قۇربان اتايدىڭ شوبەرە قىزدارى رۋحيام مەن رايحانگۇل چىن چۋانگوعا امانداستى

  23 - اقپان كۇنى اۆتونوميالى رايوندىق پارتكومنىڭ شۋجيى چىن چۋانگو قۇربان اتايدىڭ شوبەرە قىزدارى رۋحيام مەن رايحانگۇلمەن كەزدەسىپ، اپەكەلى - ءسىڭلىلى ەكەۋىنىڭ ۇسىنىس بويىنشا بەيجيڭدە «ۇلتتار ىنتىماعىنىڭ بەرەكەلى شاڭىراعى» اتىنداعى اۋىس - كۇيىس قيمىلىنا قاتىناسقان كەزدە كورگەن - بىلگەندەرى جونىندەگى اڭگىمەلەرىن سابىرلىلىقپەن تىڭداپ، ولارمەن اڭگىمەدە بولدى.

    جۋىردا قۇربان اتايدىڭ شوبەرە قىزدارى رۋحيام مەن رايحانگۇل ۇسىنىس بويىنشا بەيجيڭدە «ۇلتتار ىنتىماعىنىڭ بەرەكەلى شاڭىراعى» اتىنداعى اۋىس - كۇيىس قيمىلىنا قاتىناسقان بولاتىن. ۇرىمجىدەن ۇشاق اۋىستىرىپ حوتانعا قايتارلارىندا، اپەكەلى - ءسىڭلىلى ەكەۋى «ءسوزسىز، چىن چۋانگو اتايىمىزعا بارىپ امانداسايىق» دەپ اقىلداستى. 23 - اقپان تۇستەن بۇرىن اۆتونوميالى رايوندىق پارتكومنىڭ شۋجيى چىن چۋانگو اپەكەلى - سىڭلىلەرمەن قۋانىشپەن كەزدەستى.

    «اتا، سالەمەتسىز بە! ءبىز ءسىزدى ساعىندىق!» كەزدەسە سالا، ءسىڭلىسىن قولىنان جەتەلەگەن رايحانگۇل چىن چۋانگونىڭ الدىنا جۇگىرىپ بارىپ، قۇشاقتاي الدى. چىن چۋانگو قۋانىشپەن رايحانگۇلدى قۇشاعىنا قىسىپ: بەيجيڭدە كوڭىلدى وينادىڭ با؟ قاي جەرلەرگە باردىڭ؟ بەيجيڭ سۋىق پا ەكەن؟، - دەپ سۇرادى كوڭىل بولە. «بەيجيڭ وتە جاقسى جەر ەكەن، ەشقانداي سۋىق ەمەس ەكەن»، - دەپ جاۋاپ بەردى اپەكەلى - سىڭلىلەر.

    اتا مەن نەمەرەنىڭ ءبىر - بىرىنە ىقىلاسى ايرىقشا ىستىق ەدى. چىن چۋانگو اپەكەلى - ءسىڭلىلى ەكەۋىنىڭ قولدارىنان جەتەلەپ كرەسلوعا وتىردى. رايحانگۇل مەن رۋحيام كوڭىلدى تۇردە بىرىنەن كەيىن ءبىرى سويلەپ، بەيجيڭگە بارعان ساپارلارى جونىندە اڭگىمەلەي باستادى. «ءبىز تيان - انمىنگە، ءتوراعا ماۋ زىدۇڭنىڭ ەسكەرتكىش سارايىنا، مەملەكەتتىك مۇراجايعا، ۇلى قورعانعا باردىق»، «ۇلى قورعان ايبىندى - اق ەكەن، مەن توقتاماي ورلەدىم»، «اۆتوبۋزبەن شينحۋامىننەن وتكەن كەزدە، انا جىلدارى قۇربان اتامىز وسى جەردە ءتوراعا ماۋ زىدۇڭنىڭ قابىلداۋىندا بولعانىن ءبىلىپ قاتتى اسەرلەندىك، ايرىقشا ماقتانىش سەزىندىك، اسىرەسە، شي جينپيڭ اتامىزدىڭ وسى جەردە قىزمەت ىستەيتىنىن بىلگەننەن كەيىن ءتىپتى دە جاقىندىق سەزىندىك»، «سول كۇندەرى ادەمى ءتۇس كورىپ جۇرگەندەي، ءوزىمىزدى اسا باقىتتى سەزىندىك»، - دەستى ەكەۋى.

    چىن چۋانگو اپەكەلى - ءسىڭلىلى ەكەۋىنىڭ كورگەن - بىلگەندەرى جونىندەگى اڭگىمەلەرىن كۇلىمسىرەي وتىرىپ تىڭداپ، اراسىندا ءسوز قوسىپ، ولارمەن ەمەن - جارقىن اڭگىمەلەستى. چىن چۋانگو بىلاي دەدى: ەكەۋىڭنىڭ ماعان امانداسا كەلىپ، وزدەرىڭنىڭ باقىتتى سەزىمدەرىڭدى ەڭ الدىمەن مەنىمەن بولىسكەندەرىڭە قاتتى قۋاندىم. اجەلەرىڭنىڭ جاسى ۇلعايىپ، بەيجيڭگە بارا الماي قالدى. سەندەر وسى جولى بەيجيڭدە كورگەندەرىڭدى، ەستىگەندەرىڭدى، سەزىنگەندەرىڭدى اجەلەرىڭە جاقسىلاپ ايتىپ بەرىڭدەر، قىستاقتاعىلار مەن كاسىپتەستەرىڭە، وقۋشىلارعا اڭگىمەلەپ، كوپشىلىكتى وزدەرىڭمەن بىرگە باقىتتىلىق، كوڭىلدىلىك سەزىمىنە كەنەلتىپ، وتاننىڭ ۇلى شاڭىراعىنىڭ مەيىرىن بىرگە سەزىنىڭدەر.

    رۋحيام چىن چۋانگو اتاسىنا وزدەرىنىڭ تيان - انمىن الاڭىندا مەملەكەت تۋىن شىعارۋ سالتىنا قاتىناسقاندارىن، بەس جۇلدىزدى قىزىل تۋ كوككە باياۋ كوتەرىلگەن كەزدە، ءوزىنىڭ لياۋنيڭ اۋياماتكاسىندا مىندەت وتەگەن كەزدەرىن ەسكە الىپ، ءبىر جۇڭگولىق بولۋدىڭ قانداي ماقتانىش ەكەنىن ويلاعانىن ايتتى. چىن چۋانگو بىلاي دەدى: وتانىمىز قۇدىرەتتەنسە عانا، ءبىز جۇڭگولىقتاردىڭ ەڭسەسى كوتەرىلەدى، سوندا عانا باقىتتى تۇرمىس وتكىزە الامىز. سەندەردىڭ ارعى اتالارىڭ قۇربان اتاي وسى جاعىن تەرەڭ سەزىنە ءبىلدى، سوندىقتان دا ول جۇڭگو كوممۋنيستىك پارتياسىن شەكسىز قىزۋ ءسۇيدى، ۇلى وتانىن قىزۋ ءسۇيدى، ۇلتتار ىنتىماعىن شەكسىز قادىرلەدى. جۋىقتا باس شۋجي شي جينپيڭ ءوز قولىمەن ۇيدەرىڭدەگىلەرگە جاۋاپ حات جازىپ، شىنايى ءۇمىتىن العا قويدى، بۇل سەندەردىڭ داڭقتى وتباسىلارىڭ ءۇشىن اسا زور مەرەي. سەندەردىڭ باس شۋجيدىڭ شىنايى تاپسىرماسىن ەستە بەرىك ساقتاپ، قۇربان اتاي رۋحىن ونان ارمان ساۋلەلەندىرىپ، پارتيانى سۇيەتىن، وتاندى سۇيەتىن، سوتسياليزمدى سۇيەتىن، ۇلتتار ىنتىماعىن قاستەرلەيتىن داڭقتى ءداستۇردى ۇرپاقتار بويى جالعاستىرىپ، شينجياڭداعى ءار ۇلت حالقىمەن اناردىڭ دانىندەي تىعىز ىنتىماقتاسىپ، كوركەم شينجياڭدى گۇلدەندىرىپ، وتان ارمانىن بىرگە ىسكە اسىرىپ، جۇڭحۋا ۇلتتارىنىڭ ۇلى گۇلدەنۋىندەي جۇڭگو ارمانىن ىسكە اسىرۋ ءۇشىن بەلسەندىلىكپەن كۇش شىعارۋلارىڭدى، ناقتى ارەكەتتەرىڭ ارقىلى باس شۋجي شي جينپيڭنىڭ ەرەكشە قامقورلىعى مەن تەرەڭ سۇيىسپەنشىلىگىن اقتاۋلارىڭدى ءۇمىت ەتەمىن.

    رايحانگۇل اسەرلەنە تۇرىپ چىن چۋانگوعا ورتالىق تەلەۆيزيانى ەكسكۋرسيالاعان كەزدە «شي جينپيڭ قۇربان اتايدىڭ ۇرپاقتارىنا جاۋاپ حات جازىپ، ولاردى شابىتتاندىردى» دەگەن حاباردى وقىعان ديكتور كاڭ حۇيدى كورگەنىن، ءوزىنىڭ دە ەرجەتكەننەن كەيىن ءتىلشى بولعىسى كەلەتىنىن ايتتى. چىن چۋانگو ونى جاقسى ۇيرەنىپ، ونەر يگەرىپ، ءوزىنىڭ ارمانىن ەرتەرەك ىسكە اسىرۋعا شابىتتاندىردى. چىن چۋانگو رايحانگۇلگە ول ۇناتاتىن بىرنەشە كىتاپتى سيعا بەرىپ، ونى كىتاپتى كوپ وقىپ، جاقسى كىتاپتار وقىپ، ءنار قابىلداپ، ءبىلىمىن مولايتۋعا شابىتتاندىردى.

    چىن چۋانگو رۋحيامعا «شي جينپيڭ ەل باسقارۋ جونىندە» اتتى كىتاپتى سيلاپ، ونىڭ ۇگىت كادرى سىندى ابزالدىلىعىن ساۋلەلەندىرىپ، باس شۋجي شي جينپيڭنىڭ جەلىلەس ماڭىزدى سوزدەرىن جاقسى ۇيرەنىپ، جاقسى ۇگىتتەۋىن ءۇمىت ەتتى. چىن چۋانگو اپەكەلى - ءسىڭلىلى ەكەۋىنىڭ ءوتىنىشى بويىنشا، ولارعا دەگەن ءۇمىتى مەن تىلەگىن كىتاپتىڭ ىشكى بەتىنە ەستەلىك رەتىندە جازىپ بەردى.

    اتتاناردا چىن چۋانگو رۋحيام مەن رايحانگۇل اپەكەلى - سىڭلىلەرگە ءوزىنىڭ ولاردىڭ ۇيىندەگىلەر مەن اۋىلداستارعا دەگەن سالەمىن جەتكىزۋدى تاپسىرىپ، اجەلەرىنىڭ دەنساۋلىعىنىڭ مىقتى، عۇمىرىنىڭ ۇزاق بولۋىن تىلەدى.

جاۋاپتى رەداكتور:سايراش تۇرارجان قىزى