شاڭحاي قالاسىندا ەركەش قۇرمانبەك قىزىنىڭ شىعارماشىلىق تالقى جيىنى ءوتتى

    قاجىبەك ايدارحان ۇلى حابارلايدى. 14 - مامىر كۇنى تۇستەن بۇرىن شاڭحاي قالالىق جازۋشىلار قوعامىندا شاڭحاي جازۋشىلار قوعامىنىڭ ۇيىمداستىرۋىمەن شينجياڭ جازۋشىلار قوعامىنىڭ ورىنباسار ءتوراعاسى، «اقسارباس»، «كەلمەسكە كەتكەن قاراگەر»، «ساحاراداعى ۇماي انا»، «تاڭ اتادى، كەش باتادى»، «تىعىرىققا تىرەلۋ»، «كوك ساعىمعا بولەنگەن كوكبورى» سەكىلدى كىتاپتارى حانزۋ تىلىندە جارىق كورگەن، مەملەكەتتىك از ۇلت تۇلپار سيلىعىن، ءتاڭىر تاۋ ادەبيەت - كوركەمونەر سيلىعىن، جۇڭگو جازۋشىلار باسپا توبىنىڭ 2011 - جىلعى جىلدىق شالقىما سيلىعىن، «2011 - جىلعى ەڭ ۇزدىك شالقىما سيلىعىن، «اقسارباس» اتتى شالقىماسىنان وزگەرتىپ، كەڭەيتىپ جازعان «اقسارباس» اتتى كينو سەنارياسى جۇڭگو - ا ق ش كينو فەستيۆالىنىڭ التىن پەرىشتە سيلىعىن العان جانە ۇلتتار ادەبيەتى باستاتقان ادەبي باسىلىمداردىڭ كوپتەگەن سيلىقتارىن ەنشىلەگەن، قالامى قارىمدى، ويى ورامدى جازۋشى ەركەش قۇرمانبەك قىزىنىڭ شىعارماشىلىق تالقى جيىنى ءوتتى.

    جازۋشى شىعارماسى تۋرالى ءار تۇرعىدان تالقى جۇرگىزىلگەن بۇل رەتكى قيمىلعا شاڭحاي جازۋشىلار قوعامىنىڭ شۋجيى سۇن يۇڭ، شينجياڭ جازۋشىلار قوعامىنىڭ ءتوراعاسى ازات سولتان، شاڭحاي جازۋشىلار قوعامىنىڭ ورىنباسار ءتوراعاسى، باس حاتشىسى زاڭ جيانمين باستاتقان باسشى، مامانداردان تىس، گاۋ يۋانباۋ، ياڭ ياڭ، ۋ لياڭ، سۇن يۋان، حى ين (شينجياڭ)، حۋ شاۋجۇن، ليۋ مي، رىن ليچيڭ، شۇي داۋجۇن قاتارلى سىنشىلار، جازۋشىلار، پروفەسسورلار قاتىناستى. تالقى بارىسىندا شاڭحاي قالاسىندا تۇراتىن، بەتىڭ - ءجۇزىڭ دەمەيتىن باتىل سىنشىلدىعىمەن، ىمىراسىز كوزقاراسىمەن تانىمال بولعان، بەلدى جازۋشىلارعا دا كەمشىلىگىن جاسقانباي ايتاتىن سىنشى، ماماندار قازاق جازۋشىسى ەركەش قۇرمانبەك قىزىنىڭ پوۆەست، اڭگىمە، شالقىمالارى تۋرالى كەزەك - كەزەك ءسوز الىپ، ەرەكشەلىكتەرگە عىلمي، نانىمدى تۇردە توقتالۋمەن بىرگە، ءونىمدى، قۇندى ۇسىنىستارىن دا ورتاعا قويدى.

    سىنشى، جازۋشى، ماماندار ەركەش شىعارمالارىندا حانزۋ قالامگەرلەرىندە كوپ كەزىگە بەرمەيتىن تۋىستىق قارىم - قاتىناس تۋرالى، تۇرمىس - تىرشىلىك بارسىندا قالىپتاسقان ادام مەن حايۋان اراسىنداعى دوستىق سۇيىسپەنشىلىك، سەنىم تۋرالى، قازاق ۇلتىنىڭ تابيعاتتى ايالاۋداعى ىزگى ءداستۇرىنىڭ شىعارمادا كورىنىس بەرۋى تۋرالى تامسانا تىلگە الىپ، ەركەش شىعارمالارىن وقۋ ارقىلى وزدەرىنىڭ جاڭا ءبىر ينفورماتسيا ءوڭىرىن بايقاعاندىقتارىن؛ ورتا ازيا مادەنيەتىنە ءتان شىعارماشىلىق ءىز، قازاق جازۋشىسىنا ءتان ويلاۋ تۇرعىسى بار جازۋشىنىڭ وبرازدى، فيلوسوفيالى وي قاتپارىن قالىپتاستىرىپ، پوەتيكالىق كەڭ تىنىستىلىق تانىتاتىندىعىن باسا ايتتى. شىنايى ءارى رومانتيكالى شىعارماشىلىق ستيل قازاق حالقىن، تۇرمىسىن، ۇلتتىق دارالىعىن، قوعامدىق كوزقاراسىن ءتىپتى دە تۇسىنۋگە جەتەلەيتىندىگىن ورتاعا قويعان ادەبيەت تانۋشىلارى ەركەش شىعارمالارىنىڭ ىشىندە كەزدەسەتىن قازاق ولەڭدەرىنىڭ اۋدارىلۋىنا دا توقتالىپ، بۇل اۋدارمالاردى حانزۋ وقىرماندارى اسا جىلى قابىلداعانىن، وسىنداي ءساتتى اۋدارمالارى ارقىلى باتىستان قانات قاققان قاسيەتتى جىردىڭ نازىك ۇشقىندارى نۇرلى ىرعاعىمەن كوپتەگەن وقىرماننىڭ نازارىن اۋدارعانىن ايرىقشا اتاپ ءوتتى.

    تالقى سوڭىندا، شينجياڭ جازۋشىلار قوعامىنىڭ ءتوراعاسى ازات سولتان ءسوز الىپ، وسىنداي ورەلى تالقى جيىنىن ۇيىمداستىرعان شاڭحاي جازۋشىلار قوعامىنا، سىنشى، زەرتتەرمەن، جازۋشىلارعا راقىمەتىن ايتۋمەن بىرگە، ەركەش قۇرمانبەك قىزىنىڭ قاربالاس قوعامدىق قىزمەتتەردىڭ ورتاسىندا ءجۇرىپ ءساتتى شىعارمالار جازعان جان كەشتىلىگىن القايتىندىعىن ءارى قىزىعا قارايتىندىعىن ايتا كەلىپ، شاڭحايدا بۇدان كەيىن دە شينجياڭدىق جازۋشىلاردىڭ شىعارماسى تۋرالى تالقى جيىنى اشىلۋىن قالايتىندىعىن، سول ارقىلى حانزۋ قالامگەرلەرىنىڭ شينجياڭ ادەبيەتىنە نازار اۋدارۋىن ءۇمىت ەتەتىندىگىن ورتاعا قويدى.

    جۇڭگو جازۋشىلىق سالاسىندا لۋ شۇن، ماۋدۇن، باجين قاتارلى تالايلاعان ساڭلاقتاردىڭ ۇشقان تۇعىرى، جەتىلگەن ۇياسى، شىعىستىڭ اشىق تەڭىزگە ارقا سۇيەگەن، مادەنيەتىنىڭ مايەگى قالىڭ، مازمۇنى تەرەڭ الىپ قالاسى شاڭحايدا جارتى كۇندىك ۋاقىتپەن وتكىزىلگەن، ءبىز ءۇشىن جيناقىلىعى مەن كەسكىن دە شىنايى باعا بەرەتىن بۇكپەسىزدىگى تاڭسىق كورىنىپ، سالا قۇلاش ماقالا وقىعانعا قاراعاندا، ساناعا سىڭەر ءتۇيىندى توق ەتكىزەر ونىمدىلىگى تامساندىرعان تالقى قيمىلى سوڭىنا شىعاردا، ماڭگىلىك ماحاببات ءارى ار - ۇجداندى، الۋان ادام تاعدىرىن شىعارماسىنا تيەك ەتكەن، ساحارا مەلودياسىنىڭ سيمفونياشىسى، ۇلتتىق مادەنيەتتىڭ جاسىل جاۋھارىن تىستەپ ۇشىپ، قۇدىرەتتى ساۋلەسىن ميلليارد وقىرماننىڭ جۇرەگىنە قۇيۋ ءۇشىن مانگە تولى ىرعاقتى قانات قاققان سانا قۇسىن رۋحاني بولمىسى ارقىلى بەينەلەۋ جولىندا تىنىمسىز ىزدەنىستەن ءبىر تىنباعان قازاق جازۋشىسى ەركەش قۇرمانبەك قىزى اسەرى مەن راقىمەتىن جاۋدىرۋمەن بىرگە، قازاقتىڭ قاسيەتتى دومبىراسىن شاڭحاي جازۋشىلار وداعىنا ۇسىنىپ، ءوز كوڭىل كۇيىن ءبىلدىردى. «شينجياڭ گازەتى»

جاۋاپتى رەداكتور:جاڭىلقان سايلاۋ قىزى