ءتاڭىرتاۋ تورابى   ›   جاڭالىقتار   ›   ماڭىزدى حابارلار

شي جينپيڭ 2017 - جىلعى گۋاڭجوۋ «بايلىق» الەمدىك تالقى مىنبەرىنىڭ اشىلعاندىعىن حات جازىپ قۇتتىقتاپ، جۇڭگونىڭ اناعۇرلىم جوعارى دەڭگەيدەگى اشىق ەكونوميكانى دامىتىپ، جۇڭگو مەن شەتەلدىڭ ەكونوميكا - ساۋدا ىنتىماقتاستىعىنىڭ جارقىن بولاشاعىن بىرگە اشاتىندىعىن باسا دارىپتەدى

ۋاڭ ياڭ اشىلۋ راسىمىنە قاتىناستى ءارى ارقاۋ ءسوز سويلەدى

  شينحۋا اگەنتتىگىنىڭ 6 - جەلتوقساندا گۋاڭجوۋدان بەرگەن حابارى (تىلشىلەر ۋاڭ حۇيحۇي، يە چيان). 2017 - جىلعى گۋاڭجوۋ «بايلىق» الەمدىك تالقى مىنبەرى 6 - جەلتوقسان تۇستەن بۇرىن اشىلدى. مەملەكەت ءتوراعاسى شي جينپيڭ قۇتتىقتاۋ حاتىن جولداپ، تالقى مىنبەرىنىڭ وتكىزىلگەندىگىن قىزۋ قۇتتىقتادى، ءار جاقتىڭ سيلى قوناقتارىنىڭ ماجىلىسكە قاتىناسۋ ءۇشىن جۇڭگوعا كەلگەندىگىن شىنايى قارسى الدى. ول مىنالاردى اتاپ كورسەتتى: وسى كەزەكتى تالقى مىنبەرى نازاردى الەمدىك دامۋدا ءدوپ كەلگەن شەشۋشى ماسەلەلەرگە شوعىرلاندىرادى، ماجىلىسكە قاتىناسقان سيلى قوناقتار بۇل جونىندە وي ورتاقتاسىپ، سىندارلى اقىل - كەڭەس بەرەدى، بۇل دۇنيە ءجۇزى ەكونوميكاسىنىڭ ارتۋىن جەبەۋ جونىنەن بەلسەندى ءمان الادى.

  شي جينپيڭ قۇتتىقتاۋ حاتىندا مىنالاردى اتاپ كورسەتتى: تاياۋدا اشىلعان جۇڭگو كوممۋنيستىك پارتياسىنىڭ مەملەكەتتىك 19 - قۇرىلتايىندا جاڭا داۋىردەگى جۇڭگوشا سوتسياليزمنىڭ ارەكەت باعدارناماسى مەن دامۋ جوباسى جاسالدى. ءبىز حالىقتى وزەك ەتكەن دامۋ يدەياسىنان جازباي، جاڭا دامۋ ۇستانىمىن ىشكەرىلەي دايەكتىلەندىرىپ، وسىزاماندانعان ەكونوميكالىق جۇيە ورناتامىز؛ رەفورمانى جاپپاي تەرەڭدەتىپ، تۇتاس قوعامنىڭ جاسامپازدىق قۋاتىن بارىنشا جۇمىلدىرىپ، دامۋ ومىرشەڭدىك كۇشىن ۇزدىكسىز ساۋلەلەندىرەمىز؛ اناعۇرلىم جوعارى دەڭگەيدەگى اشىق ەكونوميكانى دامىتىپ، «ءبىر بەلدەۋ، ءبىر جول» قۇرىلىسىن ىشكەرىلەي ىلگەرىلەتىپ، جاپپاي ەسىك اشۋ جاڭا جاعدايىنىڭ قالىپتاسۋىن جەبەيمىز. بولاشاقتا جۇڭگونىڭ دامۋ قوزعاۋشى كۇشى اناعۇرلىم جەتكىلىكتى، حالىقتىڭ تابىس سەزىمى اناعۇرلىم كوپ، دۇنيە جۇزىمەن ىقپالداستىعى اناعۇرلىم تەرەڭ بولىپ، الەمدىك دامۋعا اناعۇرلىم كوپ وراي جاراتادى، اناعۇرلىم زور ۇلەس قوسادى.

  شي جينپيڭ مىنالاردى باسا دارىپتەدى: جۇڭگونىڭ ەكونوميكاسى ۇزاق ۋاقىت جاقسارۋعا بەت تۇزەگەن جارقىن بولاشاققا يە، ورنىقتىلىق بارىسىندا ىلگەرىلەتۋدى، ءۇرتىس جاقسارۋدى جۇزەگە اسىرۋعا نەگىزى، شارت - جاعدايى، قوزعاۋشى كۇشى بار. جۇڭگونىڭ ەسىگى جابىلمايدى، تەك بارعان سايىن ايقارا اشىلادى، تيجارات ورتاسى اناعۇرلىم اشىق، جاريالى، جۇيەلى بولادى. جۇڭگو الەمدىك سەرىكتەستىك قاتىناستى ۇزدىكسىز دامىتىپ، ءار ەلمەن مۇددە توعىسى ءتۇيىنىن كەڭەيتىپ، ساۋدا مەن قارجى قوسۋدىڭ ەركىندىگىن، قولايلىلىعىن جەبەپ، ەكونوميكانى جاھانداندىرۋدىڭ اناعۇرلىم اشىق، قامتىمدى، جاپپاي تيىمدىلىك جاسالعان، تەڭ، ورتاق يگىلىككە كەنەلەتىن باعىتقا قاراي دامۋىن ىلگەرىلەتەدى. ءبىز دۇنيە جۇزىندەگى كاسىپورىنشىلاردىڭ جۇڭگوعا كەلىپ قارجى قوسىپ، شارۋاشىلىعىن شالقىتۋىن، جۇڭگونىڭ رەفورماسى، دامۋى الا كەلگەن ورايدى تەڭ ءبولىسىپ، جۇڭگو مەن شەتەلدىڭ ەكونوميكا - ساۋدا ىنتىماقتاستىعىنىڭ جارقىن بولاشاعىن بىرگە اشۋىن ىقىلاسپەن قارسى الامىز.

  مەملەكەتتىك كەڭەستىڭ ورىنباسار زۇڭليى ۋاڭ ياڭ اشىلۋ راسىمىنە قاتىناستى ءارى ارقاۋ ءسوز سويلەدى. ول بىلاي دەدى: ءتوراعا شي جينپيڭ قۇتتىقتاۋ حاتىندا جۇڭگو ۇكىمەتىنىڭ تالقى مىنبەرىنە باسا ءمان بەرەتىندىگىن جانە ودان ءۇمىت كۇتەتىندىگىن ءبىلدىردى، جاڭا داۋىردەگى جۇڭگونىڭ دامۋداعى ساياساتتىق بەتالىسىن جەتكىزدى، جۇڭگونىڭ تاراپتارمەن بىرگە ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدەگى شىنايى تىلەگىن جاريالادى. ۋاڭ ياڭ مىنالاردى اتاپ كورسەتتى: بۇل رەتكى تالقى مىنبەرىندە «اشىق ۇستاۋ جانە جاڭالىق اشۋ: ەكونوميكانىڭ جاڭا جاعدايىن ورناتۋ» نەگىزگى تاقىرىپ ەتىلدى، ول كۇشتى رەال ءمان الادى. ەكونوميكانى جاھانداندىرۋدىڭ جالپى بەتالىسىنا تاباندى بولۋ − الەمدىك ەكونوميكانىڭ جاڭا جاعدايىن ورناتۋدىڭ نەگىزگى العى شارتى؛ جاڭا - كونە قوزعالىس ەنەرگياسىنىڭ جاڭالانۋىنا جاڭالىق اشۋ ارقىلى دەم بەرۋگە تاباندى بولۋ − الەمدىك ەكونوميكانىڭ جاڭا جاعدايىن ورناتۋدىڭ تەتىگى؛ قامتىمدى، بىرگە يگىلىكتەنەتىن ارتۋعا تاباندى بولۋ − الەمدىك ەكونوميكانىڭ جاڭا جاعدايىن ورناتۋدىڭ ماڭىزدى ۇستانىمى. ۋاڭ ياڭ مىنالاردى باسا دارىپتەدى: جۇڭگونىڭ ەكونوميكالىق جاعدايى تەرەڭ وزگەرىستى باستان كەشۋدە. جۇڭگونىڭ بولاشاقتىق دامۋى − حالىقتى وزەك ەتكەن دامۋ، ساپانى ءبىرىنشى ورىنعا قوياتىن، ونىمدىلىكتى الدىمەن ەسكەرەتىن دامۋ، جاڭالىق اشۋ ارقىلى دەم بەرەتىن دامۋ، جان - جاقتى، اشىق، ءوزارا تيىمدىلىك جەتكىزىپ، بىرگە يگىلىككە كەنەلەتىن دامۋ. جۇڭگونىڭ بۇرىنعى دامۋى ەسىك اشۋدان كەلگەن، الداعى جەردە جاڭالىق اشۋ ارقىلى دەم بەرۋ، جوعارى ساپالى دامۋ جولىمەن جۇرەدى، ەسىك اشۋ اياسىن اناعۇرلىم كەڭەيتە تۇسەدى. ءبىز شەتەل قارجىسىن بەلسەندى، ۇتىمدى پايدالانۋ باعىتىنان جازباي، رۇقسات ەتۋ الدىنداعى حالىق شارۋاشىلىعى مامىلەسىنە ۇنامسىز تىزىمدىكتى قوسۋداي باسقارۋ ۇلگىسىن جاپپاي اتقارىپ، بازارعا كىرۋگە رۇقسات بەرۋ اياسىن بارىنشا كەڭەيتىپ، ءتۇيىندى سالالاردا ەسىك اشۋدى كەڭەيتۋدىڭ ۋاقىت كەستەسى مەن باعدار كەستەسىن جاساۋدى مىقتى ۇستاپ، شەتەل ساۋداگەرلەرىنىڭ قارجى قوسۋداعى زاڭدى ۇقىق - مۇددەسىن قورعاپ، بارىنە تەڭ قاراۋ، ءادىل باسەكەلەسۋ سىندى تيجارات - ساۋدا ورتاسىن جاراتامىز.

  مەملەكەتتىك كەڭەس اقپارات كەڭسەسىنىڭ مەڭگەرۋشىسى جياڭ جيانگو اشىلۋ راسىمىندە شي جينپيڭنىڭ قۇتتىقتاۋ حاتىن وقىدى. گۋاڭدۇڭ ولكەلىك پارتكومنىڭ شۋجيى لي شي، كانادانىڭ زۇڭلي−ى ترۋداۋ، پاپۋا - جاڭا گۆينەيانىڭ زۇڭليى اۋنەر جانە ءداۋىر سەرىكتەستىگىنىڭ باس كونتەنتتى، «بايلىق» جۋرنالىنىڭ ءتوراعاسى مۋرريلان جەكە - جەكە اشىلۋ راسىمىندە ءسوز سويلەدى.

  2017 - جىلعى گۋاڭجوۋ «بايلىق» الەمدىك تالقى مىنبەرى 6 - جەلتوقساننان 8 - جەلتوقسانعا دەيىن وتكىزىلەدى، شەتەلدىڭ ساياسي قايراتكەرلەرى، «بايلىق» تىزىمىندەگى الەمدىك 500 كۇشتى كاسىپورىنداردىڭ ۋاكىلدەرى، جۇڭگو مەن شەتەلدىڭ باستاماشى كاسىپورىندارىنىڭ ۋاكىلدەرى، ايگىلى ماماندار، وقىمستىلار سياقتىلاردان 1100دەن استام جۇڭگولىق، شەتەلدىك سيلى قوناق تالقى مىنبەرىنە قاتىناستى، تالقى مىنبەرىنىڭ كولەمى وتكەن كەزەكتەگىدەن اسىپ ءتۇستى. مەملەكەتتىك كەڭەستىڭ اقپارات كەڭسەسى جانە مەملەكەتتىك كەڭەستىڭ دامۋ - رەفورما كوميتەتى، ساۋدا مينيسترلىگى، حالىق بانكەسى، مەملەكەتتىك كەڭەستىڭ مەملەكەت مەنشىگىندەگى مال - مۇلىكتى باقىلاۋ - باسقارۋ كوميتەتى سياقتى تاراۋلاردىڭ جاۋاپتىلارى سول كۇنى تۇستەن بۇرىنعى جالپى ماجىلىستە ماجىلىسكە قاتىناسقان سيلى قوناقتارعا پارتيا 19 - قۇرىلتايىنىڭ باستى جەتىستىكتەرى مەن جۇڭگونىڭ ەسىك اشۋداعى، دامۋداعى ساياساتتىق دارىپتەمەسىن تانىستىردى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «ءتاڭىرتاۋ تورابىنان» الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

بىزبەن بايلانىس جارناما قىزمەتى لەبىز قالدىرۋ ءبىز تۋرالى