قىستاقتاعى ءار ۇلت تۇرعىندارى ءبىر ءۇيلى جانداي ەتەنە

    مەرەكە - مەيرامداردا ءۇشتۇرپان اۋدانى جامانسۋ قىرعىز ۇلتتىق اۋىلى قاراجۇلعۇن قىستاعىنداعى «ۇلتتار ىنتىماعى ءۇيى» دۋمانداپ جاتادى، ەندى عانا وتكەن ورتاڭعى كۇز مەرەكەسى دە وسىلاي بولدى.

    بۇل قىستاقتا ءار ۇلت تۇرعىندارى ارالاس قونىستانعان، مەيلى قايسى ۇلتتىڭ مەرەكەسى كەلسىن، كوپشىلىك بىرگە وتكىزەدى.

    قاراجۇلعۇن قىستاعى − ءۇشتۇرپان اۋدانىنىڭ ماڭدايشالىق اسىپ قۇرعان ۇلتتار ىنتىماعى بويىنشا ارالاسىپ وتىرۋدان ۇلگى كورسەتۋ ءتۇيىنى، قىستاق تۇرعىندار كوميتەتىنىڭ كەڭسەسى كوپشىلىكتىڭ «ۇلتتار ىنتىماعى ءۇيى».

    تاياۋدا ءتىلشى قاراجۇلعۇن قىستاعىنا باردى.

    «ۇلتتار ىنتىماعى ۇيىنە» ەڭ جاقىن ما لانحۋانىڭ وتباسى ەكەن، ول اۋدان بويىنشا ۇلتتار ىنتىماعى، العاباسارلىعىنىڭ وزاتى، 38 جىلدىڭ الدىندا ما لانحۋا گانسۋ ولكەسىنىڭ جيۋچۋان قالاسىنان وسى قىستاققا ۇزاتىلىپ كەلگەننەن بەرى وسىندا تۇرىپ كەلەدى.

    − اۋىلىڭىزعا قايتىپ تۇرمىس كەشىرۋدى ويلاپ كوردىڭىزبە؟

    − العاشىندا ويلايتىنمىن، قازىر ويىما دا المايمىن!

    − وتباسىڭىزبەن كوشىپ بارۋ قولايسىز بولعاندىقتان با؟

    − ارينە ولاي ەمەس، كوشىپ بارۋ وڭاي، دەسەدە، بۇل جەردەگى كورشىلەرىمدى قيمايمىن. اۋىلىما قايتپاق تۇگىلى، اۋدانداعى قىزىمنىڭ ۇيىنە بارىپ بىرنەشە كۇن تۇرىپ كەلۋگە دە داعدىلانا المادىم، كورشىلەرىم 3 − 4 كۇن كەزدەسپەسەم تەلەفون شالىپ، قايدا كەتكەنىمدى، قاشان قايتاتىنىمدى سۇرايدى.

    تىلشىمەن سۇحباتتاسا ءجۇرىپ، ما لانحۋا قوي قورانىڭ الدىنا بارىپ، 80 نەشە قويىن، اناداي جەردەگى 70 مۋ جوڭىشقالىعىن كورسەتىپ: شىلدەدە جيۋچۋانعا بارىپ كەلدىم، سول كەزدە ءىنىم ابدۇشكۇر مامەت مالىما قاراستى. ول تاعى ورۋ ماشيناسىن تاۋىپ اكەلىپ، جوڭىشقامدى تۇگەل شاۋىپ بەردى، - دەدى.

    وسىلايشا اڭگىمەلەسىپ تۇرعانىمىزدا 40 نەشە جاستاعى ۇيعۇر جىگىت دورباعا سالىنعان قوي ەتىن الىپ، اۋلاعا كىرىپ كەلدى، ول ابدۇشكۇر مامەت ەكەن. ما لانحۋانىڭ كۇيەۋى قايتىس بولعاننان كەيىن، ابدۇشكۇر مامەت ونىڭ قويىن سويىپ، كومەكتەسىپ كەلە جاتىپتى.

    اپەكەسى ما لانحۋامەن سۇيىسپەنشىلىگىن اۋىزعا العاندا ابدۇشكۇر مامەت بىلاي دەدى: 6 جاسىمدا لانحۋا اپەكەم قىستاعىمىزعا ۇزاتىلىپ كەلدى، ول كەزدە اكە - شەشەمنەن جەتىم قالعاندىعىمنان، ونىڭ ۇيىنەن تاماق ءىشىپ تۇراتىنمىن. باس قۇراعاننان كەيىن باعىمشىلىقپەن اينالىستىم، ول ماعان ءبىر تيىن ءوسىم الماي قارىز اقشا بەردى. بالام وقۋعا تۇسكەندە، باس قۇراعاندا ول بارلىعىنا شاشۋ اكەلدى، ءبىز ءبىر ءۇيلى جاندارداي ەتەنە ءوتىپ كەلەمىز.

    ما لانحۋانىڭ ۇيىنەن شىعىپ، كوشەنى بويلاپ كەلە جاتىپ، مالشىلاردى وتىرىقتاندىرىپ، اۋقاتتاندىرۋ بويىنشا جولدىڭ ەكى جاعىنا قاز - قاتار سالىنعان 20 ءۇيدى كوردىك. ۇيعۇر شارۋا اسەنجان زايتتىڭ ءۇيىنىڭ الدىندا حانزۋ شارۋا يان زۋحۇڭنىڭ ءۇيى بار ەكەن. «ءار مەرەكە - مەيرامدا اسەنجان مەنى ۇيىنە شاقىرىپ قوي ەتىن جەگىزەدى. ەرلى - زايىپتى ەكەۋى دە ءبىزدىڭ ۇيدە پىسىرىلعان سيىر، قوي ەتىنەن ءدام تاتىپ جاتادى. ءبىر قازاننان تاماق جەپ وتىرعان ءبىزدىڭ قارىم - قاتىناسىمىز قالايشا جامان بولماق؟» - دەدى يان زۋحۇڭ.

    «ويلاپ كورسەم كوپشىلىكتىڭ بەت جىرتىسقان كۇندەرى بولماعان ەكەن، تالاي جىلدان بەرى، سىرتقا شىقساق ەسىگىمىزگە قۇلىپ سالىپ كورمەدىك، بۇل جەردىڭ اماندىعى توتەنشە جاقسى. جايشىلىقتا كىمنىڭ ۇيىندە جۇمىس بولسا، بارلىعىمىز بارىپ كومەكتەسەمىز»، - دەدى قىرعىز شارۋا جاڭاباي تۇردالى.

    ونداعان جىلداردان بەرى قاراجۇلعۇن قىستاعىنداعى ءار ۇلت تۇرعىندارى بىرگە جاساسىپ، بىتە قايناسىپ، اعا بۋىنداردىڭ وتكەنى مەن جاڭا بۋىنداردىڭ تولىسىپ جەتىلۋىنە كۋا بولىپ كەلەدى.

جاۋاپتى رەداكتور:نۇرجان مينۋار قىزى