ءتاڭىرتاۋ تورابى
ءتاڭىرتاۋ تورابى   ›   زاڭ تارازى   ›   قوعام قويناۋىنان

الەۋمەتتىك سەنىمدى ادالدىقپەن سومداپ، جاۋاپكەرشىلىكتى ۇلەسكەرلىكپەن ايگىلەدى

 − مەملەكەتتىك ۇلگىلى پروكۋرور، سانجى حۇيزۋ اۆتونوميالى وبلىستىق حالىق پروكۋراتۋراسىنىڭ ورىنباسار باس پروكۋرورى ديڭ ديانچين تۋرالى

  «ار الدىندا، اتاق پەن داڭق الدىندا، بارلىق ادامنىڭ وسى قىزمەتكە دەگەن قۇرمەتى مەن ءۇمىت - تىلەگى الدىندا ۇياتتى بولماۋدى ويلايمىن...». 7 - قىركۇيەكتە سانجى حۇيزۋ اۆتونوميالى وبلىستىق حالىق پروكۋراتۋراسىنىڭ ورىنباسار باس پروكۋرورى ديڭ ديانچين ءوز كەڭسەسىندە اقپارات قۇرالدارىنا سۇحبات بەرگەندە، ءوز ويىن وسىلاي دەپ تۇيىندەدى.

  ديڭ ديانچين پروكۋراتۋرا سالاسىندا وتكەن35جىلىنىڭ 20 جىلىندا جەمقورلىقپەن كۇرەستىڭ ءبىرىنشى شەبىندە جۇمىس اتقاردى. جىلدار بويى جالعاسقان قاۋىرت جۇمىس ونىڭ دەنساۋلىعىن تۇرالاتىپ كەتتى، راك ناۋقاسىمەن ارپالىسقان 9 ايدىڭ ىشىندە ول اۋرۋحانا توسەگىندە جاتسا دا دەلولارعا تالىقپاي تالداۋ جاساپ كەلدى. 5 - قىركۇيەكتە ەڭ جوعارعى حالىق پروكۋراتۋراسى مەن اۆتونوميالى رايوندىق پارتكوم ۇرىمجىدە اتاق بەرۋ، ماراپاتتاۋ جينالىسىن اشىپ، ديڭ ديانچينگە «مەملەكەتتىك ۇلگىلى پروكۋرور» جانە «اۆتونوميالى رايوننىڭ ۇلتتار ىنتىماعىنداعى، العاباسارلىعىنداعى تاڭداۋلى كومپارتيا مۇشەسى» دەگەن داڭقتى اتاق بەردى.

   زاڭمەن جونگە سالۋعا تاباندى بولىپ، زاڭدى شەبەرلىكپەن قولدانا ءبىلدى

  «وسى داڭقتى اتاققا ونان باسقا لايىقتى ادام جوق!». ديڭ ديانچين تۋرالى ءسوز بولعاندا، ونىمەن ۇزاق جىل قىزمەتتەس بولعان سانجى قالالىق حالىق پروكۋراتۋراسى پارتيا باسشىلىق گرۋپپاسىنىڭ مۇشەسى، قياناتشىلدىققا قارسى تۇرۋ مەكەمەسىنىڭ باستىعى جاڭ يۇيشياڭ باس بارماعىن كورسەتىپ: ماڭىزدى دەلولاردىڭ بارلىعىن تىكە قاداعالاپ، قاتىستى جۇمىستارعا ءوزى قولباسشىلىق ەتەدى، پروكۋراتۋراداعى كوپتەگەن جاس قىزمەتكەردىڭ بارلاۋ قابىلەتى مەن دەڭگەيىنىڭ كوتەرىلۋى ونىڭ جەتەكتەۋى مەن ىقپال ەتۋىنىڭ ناتيجەسى، − دەدى.

  تانىستىرۋعا قاراعاندا، 2013 - جىلى قازاندا، سانجى وبلىستىق حالىق پروكۋراتۋراسى ءتارتىپ تەكسەرۋ تاراۋىنان سانجى وبلىستىق گيدروتەحنيكالىق زەرتتەۋ ورنىنىڭ باستىعى چىن xxتىڭ 40 مىڭ يۋان پارا العانى ت−ۋرالى دەرەك الادى، چىن xxتىڭ مويىنداۋى مەن قولدا بار دەرەكتەردى ساراپتاي كەلە، كوپ جىلدىق تاجىريبەسىنە سۇيەنگەن ديڭ ديانچين دەلونىڭ استارىندا كوپ قۇپيا سىر جاتقانىن ىشتەي سەزەدى.

  تەرەڭ تالداۋ جاساۋ جانە قۇنتتاي تەكسەرۋ جۇرگىزۋ ارقىلى ديڭ ديانچين مەن ونىڭ قىزمەتتەستەرى اينالدىرعان جالعىز دەرەكتەن سانجى، التاي، تۇرپان، تارباعاتاي سياقتى كوپ جەردىڭ سۋ ىستەرى جۇيەسىنە ەتەك جايعان سىبايلاس، تامىرلاس دەلونى انىقتاپ شىعادى. سونان كەيىنگى ءبىر جىلدىڭ ىشىندە، ديڭ ديانچين وبلىس پەن اۋدان دارەجەلى پروكۋراتۋرا ورگاندارىنان 60 نەشە كادردى ۇيىمداستىرىپ، ءبىرقانشا دەلو گرۋپپاسىن قۇرىپ، شوعىرلى جۇمىستار جۇرگىزەدى.

  مەيلى قياناتشىلدىققا قارسى تۇرۋ مەكەمەسىنىڭ باستىعى، الدە ورىنباسار باس پروكۋرور قىزمەتىندە بولسىن، ديڭ ديانچين قاشاندا اتويلاپ الدا ءجۇرىپ، بوس، سىلدىر سوزدەن بويىن اۋلاققا سالىپ ، ءوزىن ناقتى ارەكەتپەن تانىتا ءبىلدى. «ءتىس باتپايتىن قيىندىقتار» مەن «قاتەرلى» دەلولاردى انىقتاۋدا ول ءوزى قول باستادى؛ جات جەر، بوتەن جۇرتتاعى جاعدايى كۇردەلى دەلولاردى انىقتاۋ مىندەتى تاپسىرىلسا، ول ەشقاشان باس تارتقان ەمەس.

  2014 - جىلى 29 - تامىزدا ماناس اۋداندىق حالىق پروكۋراتۋراسى تارباعاتاي ايماعى تەرەكتى وزەنى قۇرىلىسىن باسقارۋ مەكەمەسىنىڭ باستىعى ياڭ xxتى شاقىرىپ الادى، ونىڭ قاتارىندا پارا بەرۋشى سۇڭ xxتە بار ەدى. تەرگەۋ ناتيجەسىندە، ياڭ xx ءوزىنىڭ پارا العانىن مويىندايدى، ءبىراق سۇڭ xx پارا بەرگەنىن مويىنداۋدان باس تارتادى. ءسويتىپ، دەلونى انىقتاۋ تىعىرىققا تىرەلەدى. دەلو جاعدايىنان ديڭ ديانچينگە حابار بەرىلگەندە جەتى قاراڭعى ءتۇن بولعان ەدى، ديڭ ديانچين تۇندەلەتە ماناس اۋداندىق پروكۋراتۋراعا جەتىپ ۇلگىرەدى، قىسقا قايىرىم اڭگىمەدەن كەيىن، ول سۇڭ xxتى اكىمشىلىك قاماۋعا الۋ تۋرالى شەشىم شىعارادى. سول ءتۇنى ول كادر - ساقشىلاردى ۇيىمداستىرىپ، دالەلدەر قاراستىرۋدىڭ جاڭا جوسپارىن جاسايدى، كوپ وتپەي، ياڭ xxتىڭ ءبىر ميلليون 400 مىڭ يۋاننان اسا پارا العانى جونىندەگى قىلمىس فاكتىسى پاش بولادى.

  سوڭىندا ديڭ ديانچين كادر - ساقشىلاردى باستاپ سۋ ىستەرى تاراۋىنىڭ پارا بەرۋگە، پارا الۋعا قاتىستى 53 استاسپالى دەلوسىن تەكسەرىپ ءبىر جايلى ەتتى، اۋدان، باسقارما دارەجەلى كوپتەگەن كادر وماقاسىپ، مەملەكەتتىڭ ميلليون يۋاندىق ەكونوميكالىق زيانىنىڭ الدى الىندى.

  ديڭ ديانچين كوپ جىل بويى اينالىسقان پروكۋرورلىق جۇمىستان «زاڭدى ادەپسىزدىكپەن اتقارسا، قىلمىس كۇماندىسى دەلو ءبىتىرۋشىنى ىشتەي كوزگە ىلمەيدى، ءتىپتى، سايكەسپەي، دەلونى شەشۋ قيىندىعىن ارتتىرادى» دەگەندى جەتە اڭعاردى.

  2001 - جىلى سانجى وبلىسىنداعى بەلگىلى بانكەنىڭ ورىنباسار باستىعى يۇي xx ۇكىمەتتىڭ 60 مىڭ يۋان اقشاسىنا قيانات جاساۋ قىلمىس كۇمانىمەن شاقىرتىلادى، الايدا ول سايكەسپەي قويادى. ديڭ ديانچين ونىمەن اڭگىمەلەسۋ ارقىلى ونىڭ جاسىنىڭ ۇلعايىپ قالعانىن، اۋىر ناۋقاسقا شالدىققانىن، سوڭعى ءومىرىنىڭ اباقتىدا وتەتىنىنەن الاڭداعان كۇيزەلىسىن بىلەدى. سونىمەن ول يۇي xxكە ونىڭ احۋالىن جەڭىلدەتىپ ءبىر جايلى ەتۋگە بولاتىنىن، الايدا پروكۋراتۋرا ورگانىنىڭ تەكسەرۋىنە، ءسوزسىز، سايكەسۋى كەرەكتىگىن ايتادى. سوڭىندا ۋايىمنان ارىلعان يۇي xx قىلمىس وتكىزۋ بارىسىن تۇگەلدەي تاپىسىرادى.

  ۇزدىك ناتيجەلەرگە تالپىنىپ، قارا قىلدى قاق جاردى

  ديڭ ديانچين ۇنەمى بىلاي دەيتىن: «پروكۋروردىڭ زاڭ اتقارۋى بەينە ناۋقاس كورۋ سياقتى، وپەراتسيا جاساۋ قابىلەتى بولۋمەن بىرگە، نازاريالىق ءبىلىمى دە بولۋى كەرەك. ءىستىڭ ءمان - جايىن بۇگە - شىگەسىنە دەيىن بىلگەندە عانا، كۇردەلى دە قيىن دەلولارعا دەر كەزىندە دۇرىس تۇجىرىم جاساۋعا بولادى». ديڭ ديانچيڭنىڭ قاراۋىنشا، نازاريالىق ءبىلىم پروكۋرورلىق قىزمەتتى جاقسى ىستەۋدە، ءسوزسىز، توسەلەتىن «وزىندىك ونەردىڭ» ءبىرى ەكەن. سوندىقتان ول ساياساتتى، زاڭ بىلىمدەرىن جانە قياناتشىلدىققا قارسى تۇرۋ ونەر - ءبىلىمىن ۇيرەنۋگە ءمان بەرىپ، قياناتشىلدىققا قارسى تۇرۋ، دەلو تەكسەرۋ قابىلەتىن ۇزبەي جوعارىلاتىپ وتىرعان.

  2003 - جىلى ديڭ ديانچين سانجى وبلىستىق حالىق پروكۋراتۋراسى قياناتشىلدىققا قارسى تۇرۋ مەكەمەسىنىڭ باستىعى مىندەتىن وتەيدى. ول كەزدە ينفورماتسيا تۇيىق، تەكسەرۋ كۇشى جەتكىلىكسىز بولۋ سىندى ءبىر قىدىرۋ ماسەلەلەر قياناتشىلدىققا قارسى تۇرۋ قىزمەتىنىڭ ورىستەتىلۋىنە اۋىر تۇساۋ بولعان. ديڭ ديانچين ۇيرەنگەن بىلىمىمەن ۇشتاستىرىپ، ۇزبەي تالپىنۋ ارقىلى پروكۋراتۋرا قىزمەتىنىڭ «جوعارى، تومەن سايكەسكەن، جەتەكشىلىگى پارمەندى، ينفورماتسياسى ىركىلىسسىز، سايكەسۋى ۇتىمدى» ءبىر تۇلعالانعان قىزمەت مەحانيزمىن قۇردى، وسى مەحانيزم ارقىلى اتالعان پروكۋراتۋرا 1102 - جىلدان بەرى ءتۇرلى قياناتشىلدىققا، پارا قورلىققا ساياتىن 438 دەلو تۇرعىزىپ، 471 ادامدى تەكسەرىپ ءبىر جايلى ەتىپ، بىردە - ءبىر قاتە دەلو جىبەرمەي، مەملەكەتتىڭ 86 ميلليون يۋاننان استام ەكونوميكالىق زيانىنىڭ ورنىن تولتىرعان.

  بۇرىنعىلار: «وزگەنى تۇزەيمىن دەسەڭ، الدىمەن ءوزىڭ ءتۇزۋ بول، ءوزىڭ ءتۇزۋ بولماساڭ، ەلدى قالاي تۇزەيسىڭ؟» دەيدى ەكەن.

  2005 - جىلى سانجى يۇيچۋان اراق زاۆودىنداعى ۋاڭ xx قىلمىس كۇمانىمەن پروكۋراتۋرا جاعىنان قولعا الىنادى. ديڭ ديانچيننىڭ كوپ جىل بويى حابارسىز كەتكەن دوسى ليۋ xx وعان توسىننان امانداسا بارىپ، زاۆود باستىعىنىڭ وتكىزگەن قىلمىسىنا كەڭشىلىك ەتسە،200مىڭ يۋان سيلايتىنىن قايتا - قايتا ايتادى. ديڭ ديانچين بۇل ءسوزدى ەستىگەننەن كەيىن قاتاڭ رايمەن: «الدىمەن بۇل 200 مىڭ يۋاندى المايمىن، ونان قالسا، دوسىم بولساڭ، مەنى ورعا يتەرمەۋىڭ كەرەك »، - دەيدى، وسى ءسوزدى ەستىگەن ليۋ xx بەتىنەن وتى شىعىپ، كەشىرىم سۇرايدى.

  − پاك، تۋراشىل بولۋ − پروكۋرورلىق كاسىپتىك ءمورالدىڭ نەگىزگى تالابىنىڭ ءبىرى، ءدال وسىنداي ءمورال مەن ادامگەرشىلىككە يە بولعاندا عانا، حالىققا ادال بولۋعا، حالىقتىڭ سەنىمىنە يە بولۋعا بولادى. پروكۋرور زاڭدىق باقىلاۋشى ساناتىندا پاك، تۋراشىل بولسا، پروكۋراتۋرا ورگانىنىڭ جالپى وبرازى مەن الەۋمەتتىك سەنىمدىلىگىنە يگى ىقپال جاساپ قانا قويماي، قوعامدىق ادىلدىك پەن تۋراشىلدىققا دا وڭ اسەر بەرەدى، - دەيدى ديڭ ديانچين.

   اۋەلگى ماقساتتى ۇمىتپاي، ۇدەرە العا تارتا بەرەمىن

  تالاي جىلدان بەرگى قالىپتان ارتىق قىزمەت پەن ۋاعىندا تاماقتانا الماۋ سەبەپتى ديڭ ديانچين ءتۇرلى ناۋقاسقا شالدىقتى، اۋرۋى اسقىنعاندا جانىنا باتىپ، تۇنىمەن كوز ىلمەي شىعاتىن بولدى، ايتسە دە ول رۇقسات سۇراۋ، دەمالۋ تالابىن قويىپ كورمەدى، دەلو سوڭىنا شىقپاسا بولعانى، ول قىزمەت ورنىنان ءبىر سات تە تاپجىلمادى.

  قاجىرلىلىقپەن ەڭبەكتەنۋدىڭ ناتيجەسىندە ول ۇزدىك ناتيجەگە قول جەتكىزدى، ايتسە دە دەنساۋلىعى كۇننەن - كۇنگە ناشارلادى. 2014 - جىلى 3 - قاراشادا، اۋرۋى اسقىنعاندىقتان ول شيپاحاناعا شۇعىل جەتكىزىلدى، تەكسەرۋ ارقىلى قاتەرلى وسپە ەكەنى انىقتالىپ، دەرەۋ وپەراتسيا جاساۋ قاجەت بولدى. ايتسە دە سۋ ىستەرى جۇيەسىنىڭ ۇيالاستىق دەلوسى «قامال الۋ كەزەڭىندە» تۇرعاندىقتان، ول شيپاحاناعا جاتىپ ەمدەلۋدەن باس تارتىپ، دەلونىڭ سوڭىنا ءتۇستى. شيپاحانا اقتىق ەسكەرتۋ بەرگەندە عانا، ديڭ ديانچين بەيجيڭگە بارىپ ەمدەلدى.

  5 ايدان ارتىق ۋاقىت حيميالىق ەم قابىلداعاننان كەيىن، ديڭ ديانچين 20 نەشە كيلوگرام ارىقتاپ، قاڭىلتاقتاي عانا بولىپ قالدى. ايتسە دە بۇل جاعدايلار ونى جانىنداي جاقسى كورەتىن قىزمەت ورنىنان ايىرا المادى. 2015 - جىلى ماۋسىمدا حيميالىق ەمدەۋ اياقتاعاننان كەيىن، ول شينجياڭعا قايتىپ، قىزمەتىنە كىرىسىپ كەتتى.

  حۋابەي ەلەكتر ۋنيۆەرسيتەتىندە اسپيرانتتىق وقىپ جاتقان 26 جاستاعى ديڭ شياۋبين اكەسىنە ەرەكشە سۇيىنەدى ءارى ونى تۇسىنەدى، «ول پروكۋرور، ول وسى كاسىپ جولىن تاڭداعان ەكەن، باسقالاردان ارتىق قۇلشىنۋى، بۇقارانىڭ وسى كاسىپكە دەگەن قۇرمەتىن اقتاۋى كەرەك. ونىڭ ۇلى بولعان مەن وسىنداي اكەمنىڭ بولعانىن ماقتانىش سانايمىن».

  ءۇرىمجى قالاسى سايباع رايوندىق حالىق پروكۋراتۋراسى قياناتشىلدىققا قارسى تۇرۋ مەكەمەسىنىڭ باستىعى ۋىن شىڭ اسا تەبىرەنگەن كوڭىل كۇيمەن: ديڭ ديانچين جولداس ءبىزدىڭ ۇيرەنۋ ۇلگىمىز، اسىرەسە، ونىڭ «جەمقورلىقتى جازالاپ، قياناتشىلدىقتى تەكتەپ، ادىلدىكتى قورعاۋداي» ءومىر سەنىمى مەنى قاتتى تەبىرەنتتى، پروكۋرور بولسا «ديڭ ديانچيندەي» پروكۋرور بولسا يگى ەدى، - دەدى.

  سۇحبات اياقتاردا ديڭ ديانچين: داڭق وتكەن كۇندەرگە ءتان، كۇرەس، ناتيجە بولاشاقتىڭ ەنشىسىندە ، پروكۋرورلىق قىزمەتپەن اينالىسۋ بارىسىندا مەن اۋەلگى ماقساتتى ۇمىتپاي، ۇدەرە العا تارتا بەرەمىن...، - دەپ كەسىپ ايتتى.

جاۋاپتى رەداكتور : سايراش تۇرارجان قىزى

ەسكەرتۋ:

تورابىمىزداعى مازمۇنداردىڭ مەنشىك ۇقىعى شينجياڭ ۇيعۇر اۆتونوميالى رايوندىق حالىق ۇكىمەتى اقپارات كەڭسەسىنە ءتان، جاريالانعان مازمۇنداردى سىلتەمەسىز كوشىرۋگە بولمايدى. كوشىرىپ پايدالانۋعا تۋرا كەلگەندە، «ءتاڭىرتاۋ تورابىنان» الىنعانى انىق ەسكەرتىلۋى ءتيىس، بولماسا زاڭدىق جاۋاپكەرلىگى قۋزاستىرىلادى.

  • ورتا تازالىق جۇمىسشىلارى شىت - جاڭا ۆەلوسيپەدكە يە بولدى
  • چۇڭچيڭ-گۇيياڭ تەمىر جولى بىرلەسپە سىناق جۇرگىزۋ مەزگىلىنە ءوتتى
  • ماسساي قىستاعى
  • «ىلە ايدىنى» جۋرنالى ادەبيەت سيلىعىن تاراتتى

ءوتىمدى اقپارات

بىزبەن بايلانىس جارناما قىزمەتى لەبىز قالدىرۋ ءبىز تۋرالى