبىرى رەتىندە وتكىزىلگەن وسى قيمىلدا اقىندار ايتىسىنداي اردا ونەر ۇلتتىق قولونەر بۇيىمدارى، اس – سۋ، كيىز ءۇي، ءسۇتتى شاي مادەنيەتى، بايگە، ات ءۇستى ونەرى تۇرلەرىمەن ارلەندىرىلىپ، مازمۇنىن بايىتىپ، بەرەكە – بىرلىكتىڭ، دوستىقتىڭ، جاراسىمدىلىقتىڭ جىرىن جازىپ، توعاناعى مول تابىسىمەن سوڭعى كومبەسىنە دە جەتىپ ۇلگىردى.

    قازاقتىڭ قايماعى بۇزىلماي كەلە جاتقان اتا ونەرى ايتىستى اسپەتتەپ، ۇلت مۇراسىن ارداقتاۋعا، باعىن جاندىرىپ، مۇراگەرلىك ەتۋگە بەلدى بەكەم بۋعان اقىندار شوعىرى ءۇش كۇن بويى تىڭداۋشىسىنىڭ قۇلاق قۇرىشىن قاندىرىپ، جىر قۇدىرەتىن شىنىمەن تانىتتى. جەكپە – جەكتىڭ كەزەگىندە ساحارا ساڭلاقتارى سانالعان ولار زامانا، اتا ءداستۇر، ۇلتتىق بولمىس، ۇرپاق قامى، ۇرىمتال ماسەلەلەر جايىندا سۇلۋ ءسوز بەن سۇڭعىلا ويلار ساباقتاۋعا ۇمتىلدى. تۋما ونەردىڭ تۇنىعىنان سۋسىنداپ، رۋحاني ءلاززات الۋعا جانىن سالعان مۇنداعى قۇيما قۇلاق كورەرمەن دە شىلىڭگىر ىستىقتىڭ اپتابى مەن جاڭبىردىڭ توپەۋىنە قاراماستان قۇنىعا تىڭداۋدان ءبىر جازبادى.

    26 – شىلدە تۇستەن كەيىن وسى رەتكى قيمىلدىڭ سىرگە جيار سالتى وتكىزىلىپ، ورەلى ويىمەن تىڭداۋشىسىن سۇيىندىرگەن كۇمبىرلى كۇي شەرتىپ، تەرمەسىمەن جۇرت جۇرەگىن تەربەگەن 50 اقىن، 11 كۇي ورىنداۋشى، 14 تەرمەشى دارەجە بويىنشا سيلىق تورىنە كوتەرىلدى. زۋرا تىلەۋ قىزى، قاناتبەك زايتوللا ۇلى، ناعىمان شۇقان ۇلى، ەرلان امانقوجا ۇلى باس جۇلدەنى الىپ، ءاربىرى 10 مىڭ يۋانمەن؛ گۇلمان ۇلىقپان قىزى، ۇلاربەك ميناتقان ۇلى، باقىتالى تىلەۋبەردى ۇلى، انار بادەلقان قىزى، ءپاتىعالى مۇقان ۇلى، ارزىگۇل قايىڭبەك قىزى 2 – دارەجەلى جۇلدەنى الىپ، ءاربىرى 7 مىڭ يۋانمەن؛ نۇرگۇل، سۇلۋجان، جارقىنبەك، قازيزا، ۇمىتگۇل، ەرزات، قاسەننۇر، دينا، مىقتىبەك، باتىل، ءبيعايشا، سالتانات قاتارلىلار 3 – دارەجەلى جۇلدە الىپ، ءاربىرى 4 مىڭ يۋانمەن سيلاندى. ەرسىن، جايناش قاتارلى اقىندار تۇگەلىمەن ۇزدىك اقىن اتاعىن ەنشىلەپ قايتتى. تەرمە ورىنداۋدا تىلەۋقابىل سارسەنبەك ۇلى، ەرلان مۇقات قىزى، تۇرسىنگۇل اۋدانبەك قىزى، ال كۇي شەرتۋدە قاشاتاي جۇمانالى ۇلى مەن ناۋرىزبەك جۇمابەك ۇلى باس جۇلدەنى ەنشىلەپ، ءاربىرى 2 مىڭ يۋانمەن سيلاندى.

    مۇنىمەن جارىستىرىلا وتكىزىلگەن ات بايگەسى، كيىز ءۇي باعالاۋ تۇرلەرىندە اعالاپ العا شىققاندارعا كۇنەس اۋدانى جاعىنان زاتتاي جانە اقشالاي سيلىقتار ۇسىنىلدى.

    سوڭىندا وبلىستىڭ ورىنباسار باستىعى مۇقيات جارمۇقامەت ۇلى ءسوز سويلەپ بىلاي دەدى: «بۇل رەتكى اقىندار ايتىسى، مادەنيەت – ساياحات مەرەكەسىندە اتا مۇرا اقىندار ايتىسى جانە ءتۇرلى مادەني قيمىلدار، ات بايگەسى، كوكپار تارتۋ، قىز قۋار، تەڭگە ءىلۋ سياقتى ءداستۇرلى ۇلتتىق سپورت ونەرىمىز وتكىزىلىپ، ءار ۇلت حالىق بۇقاراسىنىڭ جوعارى باعاسى مەن العىسىنا بولەندى. اقىندار قيان – كەسكى ايتىستا پارتيا مەن ۇكىمەتتىڭ ابزال ساياساتىن، جاراسىمدى قوعامدى، وزىق مادەنيەت ۇلگىلەرىن، ‹جۇڭگو ارمانىن›، وبلىس قۇرىلعان 60 جىلدان بەرگى زور وزگەرىستەردى، اسىرەسە، ورتالىقتىڭ شينجاڭ قىزمەتى جونىندەگى اڭگىمە ماجىلىسىنەن بەرگى تابىستاردى، ۇشقان قۇستاي دامىعان ءداۋىردى تىلگە تيەك ەتىپ، شالقىعان شابىت، شەشەن تىلمەن كوسىلە جىرلادى. تامىرى تەرەڭدە، تاريحى ارىدا جاتقان اسىل قازىنا، بەيزاتتىق مۇرامىز اقىندار ايتىسىنا باي مازمۇندى جاڭالىق قوسۋعا قۇلشىنعان اقىندارىمىز كورەرمەندەردى ءسۇيىندىرىپ، ايتىس ونەرىنىڭ اسپانىندا قىرانداي سامعادى. تەكتى ونەرىمىز تەرمەنىڭ ءداستۇرلى ەرەكشەلىگىن ەمىن – ەركىن مەڭگەرگەن جەزتاڭداي، بۇلبۇل كومەي تەرمەشىلەر، ون ساۋساعىنان كۇي تامىلجىعان كۇيشىلەر، قوبىز تارتۋ ونەرىنىڭ شەبەرلەرى ءوز ونەرلەرىن ايگىلەپ، ءار ۇلت كورەرمەندەرىن تاڭداي قاقتىرا تامساندىردى. سونداي – اق، قازاقتىڭ اقبوز ءۇيى، قولونەر، اس – سۋ، جىلقى مادەنيەتى كورگىزبەسى اشىلىپ، مەرەكەنىڭ مەرەيىن اسىردى. وسى ارقىلى وركەنيەتىمىزدىڭ ءورىسىن كەڭەيتىپ، دامۋدى جەدەلدەتۋگە تىڭ ۇلەس قوستى. وسى ورايدا مەن ىلە وبلىستىق حالىق ۇكىمەتى اتىنان جۇلدەگە يە بولعان اقىن، ونەرپازداردى قىزۋ قۇتتىقتايمىن! اقىن – ونەرپاردارىمىزدىڭ ۇزدىكسىز ۇيرەنىپ، مول ءبىلىم– تاجىريبە توپتاپ، قوعامدىق اۋقىمعا ءۇڭىلىپ، اقىندىق تالانتىن جەتىلدىرىپ، بۇدان دا زور ناتيجەلەرگە قول جەتكىزۋىنە تىلەكتەسپىن».

    ەڭ سوڭىندا التى اي بويى دايىندىق كورىپ، اپتا بويى بەل شەشپەي اقىن، ونەرپازدارعا، الىس – جاقىننان كەلگەن قوناقتارعا قىزمەت وتەپ، ەستەن كەتپەستەي جىر جارمەنكەسىن وتكىزۋگە اتسالىسقان اسابا ورىن كۇنەس اۋدانى 2016 – جىلى 6 – كەزەكتى اقىندار ايتىسىن مىندەتىنە الىپ وتكىزەتىن ورىن جوڭعار توسىندەگى شولپان قالا ــ كۇيتۇن قالاسىنا ايتىس بەلگىسى مەن تۋىن وتكىزىپ بەردى. سونىمەن اقىندار ايتىسى سىندى ساڭلاق ونەر كوشى جەر ءجانناتى ناراتتان جوڭعار توسىنە قاراي بەت تۇزەدى.

جاۋاپتى رەداكتور:جاڭىلقان سايلاۋ قىزى