چىن چۋانگو كوكتەم مەرەكەسى قارساڭىندا تۇرپان قالاسىنا بارىپ، ءار ۇلت كادرلارى مەن جۇرتشىلىعىنا امانداستى جانە ولاردان حال سۇرادى

بۇكىل رايونداعى ءار ۇلت حالقى مەن بيڭتۋانداعى كادرلارعا، جۇمىسشى - قىزمەتشىلەرگە مەرەكەلىك جالىندى سالەم جولدادى

چىن چۋانگو ءىدىقۇت رايونى لاۋچىڭ ءمالى باسقارماسى بينحۋ الەۋمەتتىك اۋماعىندا تۇرعىندارمەن ىقىلاستى تۇردە اڭگىمەلەسىپ، ولارعا مەرەكەلىك قۇتتىقتاۋ ايتۋدا

    كوكتەم مەرەكەسى قارساڭىندا، اۆتونوميالى رايوندىق پارتكومنىڭ شۋجيى، شينجياڭ ءوندىرىس - قۇرىلىس بيڭتۋانى پارتكومىنىڭ ءبىرىنشى شۋجيى، بيڭتۋاننىڭ ءبىرىنشى ساياسي كوميسسيارى چىن چۋانگو تۇرپان قالاسىنا كەلىپ، ءار ۇلت كادرلارى مەن جۇرتشىلىعىنا ىقىلاسپەن امانداسىپ جانە ولاردان حال سۇراپ، اۆتونوميالى رايوندىق پارتكوم، ۇكىمەت اتىنان بۇكىل رايونداعى ءار ۇلت حالقىنا، بيڭتۋانداعى كادرلارعا، جۇمىسشى - قىزمەتشىلەرگە مەرەكەلىك جالىندى سالەم جولدادى.

    چىن چۋانگو ءىدىقۇت رايونى تيانماجيايۋان ەرەن بازارىنا كەلىپ، مەرەكەلىك بازاردىڭ قامداۋ جاعدايىن كوزدەن كەشىردى. ەرەن بازاردا ادام كوپ، زاتتىڭ تۇرلەرى مەن مولشەرى تولىق ەكەن. چىن چۋانگو ارالاپ ءجۇرىپ، ارا - تۇرا كىدىرىپ، زات الىپ جۇرگەن قالا تۇرعىندارىمەن ىقىلاستى تۇردە اڭگىمەلەسىپ، جۇرتپەن سالەمدەسىپ، مەرەكەلەرىن قۇتتىقتاپ، مەرەكەلىك زات الۋ جانە تۇرمىس جاعدايلارىن دەن قويا سۇراستىردى. «مەرەكەلىك زاتتاردى دايىنداپ بولىپ قالدىق، جاقسى تۇرمىس كەشىپ جاتىرمىز» دەپ جاۋاپ بەرىستى قالا تۇرعىندارى قۋانىشپەن.

    زات سورەلەرىنىڭ الدىندا، چىن چۋانگو تاۋارلاردىڭ وندىرىلگەن جەرى، باعاسى، ساتىلۋ مولشەرى جانە قورى سياقتى جاعدايلاردى سۇرادى. مەرەكەلىك بازاردىڭ قامداۋى تولىق، باعانىڭ ورنىقتى ەكەنىن بىلگەن چىن چۋانگو ءسۇيىنىشىن ءبىلدىردى.

    ول مىنالاردى باسا دارىپتەدى: ساپا ماسەلەسى بۇقارا كوڭىل بولەتىن ەڭ ماڭىزدى ماسەلە، باعا وزگەرىسىنە بۇقارا ەرەكشە سەزىمتال كەلەدى، سوندىقتان تاسىمالداۋدى كۇشەيتىپ، قوردى مولايتىپ، بازاردى بۇقارا تۇرمىسىنا قاجەتتى زاتتارمەن قامداۋعا كەپىلدىك ەتىپ، تۇرلىشە ادامداردىڭ تۇرلىشە سۇرانىستارىن قاناعاتتاندىرۋ؛ ساپاعا كەپىلدىك ەتۋ شارتى استىندا، اينالىم بۋىندارىن مۇمكىندىگىنشە ازايتىپ، جەتكىزۋ شىعىنىن تومەندەتىپ، تاۋار باعالارىنىڭ نەگىزىنەن تۇراقتى بولۋىنا كەپىلدىك ەتىپ، بۇقاراعا ءتىپتى دە مول ناقتى تيىمدىلىك بەرۋ؛ ساپا باقىلاۋ - باسقارۋدى، باعا باقىلاۋ - باسقارۋدى كۇشەيتىپ، جۇرتتىڭ الاڭسىز ساتىپ الۋىنا، قامسىز ءىشىپ - جەۋىنە، قاپەرسىز قولدانۋىنا، ءار ۇلت بۇقاراسىنىڭ كوكتەم مەرەكەسىن مەرەيلى وتكىزۋىنە مۇمكىندىك جاساۋ كەرەك.

    ەرەن بازاردىڭ الدىنداعى جايمالارعا شىراعداندار مەن مەرەكەلىك بوساعالىقتار جايناتا ءىلىنىپ، ءتۇرلى ازىق - تۇلىكتەر سامسىپ تۇر. چىن چۋانگو ولاردىڭ باعالارىن سۇراپ، ساتۋشىلاردىڭ تابىسىن تىلگە تيەك ەتىپ، ساۋدالارىنىڭ كۇسەت بولۋىن تىلەدى.

    كوكتەم مەرەكەسىن قارسى العان كۇندەردە، چىن چۋانگو قيىنشىلىعى بار بۇقارانىڭ تۇرمىسىن كوكەيدەن شىعارماي، ءىدىقۇت رايونى لاۋچىڭ جولى ءمالى باسقارماسى بيڭحۋ الەۋمەتتىك اۋماعىنداعى ۋاڭ فيدىڭ ۇيىنە بارىپ، امانداسىپ، ولاردىڭ تۇرمىس، قىزمەت جاعدايلارىن سۇراستىردى. ۋاڭ في وتباسىنىڭ جاقسى دوسى باري مامەت پەن ايەلى دە سول ۇيدە مەرەكەلىك ازىق - تۇلىك، اس - سۋلار دايىنداپ ءجۇر ەكەن. چىن چۋانگو 2 وتباسىنىڭ ادامدارىمەن بىرگە وتىرىپ، شىن ىقىلاسپەن اڭگىمە دۇكەنىن قۇردى. «ۇيىڭدە قانشا جان بار؟ تابىس كوزدەرىڭ قايسىلار؟ تۇرمىستا قانداي قيىنشىلىق بار؟ - » دەگەن سۇراقتارمەن ولاردىڭ جاعدايىن چىن چۋانگو تاپتەشتەي سۇراپ وتىردى. ۋاڭ في چىن چۋانگوعا ايەلى قىزمەتتەن بوساعاننان كەيىن قول تەلەفون ساتاتىن بازاردا جۇمىس ىستەپ جۇرگەنىن، ۇلىنىڭ ۋنيۆەرسيتەتتە وقۋعا كومەك اقشا الاتىنىن، ومىرگە ۇلكەن سەنىممەن قارايتىندىقتارىن ايتتى. چىن چۋانگو ونى ىنتالاندىرىپ: مەملەكەتتىڭ حالىققا ءتيىمدى ساياساتتارى كوبەيىپ كەلەدى، پارتيا مەن ۇكىمەتتىڭ كومەگىندە، ەڭبەكشىل قوس قولىنا سۇيەنە بىلسەڭىزدەر، تۇرمىستارىڭىز، ءسوز جوق، كۇننەن - كۇنگە جاقسارا تۇسەدى، - دەدى. ۋاڭ فيدىڭ وتباسى مەن باري مامەت وتباسىنىڭ تانىسقانىنا 7 جىل بولعانىن، ءبىر - بىرىنە كومەكتەسىپ، ۇنەمى بارىس - كەلىس جاساپ، ءبىر ءۇيدىڭ ادامىنداي بولىپ كەتكەنىن ەستىگەن چىن چۋانگو ايرىقشا قۋانىپ، ولاردان بىرگە قۇلشىنىپ، ۇلتتار ىنتىماعىن نىعايتىپ، بالالارىن جاقسى تاربيەلەپ، بىرگە دوڭگەلەك داۋلەتكە جەتۋدى ءۇمىت ەتەتىن ايتتى. چىن چۋانگو باريدىڭ جيەن قىزى گۇلزيباعا مەرەكەلىك اقشا ۇستاتىپ، 2 وتباسىنا حال سۇراۋ اقشاسىن بەرىپ، ولاردىڭ كوكتەم مەرەكەلەرىنە قۇتتى بولسىن ايتتى.

    الەۋمەتتىك اۋماق قىزمەت كورسەتۋ ورتالىعىندا، چىن چۋانگو الەۋمەتتىك اۋماقتىڭ پارتيا قۇرىلىسى قىزمەتى، حالىققا قولايلى قىزمەت كورسەتۋ سياقتى جاعدايلارمەن مۇقيات تانىستى. چىن چۋانگو مىنالاردى باسا دارىپتەدى: نەگىزگى ساتى ۇيىمدىق قۇرىلىسىن قۇلشىنا كۇشەيتىپ، بۇكىل ىنتا - پەيىلمەن حالىق ءۇشىن قىزمەت ەتۋ سىندى ءتۇبىرلى ماقساتتى ادالدىقپەن جۇزەگە اسىرىپ، الەۋمەتتىك اۋماق پارتيا قۇرىلىسىن الىنباس شايقاس قامالى، بۇقارامەن بايلانىس جاسايتىن، بۇقاراعا قىزمەت كورسەتەتىن تەرەزە ەتىپ قۇرىپ شىعۋ كەرەك.

    الەۋمەتتىك اۋماقتىڭ قيمىل ۇيىندە، حانزۋ تۇرعىن چىڭ شينكاي مەن ۇيعۇر تۇرعىن روزى تۇرعىندار ءۇشىن تەگىن مەرەكەلىك بوساعالىق جازىپ جاتىپتى. «قوعامنىڭ جاراسىمدىلىعى − ايقاسقان بىلەكتە، ۇلتتاردىڭ ىنتىماعى − توعىسقان جۇرەكتە»، «وتان كوركەيسە، گۇلدەنەدى تاۋ - دالا، تۇلەجيدى بار الاپ، ۇلتتار ىنتىماقتى بولسا، اعا - ءىنى، اپەكە - ءسىڭلى تەل قوزىداي تابىسار»... كوكتەم مەرەكەسىنە ارناپ ۇيعۇر، حانزۋ تىلىندە جازىلعان بوساعالىقتار ۇستەلدى جاۋىپ كەتىپتى. چىن چۋانگو ونداعى جازۋلاردى وقي ءجۇرىپ، سوزدەرىنىڭ جاقسى جازىلعانىن، جازۋىنىڭ كوركەم تۇسىرىلگەنىن ماقتادى. چىڭ شينكاي، روزىلار: مەرەكە كەزىندە ءوز ارتىقشىلىقتارىنان پايدالانىپ، حالىققا قىزمەت كورسەتكەنىمىز ءۇشىن ەرەكشە قۋانىشتامىز، - دەستى. چىن چۋانگو الەۋمەتتىك اۋماققا جاۋاپتى جولداسقا جاقسى تاجىريبەلەردى قورىتىندىلاپ، ءتۇرلى تاسىلدەر قولدانىپ، سوتسياليستىك وزەكتى قۇن كوزقاراسى مەن ۇلتتار ىنتىماعى تاربيەسىن جۇرتتىڭ ءوندىرىس، تۇرمىسىنا ءسىڭىرۋدى، ەگجەي - تەگجەيلى، ناقتى تياناقتاندىرۋعا كۇش سالىپ، بۇقارامەن جاناسىپ، حالىقپەن ەتەنە بولىپ، تامشى سۋ تاس تەسەتىن قايراتپەن ۇزاق ۋاقىت قۇلشىنۋدى تاپسىردى.

    «چىن چۋانگو شۋجي كەلدى» دەگەندى ەستىپ، كوكتەم مەرەكەسىنە ارنالعان كونسەرتكە دايىندالىپ جاتقان تۇرعىندار ەرەكشە تەبىرەنىپ، الەۋمەتتىك اۋماق قيمىل ءۇيىنىڭ ۇلكەن زالىنا جينالدى. چىن چۋانگو ولارمەن جايساڭ كەڭەسىپ، تۇرعىنداردىڭ كوكتەم مەرەكەلەرىنە قۇتتى بولسىن ايتتى. جۋ چيانفىڭ مەن ايگۇل ەكەۋىنىڭ ۇيلەنگەنىنە 18 جىل بولىپتى، بۇل بارىستا ولار ءبىر - ءبىرىنىڭ سالت - داستۇرىنە قۇرمەت ەتىپ، ەكى جاقتاعى ۇلكەندەرگە قۇرمەت كورسەتىپ كەلگەن، ولار جىل سايىن كوكتەم مەرەكەسىندە، ورازا ايتتا، قۇربان ايتتا باس قوسىپ، مەرەكەنى بىرگە وتكىزەدى. چىن چۋانگو ەكەۋىنىڭ ءتىپتى دە تاتۋ، تۇرمىستارىنىڭ مۇنان دا باقىتتى بولۋىن، سونداي - اق بۇكىل شينجياڭداعى ءار ۇلت جۇرتشىلىعىنىڭ، بيڭتۋانداعى كادرلاردىڭ، جۇمىسشى - قىزمەتشىلەردىڭ كوكتەم مەرەكەلەرىنىڭ مەرەيلى بولۋىن تىلەدى. ول جۇرتتان جاڭا جىلدا بىلەك سىبانىپ، قۇلشىنا ىستەپ، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، اناردىڭ دانىندەي تىعىز ۇيسىپ، شينجياڭنىڭ مۇنان دا تاماشا بولاشاعىن بىرگە جاراتۋ ءۇشىن قۇلشىنۋدى ءۇمىت ەتتى.

جاۋاپتى رەداكتور:سايراش تۇرارجان قىزى